30 нояб. 2011 г.

Яңылыҡтар

Эшҡыуар танылыу яулай

Үткән йомала Өфөлә, Конгресс-холл бинаһында йыл һайын үткәрелгән “Башҡортостан Республикаһының иң яҡшы йәш эшҡыуары” премияһын тапшырыу тантанаһы булды. Унда Баймаҡ ит комбинаты директоры Марат Хисмәтуллин “Бизнес-старт” номинацияһында еңеү яуланы һәм ауыл хужалығы өлкәһендә иң яҡшыһы тип билдәләнде.

Йәштәр күңелле ял итте

Яңыраҡ баш ҡалала “Башҡортостан ҡыҙы” журналының редакция коллективы һәм Бөтә донъя башҡорттары ҡоролтайының башҡарма комитеты Баймаҡ яҡташ йәштәр союзы менән берлектә дискотека үткәрҙе.

Мәктәпкә – автобус!

Б.Юлыев исемендәге Беренсе Этҡол мәктәбенә белем биреүҙе модернизациялау һәм “Мәктәп автобусы” федераль программаһы сиктәрендә яңы, махсуслаштырылған ПАЗ-3205 автобусы тапшырылды. Был уҡыусыларҙы төрлө олимпиадаларға, ярыштарға, экскурсияға йөрөтөүҙе хәл итәсәк. Иң мөһиме – Ғәҙелбай ауылынан йөрөп уҡыған 19 бала мәктәпкә тотҡарлыҡһыҙ килә аласаҡ.

Конкурс үтәсәк

Районда йәштәр араһындағы “Аҡйондоҙ һәм Аҡйегет” конкурсының район ярышы иртәгә халыҡ ижады үҙәгендә үтәсәк. Унда Әлфиә Мостай ҡыҙы Кәримова, Шәүрә Ғилманова һәм республика телевидениеһының килеүе көтөлә.

А. Ишназаров.

Мерәҫтә – Әсә көнө

Үткән аҙнала Мерәҫ ауыл китапханаһында Әсәләр көнөнә арналған кисә үткәрелде. Унда күп балалы, инвалид бала тәрбиәләгән әсәләр, ағинәйҙәр клубы ағзалары саҡырылды. Сарала ҡатнашыусылар тәүҙә яңы китаптар күргәҙмәһе менән танышты. Унан һуң һәр ҡатын-ҡыҙҙы борсоған проблемалар хаҡында йәнле әңгәмә ҡоролдо. Байрамды музыкаль яҡтан китапхана янында эшләп килгән “Игебай мәктәбе” клубы уҡыусылары биҙәне.

Д. Яхина, китапханасы.

Юлдар яҡшыра

Аҡморон ауылында юл мәсьәләһе ошо көнгәсә һаман да киҫкен ҡала бирҙе. Бына, ниһайәт, Баймаҡ ДРСУ-һы “21-се быуат”, “Тирмән” урамдарына өлөшләтә юл һалды. Ауыл халҡы исеменән рәхмәт белдерәбеҙ.

Афарин, Айгөл!

Беҙҙең мәктәптең IX класс уҡыусыһы Айгөл Аҡъюлова (етәксеһе Н.Мәмбәтова) Стәрлетамаҡта үткән “Жәлил Кейекбаев уҡыуҙары” конкурсында I дәрәжәле Маҡтау ҡағыҙы алды.

Гөлназ Азаматова.
Аҡморон ауылы.

Хеҙмәт ярышында еңеүселәр



Район буйынса иғлан ителгән хеҙмәт ярышы – урып-йыйыу эштәре һәм мал аҙығы әҙерләү буйынса «Рассвет» АХК-һы (етәксеһе А.Б. Шәрипов, профком рәйесе С.С. Ковалев, баш агрономы Р.Ғ. Рәсүлев) III урын яуланы һәм аҡсалата премия менән бүләкләнде. Предприятие йылды яҡшы һөҙөмтәләр менән тамамлай, малсылыҡта алдынғы технологиялар ҡуллана, ныҡлы аҙыҡ базаһы булдырған. Ауыл хужалығы хеҙмәткәрҙәре көнө уңайы менән үткәрелгән тантанала кооперативтың бер төркөм хеҙмәт алдынғылары район, республика кимәлендәге наградаларға лайыҡ булды.

А. Ишназаров фотоһы.

Төҙөкләндереү


Конкурсҡа йомғаҡ яһалды

2011 йылдың 28 апрелендә район биләмәһендә төҙөкләндереү буйынса смотр-конкурс ойоштороу һәм үткәреү тураһында муниципаль район Советының ҡарары булғайны. Ошо көндәрҙә конкурс положениеһына ярашлы йомғаҡ яһалды һәм унда ҡатнашыусылар түбәндәге номинацияларҙа билдәләнде

Акцияға ҡушылығыҙ! Бүләктәр отоғоҙ!


Хөрмәтле дуҫтар! 2012 йылдың тәүге ярты йыллығына «Һаҡмар» гәзитенә яҙылыусылар араһында иғлан ителгән уйыныбыҙ дауам итә. Ә унда ҡатнашыу шарттары бик ябай: «Һаҡмар»ға яҙылып, квитанцияғыҙҙы тиҙ арала редакцияға ебәрегеҙ (үҙегеҙ алып килһәгеҙ ҙә була). Отош һәр 2 аҙна һайын үткәрелеп, еңеүселәр билдәләнә. Ярты йыл буйы «Һаҡмар»ҙы уҡып бер кинәнһәгеҙ, шул уҡ ваҡытта хәтәр генә приз отоуығыҙ ҙа мөмкин. Сираттағы уйын бөгөн була, ә һөҙөмтәһен киләһе һанда уҡырһығыҙ.

«Һаҡмар» гәзите редакцияһы.

Әҙерлек эштәре нисек бара?


Дәүләт Думаһына депутаттар һайлауға һанаулы ғына көндәр ҡалды. Урындарҙа һайлауға әҙерлек кимәле нисек? Әлеге мәлдә участка һайлау комиссиялары ни менән шөғөлләнә?

Сәйәсәт


Партияның съезы үтте

«Берҙәм Рәсәй» Рәсәй Президенты вазифаһына үҙенең кандидатураһын тәҡдим итте

Уҙған йәкшәмбелә Мәскәүҙә “Берҙәм Рәсәй” Бөтә Рәсәй сәйәси партияһының XII съезының икенсе этабы үтте. Унда 10 меңдән ашыу кеше, шул иҫәптән 621 делегат ҡатнашты.

«Тура бәйләнеш»


Һорауҙарығыҙ булһа...

Район хакимиәте башлығының ҡарары менән декабрҙә Инвалидтар көнөнә ҡарата Мәрхәмәтлек айлығы иғлан ителеп, саралар планы раҫланды. Уға ярашлы, етәкселәр менән “Тура бәйләнеш” ойошторола. Һорауҙарығыҙҙы 1 декабрҙә сәғәт 9-ҙан 11-гә тиклем бирә алаһығыҙ.

Айыҡ ауыл – 2011


«Конкурста еңәсәгебеҙгә ышанабыҙ», – ти ғәҙелбайҙар

«Айыҡ ауыл» акцияһында ҡатнашырға теләк белдергән ғәҙелбайҙарға сәйәхәтебеҙ баштан уҡ ҡыуаныстарҙан башланды. Беренсенән, ҡар әҫәре күрмәгән Баймаҡтан һуң, Ғәҙелбай серле ҡар иле булып күренде. Икенсенән, Беренсе Этҡол биләмәһе халҡы ауыл биләмәһе башлығы Г.Й. Азаматованың тәҡдиме менән “Һәр өйгә – “Һаҡмар” гәзите!” акцияһын иғлан итеп, район гәзитенә әүҙем яҙылыуҙы ойошторған икән. 

Социаль өлкә


Әсәлек капиталының мөмкинлектәре арта

Рәсәй Федерацияһы Хөкүмәте ҡарары менән әсәлек капиталы сараларын баланың уҡыуына йүнәлтеү өлөшөндәге ҡағиҙәләргә үҙгәрештәр индерелде.

Быға тиклем дәүләт сертификатына эйә булыусылар балаларға белем биреүгә һәм уҡыу осоронда ятаҡта йәшәү өсөн әсәлек капиталын тотона ала ине. Яңы ҡағиҙәләр буйынса хәҙер уны балаларҙы балалар баҡсаларына, шул иҫәптән шәхси мәктәпкәсә белем биреү учреждениеларына йөрөткән өсөн дә күсерергә була. Бының өсөн ата-әсәләр балалар баҡсалары менән килешеү төҙөй, унда баланы ҡараған өсөн хаҡ күләме, шулай уҡ түләү ваҡыты мотлаҡ күрһәтелергә тейеш.

Әсәлек капиталы саралары Пенсия фонды тарафынан балалар учреждениеһы иҫәбенә күсерелә. Беренсе түләү ғариза бирелгәндән һуң ике айҙан башҡарыла, ҡалғандары иһә килешеүҙә күрһәтелгән ваҡытта ай һайын күсерелеп барасаҡ.

Әйткәндәй, әсәлек капиталы мөмкинлектәре күбәйеп кенә ҡалмай, уның күләме лә артасаҡ. 2012 йылдың 1 ғинуарынан ул 387,6 мең һум буласаҡ.

С. Фәритова әҙерләне.

Милләт-ара татыулыҡты нығытыу йылы


Татыу ғаилә – ил күрке

Башҡортостанда төрлө милләт вәкилдәре аралашып, дуҫ йәшәй. Юҡ-юҡта ҡатнаш ғаиләләр ҙә килеп сыға. Дөрөҫ, уларҙың барыһы ла матур йәшәй тип әйтеп булмай. Ике динле кешеләр араһында уйламағанда аңлашылмаусанлыҡтар ҙа килеп сыға шул. Әммә бер-береһенең динен, ғөрөф-ғәҙәттәрен ихтирам итеп йәшәгән ғаиләләрҙең байтаҡ булыуы ҡыуаныслы. Крепостной Йылайыр ауылынан Фәйрүзә менән Шәфҡәт Абыҙгилдиндарҙы һис шикһеҙ шундай ғаиләләр рәтенә индереп була.

Афарин!


Ансамблдең тәүге уңышы


Шишәмбелә халыҡ ижады үҙәгендә Милләт-ара татыулыҡты нығытыу йылына арналған “Оҙон көй” халыҡ йырҙары, таҡмаҡтар конкурсы үтте. Унда быйыл апрель айында ғына 7 кешенән төҙөлгән “Ирәндек таңдары” (етәксеһе В.Савчук) рус халыҡ йырҙары ансамбле Гран-при яуланы. Был – уларҙың тәүге еңеүе. Улар хәҙер тағы ла ҡанатланып, дәртләнеп Белорет, Балаҡатай райондарында үтәсәк республика конкурстарына әҙерләнә. Ансамблде тәүге уңышы менән ҡотлайбыҙ, артабан да ижади бейеклектәр теләйбеҙ.

Айгөл Иҙелбаева.

Ә. Әбүбәкиров фотоһы.

Саралар


Ауыл йәмле кешеләре менән

Районыбыҙҙың иң бәләкәй ауылдарында ла матур, фәһемле сараларҙың юғары кимәлдә үтеүе, йәмәғәт ойошмаларының халыҡты тәрбиәләргә ынтылыуы ҡыуандыра. Ошо йәһәттән Байым ауылын үрнәк итеп ҡуйырға була. Яңыраҡ ауылда урындағы ҡатын-ҡыҙҙар советы Әсә көнөнә арналған матур кисә үткәрҙе. Улар шулай уҡ ауыл халҡын йыйып, үҙҙәрен борсоған проблемаларҙы еткереп, уларҙы хәл итеү юлдарын да эҙләне. Сарала үҙәк ҡала дауаханаһының баш врачы М.И. Ғүмәров, хирургия бүлеге операция блогының өлкән шәфҡәт туташы З.М. Ҡолмөхәмәтова, район ҡатын-ҡыҙҙар советы рәйесе Л.Ҡ. Дәүләтшина, “Фатиха” тапшырыуын алып барыусы Р.Ш. Базикова, Сәлимә инәй Әлмөхәмәтова ла ҡатнашты. 

Рәсми хәбәрҙәр

Диалог ике яҡҡа ла оҡшаны
Ошо кесаҙна муниципаль район хакимиәтендә Башҡортостан Республикаһы Хөкүмәте Аппараты етәксеһе, көньяҡ-көнсығыш төбәкте иҡтисади үҫтереүҙең уртаса сроклы комплекслы программаһы кураторы, яҡташыбыҙ И.А. Тажетдинов шәхси һорауҙар буйынса граждандарҙы ҡабул итте. Хөкүмәт Премьер-министры урынбаҫары менән осрашыуға 17 кеше килде.

Әйтергә кәрәк, был диалогтан ике яҡ та ҡәнәғәт ҡалды. Илшат Азамат улы яҡташтарының үтенестәрен иғтибар менән тыңлап, уларҙың һәр береһен ыңғай хәл итергә вәғәҙә бирҙе. Шәхси характерҙағы һорауҙар менән бер рәттән, экология, эсәр һыу, торлаҡ, ауылдарға газ үткәреү, Түбәлә теген производствоһын тергеҙеү проблемалары күтәрелде.

27 ноябрь – әсә көнө

Әсәләр – донъя ҡотон һаҡлаусылар
Хөрмәтле ҡатын-ҡыҙҙар, беҙҙең һөйөклө әсәйҙәребеҙ! Ысын йөрәктән һеҙҙе донъялағы иң матур байрам – Әсә көнө менән ҡотлайым!
Һәр быуын өсөн әсәй мөхәббәт һәм наҙлылыҡ өлгөһө, рухи ҡиммәттәрҙе һаҡлаусы булып тора. Уның аша беҙ тормош менән танышабыҙ, тәүге һүҙҙәрҙе ишетәбеҙ. Әсәнең һиҙгер йөрәге, күңел йылыһы яҙмыштың аяуһыҙ елдәренән, ҡатмарлы хәл-ваҡиғаларҙан һаҡлай. Нәҡ ул беҙҙә матур, юғары кешелек сифаттарын тәрбиәләй, изге эштәргә фатихаһын бирә. 
Әсә булыу – яуаплы һәм изгелекле бурыс. Ҡатын-ҡыҙҙар өй йылыһын, ҡотон һаҡлап ҡына ҡалмай, ә бар көсөн, белемен, тәжрибәһен ил эшенә лә ҡуша. Улар ир-егеттәр менән бер рәттән бик күп өлкәлә тырышып хеҙмәт итә. 
Шуныһы ҡыуаныслы, Башҡортостанда һуңғы йылдарҙа әсәлек һәм балалыҡты яҡлау буйынса ҙур эштәр атҡарыла. Бигерәк тә күп балалы ғаиләләргә дәүләт ярҙамы күрһәтеү мәсьәләһенә оло иғтибар бирелә. Был өлкәгә бик күп закондар, федераль һәм республика программалары йүнәлтелә. 
Ҡәҙерле әсәләр! Һеҙҙең балаларығыҙ, яҡындарығыҙ уҡыуҙағы һәм хеҙмәттәге уңыштары, йылы һүҙҙәре, изге эштәре менән генә ҡыуандырһын. Барығыҙға ла ғаилә именлеге, тыныс күк йөҙө һәм бәхет теләйем!
И. Ситдыҡов, 
муниципаль район хакимиәте башлығы.


Йән өрөүсе һин кешелеккә
Ҡәҙерле әсәйҙәр, хөрмәтле ҡатын-ҡыҙҙар!
Һеҙҙе иң гүзәл байрамдарҙың береһе – Әсә көнө менән ихлас ҡотлайым. Һәр беребеҙ өсөн Әсә – изгелек һәм шәфҡәтлелек, ышаныс һәм тоғролоҡ, сабырлыҡ һәм мөләйемлек өлгөһө булып тора. Беҙ барыбыҙ ҙа әсәйҙәрҙең сикһеҙ һөйөүенең, һиҙгер күңеленең һәм хәстәрлекле ҡулдарының ҡәҙерен беләбеҙ һәм уға мәңге рәхмәтлебеҙ. Әсә кеше донъяға яңы йән эйәһе бүләк итә, балаға бишек йырҙары аша әхлаҡ нигеҙҙәрен, рухи  ҡиммәттәрҙе һеңдерә. Был матур байрам ғәзиз әсәй-ҙәребеҙ алдында баш эйеү, уның изгелегенә, хәстәрлекле ҡулдарына мәҙхиә йырлау өсөн иң уңайлы сәбәп.  
Йәнендә һөйөү гөлдәре үҫтергән, наҙлы, иркә  һүҙҙәр йөрөткән гүзәл әсәйҙәр! Һеҙгә балаларығыҙҙың  тормошта уңыштарға өлгәшеүен күреп, һәр ваҡыт шатлыҡ-ҡыуаныстар ғына кисереүегеҙҙе теләйем. Үҫеп етеп, улар һеҙгә үҙегеҙҙән алған изгелек һәм наҙ менән генә яуап бирһендәр. Йорттарығыҙ һәр саҡ үҙ-ара аңлашыу , именлек, муллыҡ һәм бәхеттән балҡып торһон! Был байрам көнөндә  бөтә уй-теләктәрегеҙ тормошҡа ашһын!
Л. Дәүләтшина,  
район  ҡатын-ҡыҙҙар советы рәйесе.

Социаль өлкә

Иҫәп приборҙарын ҡуйҙырыусылар өсөн
Башҡортостан Республикаһы Хөкүмәтенең “2011– 2013 йылдарҙа һыу һәм газды ҡулланыуҙы иҫәпләүсе приборҙарҙы ҡуйҙырыусы айырым категория граждандарға бер тапҡыр бирелә торған аҡсалата компенсация түләү тәртибе тураһында”ғы  бойороғона Хеҙмәт һәм халыҡты социаль яҡлау министрлығы тарафынан компенсация алыусылар категорияһын киңәйтеү маҡсатында үҙгәрештәр индерелде.  

һайлау – 2011

Лайыҡлыларҙы һайлайыҡ
Баймаҡ районы ветерандар советының IV пленумында ҡатнашыусыларҙың ветерандарға һәм пенсионерҙарға мөрәжәғәте
РФ Президенты Д.А. Медведевтың 2011 йылдың 29 авгусындағы Указына ярашлы, яңы саҡырылыш РФ Федераль Йыйылыш Дәүләт Думаһына депутаттар һайлау 4 декабргә тәғәйенләнгән.
Был һайлауҙар бары тик партия исемлектәре буйынса уҙасаҡ. Унда ете сәйәси партия ҡатнаша: “Берҙәм Рәсәй”, “КПРФ”, “Ғәҙел Рәсәй”, ЛДПР, “Рәсәй патриоттары”, “Правое дело”, “Яблоко”. Иң күп тауыш йыйыусылар үҙ-ара 450 депутат мандатын бүлешәсәк. Дәүләт Думаһына үтер өсөн партия һайлаусыларҙың кәм тигәндә 7 процент тауышын йыйырға тейеш. Һайлау бюллетендәрендә “Барыһына ла ҡаршы” тигән графа юҡ, шулай уҡ һайлауға килеүселәрҙең минималь күләме лә билдәләнмәй.

27 ноябрь – Әсә көнө

Көслө рухлы ҡатын
Әлмира Хәкимйән ҡыҙы Бикбулатова Әбдрахман ауылында ғаиләһендә һигеҙенсе бала булып донъяға килә. Үкенескә ҡаршы, әсәһенән 10 йәштә генә тороп ҡала. Ләкин атаһы балаларына етемлек күрһәтмәй, матур итеп тәрбиәләй. Әлмира Кәрешкә мәктәбен тамамлағас, Сибай ҡалаһында яратҡан һөнәренә уҡып, ауылына әйләнеп ҡайта. Ашнаҡсы булып эшләгән тырыш, эшһөйәр ҡыҙҙы барыһы ла ярата, ихтирам итә. Матур ҡыҙға егеттәр ҙә күҙ ата. Тиҙҙән Әлмира үҙ яҙмышын табып, кейәүгә сыға. 

Матур ғына ғүмер иткәндә, ҡотло йортҡа оло ҡайғы килтереп, тормош иптәше вафат була. Ошо көндән йәш ҡатынға береһенән-береһе ҡатыраҡ һынауҙар үтергә, тормош ҡаршылыҡтары менән көрәшергә тура килә. Ләкин ул бирешмәй. Баймаҡҡа эшкә урынлаша, ике улын да “бынамын” итеп үҫтерә. Хәҙерге ваҡытта өлкән улы Салауат Өфөлә медицина колледжында, ә Ҡадир Ғ.Әлмөхәмәтов исемендәге Башҡорт республика интернат-гимназияһында 7-се класта белем ала.  

Хәтер

Ғүмер юлы аҡ ине...
Мин Дәүләтбай Ибраһимовты бала сағынан белә инем. Ул минән дүрт йәшкә кесе, бер урам малайҙары булдыҡ, II Этҡол ете йыллыҡ мәктәбендә уҡыныҡ. Ғаиләлә кинйә һәм биш ҡыҙ араһында бер малай булып үҫһә лә, Дәүләтбайҙы иркәләтмәнеләр. Апайҙары бик үк йыуаш түгелдәр ине. Ә атаһы Сөләймән олатай, ваҡытында, дөрөҫөрәге, 1919 йылдың майында Петроградты генерал Юденичтың аҡ гвардиясыларынан һаҡлауҙа ҡатнашҡан башҡорт ғәскәрҙәренең бер һалдаты, ҡырыҫ холоҡло, тәртип талап иткән бер кеше була торғайны. 

Ул йылдарҙа күптәргә II Этҡол ете йыллыҡ мәктәбен тамамлау менән сикләнергә тура килде. Сөнки тормош ауырлыҡтары ата-әсәгә артабан балаларын уҡытырға мөмкинлек бирмәне. Шул уҡ Сөләймән олатайҙың да ҡыҙҙары ете йыллыҡ мәктәпте тамамлағандан һуң “ҡара эш” менән мәшғүл булды. Ә Дәүләтбайҙы атаһы артабан уҡытыу сараһын күрҙе. Шул маҡсат менән улын Сибайҙың 1-се мәктәбендә уҡыуын дауам иттерҙе.

29 нояб. 2011 г.

Яңылыҡтар


Шәхес хөрмәтенә

26 ноябрҙә Икенсе Этҡол ауылында Башҡортостандың атҡаҙанған уҡытыусыһы, тарихсы, крайҙы өйрәнеүсе Дәүләтбай Сөләймән улы Ибраһимовтың тыуыуына 70 йыл тулыуға арналған Хәтер һәм Ҡәҙер кисәһе үтәсәк. Ул йәшәгән йортҡа таҡтаташ ҡуйыласаҡ.

“Юлдаш йыры” лауреаттары

18-19 ноябрҙә “Юлдаш” каналы быйыл икенсе тапҡыр “Юлдаш йыры” республика конкурсын ойошторҙо. 30 райондан килгән ҡатнашыусылар араһынан Иҫке Сибай ауылынан Венер Моратов һәм Сибайҙан Фәнис Сирбаевтар икенсе урынға сыҡты. Афарин! Уларҙы был еңеүе менән ысын күңелдән ҡотлайбыҙ.

Балалар фантазияһы етерлек!

Балалар ижады үҙәгендә “Ҡаурый ҡәләм” конкурсына килгән 80 эш ҡаралды. Шөкөр, балаларыбыҙҙың фантазияһының сиге юҡ! Еңеүселәрҙең ижади эштәре район, республика матбуғатына ебәреләсәк, ә рус телендә яҙышҡандар араһындағы яҡшы эштәр Рәсәй кимәлендәге “Пробуем перо” конкурсына тәҡдим ителәсәк.

Йәш һайлаусылар аҙналығы үтте

Үткән аҙнала муниципаль район хакимиәтенең йәштәр секторы ҡалабыҙҙың бөтә уҡыу йорттары студенттары араһында “Йәш һайлаусы аҙналығы” ойошторҙо. Унда “Иң зирәк һайлаусы” темаһына викторина, ҡыҙыҡлы әңгәмәләр, конкурстарҙа еңеүселәргә иҫтәлекле бүләктәр тапшырылды.

Йәштәр союзы сафы тулыланды

105-се һөнәрселек училищеһында Башҡортостан демократик йәштәре союзы сафына әүҙем студенттарҙы ҡабул итеү тантанаһы үтте. Уларға билдәләр, ағзалыҡ танытмалары тапшырылды. Район буйынса етәксеһе итеп Өфө яғыулыҡ-энергетика колледжының Баймаҡ филиалы студенты Хәсән Үлйәбаев һайланды.

Спорт яңылыҡтары

Ишембай ҡалаһында Башҡортостан Республикаһының 19-сы Ауыл уйындары иҫәбенә шашка һәм шахмат буйынса ярыш үтте. Баймаҡ районының шашка командаһы өсөнсө урынды яуланы. Район намыҫын “Баймакский вестник” гәзитенең яуаплы секретары Х.З. Үтәев, 105-се һөнәрселек училищеһы директоры А.А. Исхаҡов, “Водоканал” яуаплылығы сикләнгән йәмғиәт мастеры А.Х. Бураншин, Таулыҡай ауылынан мәҙәниәт ветераны Р.Ҡ. Ҡоланбаева яҡланы. Р.Ҡоланбаева шәхси зачетта өсөнсө урынға сыҡты.

Айгөл Иҙелбаева.

Тантаналар


Юғары наградаларға лайыҡ булдылар

22 ноябрҙә Өфөлә Башҡортостан Республикаһы Ауыл хужалығы һәм эшкәртеү сәнәғәте хеҙмәткәрҙәре көнөнә арналған тантаналы саралар ойошторолдо. Унда беҙҙең райондан хакимиәт башлығы И.Х. Ситдыҡов етәкселегендәге делегация ла ҡатнашты һәм юғары наградалар алып ҡайтты.

Ауылға – дәүләт ярҙамы


Ҡорт һәм йылҡы тот – субсидия алырһың

Ошо көндәрҙә Башҡортостан Хөкүмәте 2013 йылға тиклем “Башҡортостан Республикаһында умартасылыҡты үҫтереү һәм бал етештереүҙе арттырыу” һәм “Башҡортостан Республикаһында һөт йылҡысылығын үҫтереү һәм ҡымыҙ етештереүҙе арттырыу” программалары сиктәрендә республика бюджетынан субсидиялар биреү тәртибен раҫланы.

Рәсәй Федерацияһы Федераль Йыйылыш Дәүләт Думаһына депутаттар һайлауға 9 көн ҡалды

Әҙерлек эштәре нисек бара?
Дәүләт Думаһына депутаттар һайлауға һанаулы ғына көндәр ҡалды. Урындарҙа һайлауға әҙерлек кимәле нисек? Әлеге мәлдә участка һайлау комиссиялары ни менән шөғөлләнә?

Матбуғат – 2012


Акцияға ҡушылығыҙ! Бүләктәр отоғоҙ!

2012 йылдың тәүге ярты йыллығына «Һаҡмар» гәзитенә яҙылыусылар араһында иғлан ителгән уйын дауам итә. Шулай итеп, 29 ноябрҙә киләһе отош үткәреләсәк. Унда төп приз – «Һаҡмар» редакция-нәшриәт комплексы әҙерләгән саң һурҙырғыс уйнатыласаҡ. Шулай уҡ башҡа бүләктәр ҙә буласаҡ: Беренсе Этҡол ауыл биләмәһе хакимиәтенән сәй сервизы, Шүлкә ауылынан Юламан Раевтан дини китаптар һ.б.

Һайлау–2011


Кешеләр хаҡына эшләргә

«Берҙәм Рәсәй» партияһының Башҡортостан һайлаусыларына мөрәжәғәте

Хөрмәтле һайлаусылар!

Беҙҙең республика бихисап быуындарҙың көсөргәнешле хеҙмәте менән барлыҡҡа килгән ҙур потенциалға эйә. Бөгөн Башҡортостан – илебеҙҙең иң ныҡ үҫешкән төбәктәренең береһе. Беҙ ҡеүәтле нефть химияһы һәм ауыл хужалығы, етди фәнни мәктәп һәм мәғариф системаһы менән ғорурланабыҙ. Беҙҙең барлыҡ уңыштарыбыҙ – тәү сиратта республикабыҙҙың ҡаҙанышына, ғорурлығына әйләнгән эшһөйәр, аҡыллы, һәләтле кешеләрҙең хеҙмәте ул.

Хоҡуҡ һаҡлау


Эш хаҡы түләнергә тейеш

Баймаҡ прокуратураһы тарафынан «Аҡморон» ауыл хужалығы кооперативында Хеҙмәт кодексы закондарының үтәлеше тикшерелде. Уның барышында кооперативтың хеҙмәткәрҙәренә эш хаҡы түләү буйынса 2011 йылдың 14 октябренә тиклем 1 млн 161 000 һум күләмендәге бурысы барлығы асыҡланды. Шуға күрә «Аҡморон» АХК-һы рәйесенә ҡарата РФ Административ хоҡуҡ боҙоуҙар Кодексының 5.27-се статьяһының 1-се бүлегенә ярашлы эш ҡуҙғатылды.

Киләсәккә аҙымды бөгөн яһа!


Баш ҡалаға сәйәхәт

Каникул – уҡыусыларҙың көтөп алған мәле. Күптәр өсөн ул иң тәүҙә күңелле ял, уйындар, яратҡан шөғөлөңә күберәк ваҡыт бүлеү булһа, ҡайһы бер уҡыусылар иһә каникулдың күңелле генә түгел, файҙалы ла үтеүен теләй. Ошондай маҡсат менән Билал урта мәктәбенең егермегә яҡын өлкән класс уҡыусыһы баш ҡалабыҙ Өфөгә юл тотто.

Спорт

Баймаҡтар еңеүҙәргә әҙер!
19 ноябрҙә мәктәп уҡыусылары араһында физик культура буйынса Бөтә Рәсәй олимпиадаһының муниципаль этабы уҙғарылды.

28 нояб. 2011 г.

Гәзит уҡыусы...

...ҡыуана
Етәкселәрҙең кешелеклелеге хаҡлы ялға сыҡҡан ветерандарына булған иғтибарҙа сағылалыр ул. Баймаҡ интернатында эшләп хаҡлы ялға сығыусылар һаны ҡырҡтан ашыу. Улар төрлө ваҡытта фиҙаҡәр хеҙмәт өлгөһө күрһәткән, янып торған кешеләр булһа, хәҙер проблемалары  етерлек. Бөтмәҫ тормош мәшәҡәттәренә ҡарамаҫтан, лицей-интернат хеҙмәткәрҙәре үҙҙәренең ветерандарын да онотмай. Мәктәп уҡыусылары тәрбиәселәре, класс етәкселәре менән берлектә үҙҙәренә беркетелгән пенсионерҙарҙың өйҙәренә барып хужалыҡ эштәрендә ярҙам итә. Уҡыусылар өлкәндәрҙе хөрмәт итеп, улар менән осрашыуҙар ойошторолоуы ҡыуаныслы. Ҡартлыҡ – шатлыҡ түгел, тиһәләр ҙә, тормоштоң матурлығын күрә беләйек, йәш быуынға үрнәк булып, тәрбиә биреп йәшәйек.
Гөлкәй ЯҠУПОВА, йәмәғәт хәбәрсеһе.

...рәхмәт белдерә
“Баймаҡ ПМК-һы” яуаплылығы сикләнгән йәмғиәт районда һәм күрше ҡала-райондарҙа киң төҙөлөш эштәре алып барыуы менән билдәле. Кешеләрҙе матур йорттар һәм башҡа социаль объекттар төҙөп ҡыуандыра беҙҙең төҙөүселәр. Шулай уҡ төрлө йәмәғәт эштәренән дә ситтә ҡалмай улар. Мәҫәлән, ПМК ҡаланың 3-сө мәктәбен шефлыҡҡа алған һәм йыл һайын мәктәпкә төрлөсә ярҙам күрһәтә. Изге ғәмәлдәре өсөн мәктәп уҡыусылары, уҡытыусылар һәм ата-әсәләр исеменән “Баймаҡ ПМК-һы” ЯСЙ-һы директоры Р.Р. Сырлыбаевҡа рәхмәт белдереп, эштәрендә уңыштар теләйбеҙ.
Ата-әсәләр комитеты рәйесе И.Тайбугин.
* * *
Депутат булғас, Ишбирҙе ауыл Советы депутаттары кеүек булһын ул! Депутаттарыбыҙ Шәкир Дәүләткилдин, Мөнир Халиҡовтар тураһында тик маҡтау һүҙҙәре генә әйтергә була. Лиза Оморҙаҡова, Мирғәле Хәсәновтарҙың да һәр ваҡыт оло хәстәрен тоябыҙ. Улар мәктәпкә төрлө матди ярҙам күрһәтә.
Ғөмүмән, беҙҙең мәктәптә ата-әсәләр менән тығыҙ бәйләнеш булдырылған. Уҙған йылда Мөнир Халиҡов 5 пар саңғы бүләк иткәйне, быйыл Шәкир Дәүләткилдин менән Лиза Оморҙаҡова мәктәпкә 8 парта алып биреп ҡыуандырҙы. Ауылыбыҙ кураторы “БИП-Комфорт Плюс” ЯСЙ-һы директоры Р.Р. Мырҙабаевтың да ярҙамы ҙур. Шундай депутаттарыбыҙ, ата-әсәләребеҙ менән ғорурланабыҙ һәм уларға рәхмәтебеҙҙе еткерәбеҙ.
Р. Атанова,
Ишбирҙе мәктәбе директоры.

Юбилейҙар

Күсейҙә тәүге уҡыу йорто асылыуға 130 йыл

 XIX быуаттың аҙағында Башҡортостанда йәҙитселек ысулы менән эшләгән  мәҙрәсәләр, мәктәптәр барлыҡҡа килә. Районыбыҙҙа тәүге мәҙрәсәләр  Муллаҡайҙа (1837), Таулыҡайҙа (1893), Темәстә (1874), Беренсе Этҡолда (1897), Билалда (1897), Юлыҡта (1897), Баймаҡта (1906),  Күсейҙә (1881) асыла. Муллаҡай мәҙрәсәһендә белем алыусылар тыуған ауылдарына ҡайтып мөҙәристәр, мөғәллимдәр, имам-хатиптар булып эшләгән.

1880 йылда миллионер Рәмиевтар беҙҙең Күсей ауылында мәҙрәсә төҙөтә. Ул 1881 йылда асыла. Дини һабаҡтар менән берлектә яңы дәрестәр ҙә индерелә. Халыҡ педагогикаһы нигеҙендә ҡоролоп,  грамотаға өйрәтеүгә, тәрбиә  эшенә иғтибар бүленгән. Был 1920 йылда мәғариф буйынса халыҡ комиссариаты статистик бүлеге тикшеренеүҙәрендә күрһәтелгән.