14 нояб. 2012 г.

“Берҙәм Рәсәй”ҙәр конференцияһы үтте



Конференцияның эшендә партияның урындағы 74 беренсел ойошмаһынан 83 делегат, шулай уҡ урындағы политсовет, мандат, контроль-ревизия комиссиялары ағзалары ҡатнашты. Әйткәндәй, әлеге көндә беҙҙең районда 1018 кеше “Берҙәм Рәсәй” партияһы ағзаһы булып иҫәпләнә. 

Полиция капитаны – Салауат Йәнбирҙин



Полиция көнөндә йәмәғәт тәртибен һаҡлаған, йыш ҡына төндәре йоҡоһоҙ үткән, оператив эшләгән хоҡуҡ һаҡсылары тәбрикләнә. Был йәһәттән беҙҙең Баймаҡ эске эштәр бүлегенең республика кимәлендә танылыу алып, яҡшы эшләүе ҡыуандыра.  

Салауат Лоҡман улы Йәнбирҙин был яуаплы хеҙмәткә 2003 йылда килә. Тырыш, кешелекле һәм кеселекле Салауат Лоҡман улы балиғ булмағандар эштәре буйынса инспектор, участка уполномоченныйы булып эшләй. 

Баймаҡ аграрийҙарының хеҙмәте юғары баһаланды




Республиканың агросәнәғәт комплексы тормошонда мөһим урын биләгән Баймаҡ районы аграрийҙарының хеҙмәте был юлы ла лайыҡлы баһаланды. Райондың ауыл хужалығы тармағы флагманы – Ғ.Б. Сәлимов етәкләгән Ленин исемендәге АХК ауыл хужалығы производствоһында юғары ҡаҙаныштарға өлгәшкәне өсөн БР Хөкүмәтенең Дипломына һәм 100 мең һум аҡсалата премияһына эйә булды. Район-ҡала ветстанцияһы (етәксеһе Н.Р. Ғәлимйәнов) “Иң яҡшы ветеринар учреждение” тип табылды һәм 25 мең һум премия менән бүләкләнде.

“Һаҡмар”ҙы – электрон почта аша!




Яңы ысулдың өҫтөнлөктәре бар – почта сығымдары булмағанға күрә электрон гәзиткә ярты йылға яҙылыуҙың хаҡы 126 һум тәшкил итәсәк. Был иһә ҡағыҙ версияға ҡарағанда ике тапҡырға осһоҙ тигәнде аңлата. Шулай уҡ “Һаҡмар”ҙың һандары интернет аша ваҡытында электрон почта йәшнигегеҙгә килеп ятасаҡ. 


Әйткәндәй, гәзиттең сайты булһа ла, унда бар мәғлүмәт, ҡотлауҙар, иғландар, телевидение программаһы бирелмәй. Ә электрон форматта быларҙың барыһы ла буласаҡ. Өҫтәүенә, фотоһүрәттәр PDF-гәзиттә төҫлө биреләсәк.

Яңыса яҙылырға теләүселәр өсөн киләһе һандарҙа махсус квитанция өлгөһө күрһәтеләсәк. Йәшәгән урынығыҙ уның өҫкө өлөшөнә яҙылһа, аҫҡы өлөшөнә иһә гәзит ебәреләсәк электрон почта адресы күрһәтелергә тейеш. Квитанцияны тултырғас, уны редакцияға ебәрергә кәрәк. Һорауҙарығыҙ булһа, 2-14-99 телефонына шылтыратырға мөмкин. Тулыраҡ мәғлүмәт “Һаҡмар”ҙың сайтында – http://www.hakmar.ru/. 

Электрон гәзитте компьютерҙа PDF-файлдарҙы асҡан программа аша уҡырға мөмкин буласаҡ.



Киләһе йылдан “Һаҡмар”ҙың электрон версияһына яҙылырға мөмкин буласаҡ. Был иһә заманға ярашлы итеп эшләнә. Республиканың күп гәзит-журналдары был алымды күптән уңышлы ҡуллана. 

Ауыр һәм кәрәкле хеҙмәт


 

Кешелек тормошонда граждандарҙың хоҡуғын яҡлау, уларҙы яман уйлы енәйәтселәрҙән һаҡлау элек-электән мөһим роль уйнай. Йәмәғәт тәртибен тейешле кимәлдә тотоу уның үҫеш кимәлен билдәләгән. Шуға күрә һәр заман кешеләренең үҙ хөкөмө, хоҡуҡ һаҡсылары булған.  

Атайыбыҙға рәхмәт



Темәс ауылында йәшәгән атайыбыҙ Ғәйнуллин Әнүәр Зәки улы 1947 йылдың 11 ноябрендә Баймаҡ районының Ҡыпсаҡ ауылында ҙур ғаиләлә донъяға килгән. Биш ҡыҙ һәм ике малай бер-береһенә терәк һәм таяныс булып үҫә. Билал урта мәктәбенең 8-се класын тамамлағас, фермала малсы булып эшләй башлай һәм шул уҡ йылда Юлдыбай һөнәрселек училищеһына уҡырға инә, водитель һәм механизатор һөнәрен алып сыға. Әрме йылдарында ла водитель-механик булараҡ хеҙмәт итә. Унан ҡайтҡас та Темәс автогаражында водитель булып эшләй. 1971 йылда “Һәүәнәк” совхозының йүнәлтмәһе буйынса Бәләбәй ауыл хужалығы техникумында белемен камиллаштыра һәм совхоздың Өмөтбай бүлексәһендә инженер-механик вазифаһын биләй. Бер үк ваҡытта урындағы комсомол ойошмаһы секретары булып та эшләй. Оҫта ойоштороусы, халыҡ менән аралаша белеүе, тырыш булғаны өсөн дә уны ауыл халҡы хөрмәт итә, ихтирам менән ҡарай. Фиҙаҡәр хеҙмәте өсөн атайыбыҙҙы 1983 йылда совхоздың иң ҙур Үҙәк бүлексәһенә идарасы итеп тәғәйенләйҙәр. Бүлексә совхоз һәм район кимәлендә ойошторолған баҫыусылыҡ һәм малсылыҡ буйынса ярыштарҙа гел алдынғылар рәтендә була. Ул етәкселек иткән 20 йыл эсендә ферма тулыһынса автоматлаштырыла. Унда ашхана, ял итеү бүлмәләре, сауна эшләй. Бүлексәнең үҫемлекселек тармағы ла һынатмай.
Ауылдың социаль торошон яҡшыртыуҙа ла атайымдың өлөшө ҙур. Юғары эш һөҙөмтәһе халыҡтың йәшәйешен яҡшырта. Ауылда береһенән-береһе матур өйҙәр ҡалҡып сыға. Районда беренселәрҙән булып Темәстә һыу, газ селтәре төҙөлә. Балалар баҡсаһы асыла, мәҙәниәт йорто төҙөлә. 
Атайым Буранбай ауылы ҡыҙы Рәсимә Рамаҙан ҡыҙы менән ғаилә ҡора. Ике ҡыҙ һәм ике ул үҫтереп үҙаллы тормош юлына баҫтыралар. Ҡыҙғанысҡа ҡаршы, әсәйебеҙ, ҡаты ауырыуҙан һуң, беҙҙе бик иртә ташлап китте. Шулай ҙа атайыбыҙ тормош ауырлыҡтарына бирешмәне. Хаҡлы ялда булыуына ҡарамаҫтан, матур итеп донъя көтә. Ҡура тулы мал, баҡсаһында ла еләк-емеш ишелеп уңа. Бөгөн ул беҙҙең өсөн хәстәрлекле атай, терәк һәм таяныс, ейән-ейәнсәрҙәренә яратҡан ҡартатай.
Ошо көндәрҙә атайыбыҙ үҙенең матур юбилейын билдәләй. Күркәм байрамы уңайынан уға сәләмәтлек, шатлыҡ-ҡыуаныстарҙан ғына торған ғүмер юлы, именлек теләйбеҙ.

Бөтә балалары исеменән – Резеда Ғәйнуллина.
Темәс ауылы.

Халыҡ мәнфәғәтен яҡлап


Клиенттар залында
Сибай ҡалаһындағы Һаҡлыҡ банкыһының Баймаҡтағы 7760-025-се өҫтәмә офисы ошо статус аҫтында өс йыл эшләй. Бөгөн унда юридик һәм физик берәмектәргә кредит биреү һәм уларҙы хеҙмәтләндереү, касса операциялары секторҙары бар.

Йәш шашкасы чемпиондар




2005 йылғы һәм бәләкәйерәк балалар араһында Бөрйәнйылға башланғыс мәктәбенең беренсе класс уҡыусылары Наҙгөл һәм Айбулат Үлйәбаевтар еңеп сыҡты. Икенсе урынды Баймаҡтың 4-се лицейы уҡыусылары Искәндәр Шәйәхмәтов менән Зөбәржәт Мәхмүтова алды, ә өсөнсөлә – Ғәҙелбай ауылынан Инйәр Йортбәков менән Беренсе Этҡолдан Гөлдәр Тләүбирҙина. 
2003-2004 йылғы малайҙар араһында беренсе урынды Динис Йортбәков (Ғәҙелбай) яуланы, икенселә – Вилдан Әхмәтйәнов (Ғүмәр ауылы), өсөнсөлә – Арыҫлан Хәсәнов (Баймаҡтың 3-сө мәктәбе). Был төркөмдәге ҡыҙҙар араһында район чемпионы исеменә Элина Үтәева (ҡаланың 2-се мәктәбе) лайыҡ булды. Артабанғы призлы урындарҙа – ошо уҡ мәктәптән Элиза Ярбулова һәм Баймаҡтың 4-се лицейынан Әлиә Әхмәтҡужина.
Өсөнсө төркөмдә (2000-2002 йылғылар) малайҙар араһында еңеүсе булдылар: Илсур Бикенеев (4-се лицей), Роман Ибраһимов (Баймаҡтың 2-се мәктәбе), Данил Әмиров (Ҡуянтау), ә ҡыҙҙар араһында: Наилә Аткина (4-се лицей), Эльмира Мурзина (Ғәҙелбай ауылы) һәм Миңлегөл Йәнбәкова (4-се лицей). 
Ноябрь башында йәш чемпиондар Ишембай ҡалаһында үткәрелгән республика ярышына барып ҡайтты. Беҙҙә балалар шашкаһы тейешле үҫеш алмаған әле, шуға тәүге һөҙөмтәләр маҡтанырлыҡ түгел. Шулай ҙа Үлйәбаевтарҙың (4-се һәм 6-сы урын), Н.Аткинаның (11-се урын) уйындарын уңышлы тип әйтергә була. 

Р. Үтәев.


Октябрь аҙағында Баймаҡ балалар ижады үҙәгенең шахмат клубында уҡыусы шашкасыларҙың ярышы үткәрелеп, район чемпиондары билдәләнде. 

Уйын дауам итә йәки “Һаҡмар”ға яҙыл һәм бүләк от!




Хөрмәтле гәзит уҡыусылар! Беҙгә күптәр: “Һаҡмар”ға хәҙер яҙылһаҡ һуң түгелме? Беҙ квитанцияларҙы уйнатыуҙа ҡатнаша алабыҙмы?”– тигән һорауҙар бирә. Шуға күрә уйындың декабрь аҙағына тиклем дауам итәсәге тураһында хәтерегеҙгә төшөрәбеҙ. Редакцияға килгән квитанциялар, ҡасан алып килеүгә һәм ебәреүгә ҡарамаҫтан, барыһы ла бүләк отоуҙа ҡатнаша. Шуға күрә гәзит уҡыусыларыбыҙҙың беҙҙең елле приздарыбыҙға лайыҡ булыу бәхете лә арта. “Һаҡмар”ға яҙыл һәм бүләк от!” сараһында редакция хеҙмәткәрҙәре генә түгел, бағыусыларыбыҙ ҙа ҡатнаша. Бәхетле бүләк отоусының квитанцияһын лототрондан бағыусыбыҙ йәки ситтән йәлеп ителгән кешеләр тартып сығара. Һәр уйындың протоколы алып барыла. Шуға күрә уйыныбыҙҙың бар яҡтан ғәҙел булыуы аңлашылалыр тип уйлайбыҙ.
Бүләктәрҙең көндән-көн өҫтәлеүен иҫәпкә алғанда, һеҙҙең гәзитле лә, призлы ла булыу мөмкинлегегеҙ күпкә арта бит. Шуға күрә, ашығығыҙ! “Һаҡмар”ға яҙылығыҙ һәм бүләк отоғоҙ!

Хәтерегеҙгә төшөрәбеҙ, киләһе уйын 16 ноябрҙә үтәсәк. Унда 5 тонна ҡырсынташ, 5 центнер һоло, сәй сервизы, электр ит үткәргесе, бассейнға бушлай абонемент, “Һаҡмар” гәзитенә бушлай ҡотлау уйнатыла. 

9 нояб. 2012 г.

Яңылыҡтар

Грипҡа ҡаршы

Район-ҡалала грипҡа ҡаршы вакцинациялау тамамланыу өҫтөндә. Тәү сиратта прививка балаларға эшләнде. Шулай уҡ өлкәндәр өсөн 5600 доза вакцина алынған. Улар һаулыҡ һаҡлау, мәғариф хеҙмәткәрҙәре, ҡала студенттарын вакцинациялау өсөн файҙаланыласаҡ. Был профилактик сара бушлай үткәрелә. 
 

Президент Гранты – темәстәргә! 

 “Темәс” тарихи-мәҙәни үҙәге “Боронғо кәсептәрҙе тергеҙеү” йүнәлеше буйынса Башҡортостан Республикаһы Президентының 100 мең һумлыҡ Грантына лайыҡ булған. Был аҡсаға үҙәк хеҙмәткәрҙәре ҡатын-ҡыҙҙар өсөн биҙәүестәр, селтәр, ҡашмау әҙерләү, быйма баҫыу буйынса эште йәнләндерәсәк. Шулай уҡ улар 1812 йылғы Ватан һуғышына арналған төрлө кисәләрҙе әүҙем үткәрә. Ошо көндәрҙә буласаҡ һалдаттарҙы мәсеткә йыйып, уларға вәғәз уҡыу, ололарҙың фатихаһын биреү кеүек изге эште лә ойошторғандар.
 

Эстафета – Сәйғәфәрҙә

 Ошо көндәрҙә күсейҙәр “Хәтерләйбеҙ, баш эйәбеҙ” эстафетаһын Сәйғәфәр ауылына тапшырған. Ҡунаҡтарҙы ауыл биләмәһе башлығы Г. Азаматова етәкселегендәге делегация юғары кимәлдә ҡаршы алған. Сарала мәктәп, дин әһелдәре, ауыл йәмәғәтселеге, аҡһаҡалдар, ағинәйҙәр әүҙем ҡатнашҡан. Күсейҙәр 1812 йылғы Ватан һуғышында ҡатнашҡан ата-бабаларының шәжәрәһен төҙөгән. Сарала сәйәси золом ҡорбандары хәтергә алынған. 
Башҡорт телендә уҡыйыҡ!
 
Райондың аҡһаҡалдар һәм ағинәйҙәр клубы рәйестәре йыйылыш үткәргән. Унда йәштәргә патриотик тәрбиә биреү, ғаиләләрҙе заман афәттәренән һаҡлап ҡалыу кеүек мәсьәләләр күтәрелгән. Шулай уҡ аҡһаҡалдар һәм ағинәйҙәр клубтары араһында “Башҡортостан ҡыҙы” журналына иң күп яҙылыусыларға конкурс иғлан ителгән. Районыбыҙҙың оло быуын вәкилдәре башҡорт телендә сыҡҡан баҫмаларҙы күпләп алдырыу һәм таратыу яғында.  
 
Г. Иҫәнгилдина.
 

Профком рәйестәре иғтибарына!

2013 йылда балаларҙы йәйге лагерҙарҙа, шифаханаларҙа ял иттереү өсөн ойошма, учреждение, шәхси эшҡыуарҙарҙан заявкалар ҡабул итеү башланды. Уны 20 ноябргә тиклем мәғариф бүлегенә тапшырырға кәрәк. Заявкала план буйынса һаулығын нығытасаҡ һәм ял итәсәк балаларҙың һаны күрһәтелергә тейеш. 
Ҡыҙыҡһындырған һорауҙар менән Баймаҡ ҡалаһы, Горький урамы, 26, 106-сы кабинетҡа мөрәжәғәт итегеҙ. Белешмәләр өсөн телефон: 2-11-71.
Мәғариф бүлеге.   
 

Хроника

Рәсәй Федерацияһы Пенсия фондының Башҡортостан Республикаһы буйынса бүлексәһе Баймаҡ районы һәм Баймаҡ ҡалаһындағы идаралығы дәүләт учреждениеһы начальнигы итеп, ошоға тиклем БР Федераль ҡаҙналығының Баймаҡ ҡалаһы һәм районы буйынса бүлеге етәксеһе булып эшләгән Салихов Илгиз Мөрит улы тәғәйенләнде.

* * *
Баймаҡ муниципаль район хакимиәтенең мәғлүмәт-аналитика һәм кадрҙар эше буйынса бүлеге начальнигы вазифаһын башҡарыусы итеп Ирмәкова Жанна Зөбәйер ҡыҙы тәғәйенләнде.
Ошоға тиклем район хакимиәтенең мәғлүмәт-аналитика һәм кадрҙар эше бүлеге начальнигы булып эшләгән Ишембәтов Ришат Вәкил улы биргән ғаризаһына ярашлы үҙ теләге менән биләгән вазифаһынан  бушатылды.  

Ауыл хеҙмәтсәне тәбрикләнәсәк


Бөгөн Өфөлә ҙур ваҡиға – Башҡортостан Республикаһы Ауыл хужалығы һәм эшкәртеү сәнәғәте хеҙмәткәрҙәре көнөнә арналған тантаналы йыйылыш була. Ауыр ҙа, маҡтаулы ла хеҙмәте менән дан ҡаҙанған ауыл хеҙмәтсәненә хөрмәт күрһәтеләсәк, ауыл хужалығы производствоһын үҫтереүгә тос өлөш индергән аграрийҙар бүләкләнәсәк. 

Делегация Өфөгә юлланыр алдынан

Яңы китаптар тәҡдим итәбеҙ


1812 йылда Ватан һуғышында еңеүҙең 200 йыллығы сиктәрендә З.Биишева исемендәге Башҡортостан “Китап” нәшриәте республиканың көньяҡ-көнсығыш райондарында китап продукцияһының күргәҙмә-сауҙаһын ойоштора.

Йорттар ремонтлана


Баймаҡ ҡалаһындағы бер нисә күп ҡатлы йорттоң ҡыйыҡтары яңыртылыуын күптәр ҡыҙыҡһынып күҙәтә торғандыр, моғайын. Улар капиталь ремонт яһау адреслы республика программаһына ингән. Йорттарҙа барған төҙөлөш эштәре менән беҙ ҙә таныштыҡ.
 

Юл ҡағиҙәләрен боҙһаң...


Һуңғы осор илдә, шул иҫәптән республикала ла, иҫерек килеш юл-транспорт хәл-ваҡиғаларына тарыу йыш теркәлә. Шуға күрә водителдәрҙе хәмер йоғонтоһонда авария ҡылған һәм кешенең һаулығына зыян килтергән өсөн РФ Енәйәт Кодексының 264-се статьяһының 2-се бүлегенә ярашлы хөкөмгә тарттырыласағы тураһында иҫкәртәбеҙ. Әгәр фажиғәнең сәбәпсеһе машинала йөрөргә өйрәнеп йөрөүсе булһа, уның өсөн инструктор яуаплылыҡ тота.

Йәйәүлеләргә һөжүм башланды


Ҡыш яҡынлашҡан һайын көндәр ҡыҫҡара бара. Сәғәттең ҡышҡы ваҡытҡа күсеүенә лә өмөт һүнде. Иртәнсәк күҙгә төртһәң күренмәҫлек ҡараңғы. Ҡойонан ҡасып оло юлдың ситенән йүгерә-атлай мәктәпкә, эшкә ашыҡҡандарҙың ғүмеренә һәм һаулығына хәүеф артты. Юл уртаһына ҡапыл килеп сыҡҡан йәйәүлеләрҙе машина менән төкөп китмәҫ өсөн бик һаҡ йөрөргә тура килә. Ә инде юғары тиҙлек яратыусылар, әлбиттә, бер ниндәй ҙә ҡаршылыҡ тоймай елеүен генә белә. Мәктәптәрҙә дәресте һуңыраҡ башлау ҙа проблеманы хәл итмәйәсәк. Сәғәт 8-ҙән эшләгән ата-әсә балаһын мәктәпкә иртәрәк оҙата.
 

«Баймаҡ чупакабраһы»

Районда билдәһеҙ йән эйәһе
тураһында имеш-мимештәр таралды

Һуңғы осорҙа Интернет селтәре “чупакабра” тигән бығаса билдәле булмаған йән эйәһенең ҡыҙырыуы, малға, атап әйткәндә, ваҡ малға һөжүм итеүе тураһындағы хәбәрҙәр менән тулды. Ярай, Интернетта ҡайһы бер осраҡтарҙа әҙәм ышанмаҫлыҡ юҡ-бар яҙыуҙарына беҙ күнегеп тә бөтөп барабыҙ инде. Ә бына  киң мәғлүмәт сараларының да был теманы күтәреүе нисектер уйға һала, борсолдора. Хәйер, хәҙер Рәсәйҙең күп кенә матбуғат саралары ла, сенсация артынан ҡыуып, шундай шаҡ ҡатырғыс яңылыҡтар баҫырға әҙер генә тора.
 

Мал аҫраусылар иғтибарына!


Баймаҡ районы һәм ҡалаһының ветеринар станцияһы белдереүенсә, урындарҙа кешеләр һәм хайуандар өсөн дөйөм айырыуса хәүефле ауырыуҙарға (бруцеллез, туберкулез, бешмә (ящур), ҡоштарҙың юғары патогенлы киҙеүе, себер язваһы, ҡотороҡ, лептоспироз) ветеринар-профилактика сараларынан тыш, ветеринария врачтарының хеҙмәте, “Түләүле ветеринария хеҙмәттәре ҡағиҙәләрен раҫлау тураһында”ғы 1998 йылдың 6 авгусында ҡабул ителгән Рәсәй Федерацияһы Хөкүмәтенең 898-се бойороғона ярашлы, түләүле. Был шулай уҡ БР Ветеринария идаралығының 2009 йылдағы бойороғона ла тап килә. Киләһе йылдан бындай төр хеҙмәттәргә хаҡтың үҙгәреүе көтөлә.

“Ғәйепһеҙгә ыҙа сиктек...”


Сәйәси золом ҡорбандары... Ғәйепһеҙгә ыҙа сиккән, ниндәйҙер ошаҡсыға ярай алмаған кешеләр... Уларҙың кемеһелер заманына күрә етеш йәшәй, ә бәғзеһе бигерәк тура һүҙле була. Колхоз-совхоз активистары ла был исемлекте тулыландыра, “планды” тултырырға ярҙам итә.

Ошо көндәрҙә район китапханаһында район хакимиәте менән берлектә “Ғәйепһеҙ ғәйеплеләр” исемле золом ҡорбандары балалары – Ғәлиә Әминева, Гөлсирә Абдуллина, Менәүрә Сәйфуллина, Хәйерниса Нурмөхәмәтова, Раҡия Кәримова, Әхәт Мостафин, Фазулла Сарин, Әхиәр Исхаҡов һәм Хәлфетдин Ишморатов менән осрашыу кисәһе үтте. Сарала шулай уҡ район хакимиәтенең эштәр идарасыһы Илгиз Байымов, ҡаланың 105-се профессиональ лицейының башҡорт теле уҡытыусыһы Зәлиә Солтанова һәм уның студенттары ҡатнашты.

8 нояб. 2012 г.

Партияның тоғро һалдаты


Мәғариф ветераны Т.А. Арыҫланғәлин тормош юлын сағыу ҙа, мәртәбәле лә үткән арҙаҡлы ир уҙамандарының береһе. Райондың ул саҡтағы мәғариф системаһындағы уңыштары, һис шикһеҙ, тап уның исеме менән бәйләнгән.

...1958 йылда яңы ғына Стәрлетамаҡ педагогия институтын тамамлаған ике йәш белгес – Минира һәм Тимерғәле Арыҫланғәлиндар Түбә ҡасабаһындағы 2-се һанлы башҡорт урта мәктәбенә уҡытырға киләләр. Тимерғәле Абдрахман улы – физиканан, Минира Ғәләүетдин ҡыҙы математиканан белем бирҙеләр. Мәктәп директоры Б.М. Мәмбәтҡолов йәш белгестәрҙе ихлас ҡаршы алып, һәр яҡлап та ярҙам итергә тырышты.

“Ҡотҡар мине, әсәй!..”


Кескәй туғандарын артабан ҡарай алмаясағын аңлаған үҫмер үҙ-үҙенә ҡул һала
Район-ҡалала аҙна һайын тиерлек үҙ-үҙен үлтереү йәки үлтерергә маташыу теркәлә. Улар араһында эскелеккә һабышҡан, тормош мәғәнәһен юғалтҡандар ғына түгел, ә үҫмерҙәрҙең, хатта балаларҙың да осрауы хафаға һала. 
 
“Әсәй! Үтенеп һорайым, ҡайттыҡ, һеңлем илай, тыммай. Ҡайттыҡ инде, зинһар!” Сибек кенә үҫмер малай өҫ-башы, сәсе туҙған әсәһен ялбарып-ялбарып саҡырҙы. Тик тегеһе: “Бар күҙемдән юғал! Илаһа ни – тымыр әле. Мин ни эшләйем!” – тип һаһылдашып көлгән ирҙәргә боролоп ултырҙы. 

5 нояб. 2012 г.

Матбуғат – 2013

Ҡаҙҙар – Мерәҫкә осто...


Хөрмәтле гәзит уҡыусыларыбыҙ! Ниһайәт, түҙемһеҙләнеп көткән “Һаҡмар”ға яҙыл һәм бүләк от!” квитанциялар конкурсының беренсе уйыны үтте. Унда беҙҙең хөрмәтле бағыусыларыбыҙ КФХ етәкселәре Г.З. Байрамғолова менән В.В. Әминев ҡатнашты һәм лототронды әйләндереп отоусыларҙы билдәләне.
Шулай итеп, Мерәҫтән М.Әйүпов – 10 ҡаҙ бәпкәһе, Йомаштан Х.З. Әбдрахманова – бер батман бал, Темәстән Альбина Дәүләтбаева – сәй сервизы, Мерәҫтән Хөрмәт Рыҫмөхәмәтов 2013 йылда “Һаҡмар” гәзитендә бушлай ҡотлау йәки иғлан биреү бәхетенә эйә булды. Уларҙың приздарын редакциянан килеп алыуы һорала. Был бүләктәрҙе Г.З. Байрамғолова, В.В. Әминев, Беренсе Этҡол биләмәһе башлығы Г.Й. Азаматова әҙерләгән ине.
Хөрмәтле дуҫтар! 16 ноябрҙә 5 тонна ҡырсынташ (ДРСУ), 5 центнер һоло (“Алғаҙы” ЯСЙ-һы), сәй сервизы (Түбә ауыл биләмәһе), электр ит үткәргесе (“Баймаҡ ПМК-һы”), бассейнға бушлай йөрөү өсөн абонемент (спорт комитеты), 2013 йылда “Һаҡмар” гәзитендә бушлай ҡотлау уйнатыласаҡ.
Ашығығыҙ! Гәзитебеҙгә бөгөн үк яҙылып, квитанцияғыҙҙы ебәрһәгеҙ, декабрь аҙағына тиклем елле бүләктәрҙе отоу мөмкинлегенә эйә буласаҡһығыҙ. “Һаҡмар” ҙа, приздарыбыҙ ҙа тик һеҙҙең өсөн, дуҫтар!

Ҡыуаныстарға сорналып

Бәхетле Әфләтуновтар ғаиләһе

1 ноябрь районыбыҙ тарихында иҫтәлекле, ҡыуаныслы ваҡиғаларҙың береһе булып оҙаҡ һаҡланасаҡ. Айырыуса ошо көндө торлаҡ төҙөүгә һәм һатып алыуға сертификат алған 21 ғаилә өсөн был иң бәхетле мәл булып ҡаласаҡ.

Депутаттарға яңы бурыстар билдәләнде


1 ноябрҙә Башҡортостан Республикаһы Баймаҡ районы өсөнсө саҡырылыш муниципаль район Советының беренсе ойоштороу ултырышы уҙҙы. Унда БР Дәүләт Йыйылышы – Ҡоролтай секретариаты етәксеһе З.И. Еникеев, БР Хөкүмәте Аппараты етәксеһе урынбаҫары А.В. Лихачев, муниципаль район хакимиәте башлығы И.Х. Ситдыҡов ҡатнашты.

Баймаҡ телевидениеһы – иң яҡшыһы!

Телеконкурс еңеүсеһе – Әлфиә Түләкова

Көндәлек тормошобоҙҙо һирәк кеше “зәңгәр экрандарһыҙ” күҙ алдына килтерә алалыр. Нисәмә йылдар уңышлы эшләп килгән Баймаҡ телевидениеһы хеҙмәткәрҙәре лә яңылыҡтар менән ваҡытында таныштырыу, төрлө ҡыҙыҡлы, фәһемле һәм тәрбиәүи тапшырыуҙар әҙерләүгә бар тырышлығын һала. Быны ошо көндәрҙә Өфөлә үткән профессиональ тележурналистарҙың “Прайм Тайм-2012” республика конкурсы ла иҫбатланы. Баймаҡ телевидениеһы үҙенсәлекле ярышҡа бер нисә тапшырыу ебәрә. Жюри тарафынан уларҙың барыһы ла юғары баһалана. Шулай уҡ Әлфиә Рәшит ҡыҙы Түләкованың “Иң яҡшы социаль-иҡтисади материал” номинацияһында еңеү яулауы һөйөндөрҙө. Әлфиә үҙ тапшырыуында ата-әсәнең эскелеге арҡаһында насар шарттарҙа йәшәгән балаларҙың тормошо тураһында бәйән иткән. Был тетрәндергес материал бер кемде лә битараф ҡалдырмай.

Ғөмүмән, Баймаҡ телевидениһы хеҙмәткәрҙәренең эше республикала юғары баһалана һәм улар иң яҡшылар рәтендә килә. Тележурналистарыбыҙға киләсәктә лә юғары уңыштар юлдаш булыуын теләйбеҙ.
 
Г. Cалихова.
Автор фотоһы.

Байрам имен үтһен!

Байрам көндәрендә граждандарҙы терроризм һәм экстремизмдан һаҡлап ҡалыу өсөн тейешле ҡағиҙәләрҙе күҙәтеүегеҙ һорала.
 
Шикле әйбер күрһәгеҙ, уны иғтибарһыҙ ҡалдырмағыҙ. Әгәр был хәл йәмәғәт транспортында күҙәтелһә, янығыҙҙағы кешеләрҙән уның хужаһын асыҡлағыҙ. Әйберҙең эйәһе табылмаһа, был хәл тураһында водителгә әйтегеҙ. Тик ваҡытты һуҙырға ярамауы хаҡында онотмағыҙ. Әгәр ошондай шикле әйбер подъезда ҡалдырылһа, тәүҙә күршеләрегеҙҙән һорашығыҙ, кире осраҡта – полиция  саҡыртығыҙ.
 
Табылған нәмәне тейергә, урынынан шылдырырға, тибеп ҡарарға, асырға ярамай! Был әйберҙең табылыу ваҡытын иҫегеҙҙә ҡалдырығыҙ һәм мотлаҡ оператив-тикшереү төркөмөнөң килеүен көтөгөҙ. Шулай уҡ янығыҙҙағы кешеләргә ситкәрәк китергә кәңәш итегеҙ.
 
Иң ябай әйберҙәрҙең (сумка, пакет, ҡумта, уйынсыҡ, һыра банкаһы, кеҫә телефоны һ.б.) эсенә лә шартлатҡыс йәшерелеүе ихтимал. Ата-әсәләр, балаларығыҙҙың именлеге һәм һаулығы һеҙҙең ҡулығыҙҙа. Уларға урамда, подъезда һ.б. урында табылған әйберҙәрҙең ҡурҡыныс тыуҙырыуы тураһында аңлатығыҙ.
 
Әгәр һеҙ террористик акттар тураһында ниндәйҙер мәғлүмәткә эйә булһағыҙ йәки шикле кешеләрҙе, әйберҙәрҙе күрһәгеҙ:
  • Баймаҡ эске эштәр бүлегенә – 02, 2-16-54,
  • дежур хеҙмәткә – 01, 3-11-62,
  • ”Ышаныс телефоны”на – 8 (34751) 2-26-85, 8 (347) 128 шылтыратыуығыҙ һорала.

Һорауҙарығыҙ булһа

Хөрмәтле хәрби хеҙмәткә саҡырылыусылар һәм уларҙың ата-әсәләре!

2012 йылда үткән көҙгө хәрби саҡырылыш буйынса һорауҙарығыҙ булһа, “ҡыҙыу линия”ның түбәндәге телефондарына шылтырата алаһығыҙ:
  • БР хәрби комиссариатының Баймаҡ ҡалаһы, Баймаҡ һәм Йылайыр райондары буйынса бүлеге – 8 (34751) 3-16-11, 3-10-94,
  • Баймаҡ муниципаль район хакимиәте – 8 (34751) 3-14-47, 3-16-47,
  • Баймаҡ районының эске эштәр бүлеге – 8 (34751) 3-15-26,
  • Баймаҡ районы прокуратураһы – 8 (34751) 2-26-61,
  • БР Хәрби комиссариатының хәрби әҙерлек бүлеге начальнигы, граждандарҙы контракт буйынса  хәрби хеҙмәткә йыйыу – 8 (347) 253-13-48,
  • Йәмәғәт ҡабул итеү бүлмәһе – 8 (347) 228-02-92,
  • Өфө гарнизонының хәрби прокуратураһы – 8 (347) 250-05-10,
  • Ашығыс психологик ярҙам күрһәтеү – 8 (347) 273-09-00.
Үҙәк Хәрби округ ғәскәрҙәре командующийы ҡабул итеү бүлмәһенең электрон адресы – priemcenter@mail.ru

Х. Хәмитов, БР хәрби комиссариатының Баймаҡ ҡалаһы, Баймаҡ һәм Йылайыр райондары буйынса бүлек начальнигы.

Документтар ҡабул ителә

6 ноябрҙән 2012 йылға бәләкәй һәм урта эшҡыуарлыҡты үҫтереү муниципаль программаһы буйынса яңы эш башлаусы бәләкәй эшҡыуарлыҡ субъекттарына субсидия бүлеү буйынса документтар ҡабул итеү тергеҙелә.
Муниципаль район хакимиәтенең 101-се кабинетына мөрәжәғәт итергә, тел. 3-17-46.

Проблемаларҙың хәл ителешен көтәбеҙ

Киләһе йыл Баймаҡ ҡалаһы үҙенең олпат юбилейын билдәләйәсәк. Беҙ оло тантананы ҡаршы алырға әҙерме? Был олпат датаны билдәләүгә ниндәй өлөш индерәсәкбеҙ? Тағы ла ниндәй эштәрҙең башҡарылыуын теләр инегеҙ? Ошо һорауҙарҙы баймаҡтарға йүнәлттек.

Ә.З. Сәйғәфәров, мәғариф ветераны, тыуған яҡты өйрәнеүсе:
– Баймаҡ бөгөн ҙур үҙгәрештәр кисерә. 1971 йылда ҡалаға күсеп килгәндә, саң-туҙандар уйнап тора ине, үҫеп ултырған ағастар ҙа булманы. Бөгөн ул бөтөнләй икенсе һулыш менән йәшәй. Йорттар ҡалҡып сыға, юлдар төҙөлә, йәшелләндереү буйынса ла байтаҡ саралар күрелә.

Бәлә булмаһын өсөн

“Газ-Сервис” ААЙ-һы газ менән хәүефһеҙ ҡулланыу буйынса сираттағы айлыҡты үткәрә. Уға ярашлы, ҡыш алдынан көнкүрештә “зәңгәр яғыулыҡ”ты ҡулланыу, газ ҡоролмаларын дөрөҫ эксплуатациялау мөһимлеге тураһында иҫкәртәбеҙ.   

Намыҫлы тормош юлы

Байым ауылы үҙенең бай тарихы, атаҡлы шәхестәре менән дан тота. Ғалим һәм яҙыусы Мөхтәр Байымов, ике Хеҙмәт Ҡыҙыл Байраҡ ордены кавалеры Абдрахман Зарипов, БР-ҙың атҡаҙанған механизаторы Рәсүл Мөхәмәтйәнов, мәшһүр ҡурайсы һәм бил бирмәҫ көрәшсе Шәкирйән Ғәлин, производствоны оҫта ойоштороусы Рәсих Байымов кеүек арҙаҡлы уҙамандары менән билдәле был төбәк.

Эш хаҡы түләмәһәләр


“Эш хаҡын йыш ҡына ваҡытында бирмәйҙәр. Был күп уңайһыҙлыҡтар тыуҙыра, банктан алған кредитты ваҡытында түләүгә тотҡарлыҡ яһай. Беҙҙең етәкселек законды боҙа түгелме?”
Һорауға Баймаҡ прокуроры ярҙамсыһы И. Мортаев яуап бирә:
– Рәсәй Федерацияһының Хеҙмәт кодексына ярашлы, эш хаҡын ваҡытында түләмәгән өсөн етәксе тотҡарлаған сумманы процент менән ҡайтарып бирергә тейеш. Проценттар эш биреүсенең ғәйеп кимәленә ҡарап билдәләнә. Шулай уҡ хеҙмәткәр эш хаҡын алғанға тиклем эшен туҡтатыу хоҡуғына ла эйә. Бының хаҡта РФ Хеҙмәт кодексының 142-се статьяһында әйтелгән. Шулай уҡ ошо Кодекстың 5.27-се статьяһының 1-се өлөшөнә ярашлы, етәксегә бындай хоҡуҡ боҙған өсөн административ штраф һалына. Бынан тыш эш хаҡын ваҡытында түләмәгән өсөн енәйәти яуаплылыҡ та ҡаралған. Граждандар үҙҙәрен борсоған һорауҙар менән Баймаҡ прокуратураһына мөрәжәғәт итә ала.

Балаларҙы һаҡлайыҡ!

Районда “Иғтибар – балалар!” профилактик операцияһы бара

Баймаҡ районында балаларҙың юл-транспорт хәл-ваҡиғаларына тарыуы киҫкен мәсьәләләрҙең береһе булып ҡала. Бындай фажиғәләр айырыуса каникул ваҡытында күҙәтелә. Балаларҙың буш ваҡыты күп булыуы, уны нисек үткәрергә белмәүе, ата-әсәләрҙең уларҙы контролдә тотмауы төҙәтә алмаҫлыҡ бәлә-ҡазаға килтерә.
Ҡыҙҙар һәм малайҙарҙы юл-транспорт хәл-ваҡиғаларынан һаҡлау өсөн ЮХХДИ хеҙмәткәрҙәре төрлө профилактик саралар үткәрә. Шуларҙың береһе – 24 октябрҙән 8 ноябргә тиклем иғлан ителгән “Иғтибар – балалар!” операцияһы.
Балағыҙ имен-һау булһын, төрлө аварияларға тарымаһын өсөн уны мәктәпкә тиклем оҙатығыҙ. Әгәр үҙегеҙҙең ваҡытығыҙ булмаһа, быны туғандарығыҙ, өлкән класс уҡыусылары эшләһен. Машина юлын үткәндә бәләкәскә һәр саҡ юл хәрәкәте ҡағиҙәләрен өйрәтегеҙ, иғтибарлы булырға саҡырығыҙ. Балағыҙ алдында, машина юҡлығына һылтанып, светофорҙа ҡыҙыл ут янғанда юлды үтмәгеҙ. Кескәй быны шунда уҡ күңеленә һеңдерәсәк һәм һеҙ янында булмағанда хәүефле аҙымығыҙҙы ҡабатлаясаҡ.
Ғаиләгеҙҙә юл хәрәкәте ҡағиҙәләрен өйрәнеү, өйрәтеүгә ҙур иғтибар биреү ғәзиз балаларығыҙҙы бәлә-ҡазанан һаҡлап ҡалыр.
Р. АҠҠУЖИН, ЮХХДИ инспекторы.

1 нояб. 2012 г.

Акция дауам итә

Хөрмәтле дуҫтар!


“Һаҡмар”гәзитенә яҙыл һәм бүләк от!” акцияһы дауам итә. Һеҙҙең һорауығыҙ буйынса уйыныбыҙҙың шарттарын тағы ла аңлатабыҙ. Бының өсөн иң яҡын урынлашҡан почта бүлексәһенә йүгереп барып, “Һаҡмар” гәзитенә яҙылырға һәм уның квитанцияһын беҙгә ебәрергә генә кәрәк. Артабан һеҙ беҙҙең бағыусыларыбыҙ әҙерләгән елле бүләктәрҙең отошонда ҡатнашасаҡһығыҙ. Һеҙҙең квитанцияғыҙ һәр уйында ҡатнашып, декабрь аҙағына тиклем бүләк отоу мөмкинлегенә эйә буласаҡ. Ашығығыҙ! Беҙҙең менән бергә ҡалһағыҙ, төрлө мәғлүмәттәргә бай гәзиткә яҙылыуҙан тыш, бүләктәр алып та ҡыуанырһығыҙ.

Яңылыҡтар

Эльмира – БР Президенты стипендиаты!

10 октябрҙә Өфөлә, Башҡорт дәүләт университетының тантаналар залында 2012/13 йылға исемле стипендиялар һәм Башҡортостан Республикаһы Президенты стипендияһын алыусылар наградланды. Исемлеккә уҡыу һәм ғилми эшмәкәрлектә юғары һөҙөмтәләргә өлгәшкән студенттар, аспиранттар һәм докторанттар инде. БДУ-ның Сибай институтының иҡтисад факультетында “Бухгалтер иҫәбе, анализ һәм аудит” һөнәре буйынса 4-се курста уҡыған  Баймаҡ ҡалаһы ҡыҙы Эльмира Фәнил ҡыҙы Харрасова ла БР Президенты стипендиаты исеменә лайыҡ булды.

Башлыҡ кубогына ярыштар

Был аҙнаның шәмбеһендә “Баһадир” физкультура-һауыҡтырыу комплексы үҙенә волейболсыларҙы йыясаҡ. Бында хакимиәт башлығы кубогына волейбол буйынса район беренселеге уҙғарыла. Ярышта теләгән һәр кем ҡатнаша ала. 
А.ИШНАЗАРОВ.

Уҡыуҙар башланды

Ишмырҙа ауылының мәсетендә Ислам дине нигеҙҙәрен өйрәнеү буйынса уҡыуҙар башланды. Унда күбеһенсә мәктәп уҡыусылары белем ала. Сүрәләр, ғәрәпсә әлифба һәм намаҙ шарттарын өйрәтеүҙе бына бер нисә йыл инде хаҡлы ялдағы уҡытыусы Таңһылыу Яҡуп ҡыҙы Әфләтунова үҙ өҫтөнә алды.
Әмирхан Абыҙгилдин,
имам-хатип.

Иман нуры өләшә

Мерәҫ ауылында Ҡорбан ғәйете юғары кимәлдә үтте. Ҙур булмаған ауылда өс тиҫтәнән ашыу ғаилә ҡорбан салды. Мәктәп ашханаһында ауыл биләмәһе башлығы Т.М. Хафизова ярҙамы менән табын ойошторолдо. Ауыл халҡы һәр дини байрамды юғары кимәлдә үткәргән, йәштәргә, өлкәндәргә иман өләшкән имам-хатип Хәмзә Хафизовҡа бик тә рәхмәтле.
Д. Яхина,
ауыл китапханасыһы.

Ҡорбандарҙы иҫкә алып

Ишмырҙа мәҙәниәт йортонда сәйәси золом ҡорбандарын иҫкә алыу көнөнә арналған сара үткән. Унда Ярат, Ҡуянтау, Йылайыр, Бөрйәнйылға китапханасылары ла ҡатнашҡан. Мәктәп, балалар баҡсаһы, мәҙәниәт хеҙмәткәрҙәре сәйәси репрессияға эләккән яҡташтарының яҙмышын тетрәндергес итеп сәхнәләштергән. Ағинәйҙәр, аҡһаҡалдар, мәктәп уҡыусылары ҡатнашҡан фәһемле сара юғары кимәлдә үткән.

Ҡотлайбыҙ!

Ауыл хужалығы производствоһы өлкәһендәге уңыштары өсөн Салауат исемендәге АХК механизаторы Кәримов Рәйес Хәмзә улы “Башҡортостан Республикаһының атҡаҙанған ауыл хужалығы хеҙмәткәре” тигән маҡтаулы исемгә лайыҡ булды.

* * *
Иген культуралары үҫтереүҙә юғары күрһәткестәргә өлгәшкәндәре өсөн РФ Ауыл хужалығы министрлығының Дипломы һәм бронза миҙалы менән бүләкләнделәр:
Шәрәфетдинов Айрат Алик улы – “Шәрәфетдинов” КФХ-һы башлығы,
Миңлебаев Барис Фәйрүз улы – “Миңлебаев” КФХ-һы башлығы.

Хеҙмәт ярышында еңеүселәр

Предприятиеның хеҙмәт алдынғыларынан
бер төркөм хужалыҡ рәйесе А.Б. Шәрипов менән

Көҙгө баҫыу эштәре йомғаҡтары буйынса “Рассвет” АХК-һы еңеүсе тип табылды һәм Диплом, аҡсалата премия менән бүләкләнде. Хужалыҡтың бер төркөм хеҙмәт алдынғылары төрлө кимәлдәге хөрмәттәргә лайыҡ булды.
 
Айбулат Ишназаров фотоһы.

Ҡалабыҙ матур булһын!


БРСУ эшселәре ҡала урамын таҙарта

Бөгөн ҡаланың 75 йыллыҡ юбилейын ҡаршылауға тулы әҙерлек бара. Байрамға әҙерлек сиктәрендә Баймаҡта ҙур эштәр көтөлә. Беҙ, баймаҡтар, уға ниндәй өлөшөбөҙҙө индерәбеҙ?
 

Социаль карта алығыҙ


Башҡортостан Республикаһы Хөкүмәтенең 2012 йылдың 20 ғинуарында ҡабул иткән Ҡарары буйынса 1 ноябрҙән “Башавтотранс” ДУП-ының социаль транспорт карталары үҙ көсөн юғалта. Ошо көндән алып берҙәм юл йөрөү билеты тик Башҡортостан социаль картаһы буйынса рөхсәт ителәсәк.
 
Шуға күрә социаль ярҙам алған граждандарҙың был карталарҙы эшләтеү өсөн хеҙмәт һәм социаль яҡлау бүлегенә йәки “УралСиб” банкына мөрәжәғәт итеүе һорала. Ҡалған кешеләр шулай уҡ “УралСиб” банкына мөрәжәғәт итеп, Башҡортостандың социаль картаһын алыуы мөмкин.
 
Карта алыу өсөн паспорт, ИНН, мотлаҡ медицина страховкалауы полисы, пенсия страховкалауы таныҡлығы (СНИЛС), пенсия таныҡлығы, әгәр булһа, льготаға хоҡуҡ булыуын раҫлаған документтар һәм эске эштәр хеҙмәткәренең таныҡлығын алып килергә кәрәк.

Өҫтәмә мәғлүмәтте 8-800-100-8180 (бушлай) телефоны буйынса белешергә мөмкин.

“Туған теленән оялған балалар үҫтереүҙән тыйылайыҡ...”


Ошо көндәрҙә Баймаҡ районы башҡорттары Ҡоролтайының сираттағы ултырышы үтте. Унда район-ҡала советы депутаттары, ауыл биләмәһе башлыҡтары, предприятие-ойошма, учреждение етәкселәре, мәктәп директорҙары, дин әһелдәре башҡорт теле һәм әҙәбиәте уҡытыусылары һ.б. ҡатнашты. Шулай уҡ сараға Башҡортостан Республикаһы Ҡоролтайының бүлек мөдире, “Киске Өфө” гәзитенең баш мөхәррире Г.Г. Янбаеваның да килеүе, был ултырыштың мөһимлеген билдәләне.

1 ноябрь – суд приставтары көнө

Үҙ эшенең оҫтаһы булған ханым


Суд приставтары – дәүләт ҡоролошо өсөн бик тә кәрәкле, әммә ҙур көсөргәнешлекте талап иткән хеҙмәт. Хөкүмәт, граждандар алдында бурысы йыйылған кешеләр менән һөйләшеү, уларҙы закон буйынса яуапҡа тарттырыу, аңлатыу эштәре алып барыу, ял-байрам тимәй, район буйлап рейдтарға сығыу... Был беҙгә ауыр хеҙмәттең күренгән генә өлөшө. Ә инде ҡағыҙ мәшәҡәттәре, отчеттар, һәр ҡарар өсөн яуап биреү һ.б. был эштә физик яҡтан ғына түгел, ә рухи яҡтан да ныҡ кешеләр генә эшләй алыуын дәлилләй. Ошо йәһәттән беҙҙең Баймаҡ суд приставтарын тик ыңғай яҡтан телгә алырға була. Сөнки бында үҙ эшен яратҡан һәм уның мөһимлеген аңлаған кешеләр эшләй.   

Маҡсатыбыҙ – ауыл хужалығын үҫтереү


“Россельхозбанк” ААЙ-һы капитал һәм актив суммалары күләме буйынса – дүртенсе, ә илебеҙҙең иң ҙур банктары араһында ышаныслылыҡ кимәле буйынса икенсе урынды биләй. Уның төбәктәрҙә 78 филиалы эшләй.

“Һеҙҙән яңы китаптар көтәбеҙ...” тине кисәлә ҡатнашыусылар


Азамат Тажетдинов сығышы менән шәхестәргә бай төбәк Алдар батыр, Хәмит сәсән, шағир-сәсән Шәһәрғәзе Ғәбдиевтар тыуған II Этҡол ауылынан. Ул һуғыш алып килгән донъялағы иң ауыр ҡайғыны – атайһыҙлыҡты татып үҫһә лә, донъя ауырлығы алдында баш эймәй. Ғүмерен йәш быуынды тәрбиәләүгә бағышлаған Азамат Әғзәм улы “Рәсәй Федерацияһының мәғариф отличнигы” исеменә, Батыр Вәлид исемендәге премияға лайыҡ була. Ул – тыуған яҡтың тарихын, халҡын өйрәнеүсе, яҡташтарының исемен мәңгеләштереүсе. Китап уҡыусыларға Азамат Әғзәм улының “Беҙ – байымдар”, “Ел-дауылдар аша”, “Күңелдәрҙә яра төҙәлмәгән”, “Шәһәрғәзе сәсән Ғәбдиев”, “Сәсәндәр иленә сәйәхәт”, “Ғүмерем ағыштары–ғаиләм яҙмыштары” китаптары яҡшы таныш. 2012 йылда иһә Юлыҡ ауылы халҡына ҙур бүләк булып “Оло юлда Юлыҡ” китабы донъя күрҙе.

Биттәрендә – данлы тарих эҙе

Ҡунаҡтар хәтирәләре менән уртаҡлаша.

Үткән аҙнала Ҡолсора ауылында ошо ерҙә тыуып үҫкән ир уҙаманы, арҙаҡлы шәхес, хеҙмәт ветераны, "Һаҡмар" һәм "Башҡортостан" гәзиттәренең тоғро дуҫы Салауат Хәбибрахман улы Мөхәмәтшиндың "Данлы, ырыҫлы төйәгем" исемле китабының исем туйы үтте.
Матур итеп ойошторолған кисәгә баҫмала тасуирланған кешеләр, шулай уҡ мәрхүм булған Бөйөк Ватан һуғышы ҡаһармандарының, хеҙмәт батырҙарының вариҫтары, күренекле шәхестәр саҡырылды.

Колледжда тормош гөрләй!


Өфө яғыулыҡ-энергетика колледжының Баймаҡ филиалы иртәнән кискә тиклем гөрләп тора. Уҡыу студенттарҙан сыҙамлылыҡты, иғтибарлылыҡты, теүәллекте талап итеүгә ҡарамаҫтан, улар бар сараларҙа ҡатнашырға тырыша. Һуңғы бер нисә йыл эсендә генә студенттар икенсе ҡалалағы уҡыу йорттарында булып өлгөрҙө, белемдәрен  олимпиада һәм конференцияларҙа һынап ҡараны. Учалы ҡалаһында информатика буйынса үткән ярышта В.Грязев, И.Йәнбәков, Өфө ҡалаһында “Метрология, стандарт һәм сертификат” фәне буйынса конференцияла Урал Аллаяров ҙур һөҙөмтәләргә өлгәште. Ә Софья Собина менән Гөлсимә Хөбөтдинова Стәрлетамаҡта “Инженер графикаһы” фәненән үткән олимпиадала белемдәрен күрһәтеп, Почет грамотаһына эйә булды.

31 окт. 2012 г.

Иғтибар! Конкурс!

Приздар һаны арта
Бушлай ҡырсынташ йәки һоло кемгә кәрәк?


“Һаҡмар”ға яҙыл һәм бүләк от!” акция-конкурсы дауам итә. Редакциябыҙ почтаһына квитанциялар ҙа “яуа” ғына. Ә приздар фонды, әйтеп үтелгәнсә, көндән-көн тулылана бара. Баймаҡ ДРСУ-һы (етәксеһе Д.Ғ. Арсланов) акцияға ихлас ҡушылып, гәзит уҡыусыларыбыҙ өсөн хәтәр шәп бүләк әҙерләне – 5 тонна ҡырсынташ (щебень) вәғәҙә итте. Ә бына “Алғаҙы” ЯСЙ-һы директоры С.Ғ. Урманов иһә бүләккә 5 центнер һоло әҙерләгән. Әйткәндәй, Сәғитулла Ғиззәт улы үҙ хужалығында эшләгән 15 кешенең барыһына ла “Һаҡмар” гәзитен яҙҙыртҡан. Афарин!

Билдәле булыуынса, акция 5 этапта ойошторола һәм уның тәүгеһе 2 ноябрҙә үткәрелә. Тәүге отошҡа түбәндәге приздар ҡуйыла:10 ҡаҙ бәпкәһе (спонсоры Г.З. Байрамғолова), сәй сервизы (1-се Этҡол ауыл биләмәһе), бер батман бал (В.В. Әминев), Һаҡмар гәзитенә киләһе йылда бер тапҡыр бушлай ҡотлау йәки иғлан биреү хоҡуғы.
 
Артабан квитанциялар 16, 30 ноябрҙә, 14, 28 декабрҙә уйнатыласаҡ.
Киләһе ярты йылға “Һаҡмар”ға яҙылып,  квитанцияларҙы редакцияға ебәрегеҙ һәм шәп приздар отоғоҙ. Алдағы һандарҙа тағы ла еллерәк приздар тураһында хәбәр итербеҙ.
 
“Һаҡмар” гәзите редакцияһы коллективы. 

Яңылыҡтар

Морапталовтар – беренсе!

Гәзитебеҙҙең алдағы һанында хәбәр итеүебеҙсә, 26 октябрҙә Автомобиль транспорты хеҙмәткәрҙәре көнөнә арналған “Автоғаилә” конкурсында көньяҡ-көнсығыш райондары араһында Баймаҡ АТП-һы намыҫын яҡлаған Морапталовтар беренсе урынды алып, Өфө ҡалаһында уҙған республика ярышында ҡатнашыу хоҡуғын яулағайны. Был һынауҙы ла улар уңышлы үтеп, Баймаҡҡа еңеү менән ҡайтты.

Нисек ял итәбеҙ?

4 ноябрь – Халыҡтар берҙәмлеге көнө. Байрамдың ял көнөнә тура килеүе сәбәпле, ул байрамдан һуңғы эш көнөнә күсерелә. Шулай итеп, 4 ноябрь дүшәмбегә, йәғни 5 ноябргә  күсә.
Үрҙә әйтелгәндәрҙе иҫәпкә алып, Башҡортостан Республикаһында биш көнлөк эш көнө булған осраҡта 2012 йылдың 3, 4 һәм 5 ноябре – ял көндәре булып иҫәпләнә.

“45 йәштән ололарға”

Ниғәмәт ауылында яңы мәҙәниәт йорто асылыу менән төрлө кисәләр йыш ойошторола башланы. Уҙған аҙнала (инде икенсе тапҡыр) “45 йәштән ололарға” исемле 80-се йылдар дискотекаһы үткәрелгән. Бер йәшлектә, бер ҡартлыҡта, тигәндәй, бындай сараларҙа ҡатнашырға теләүселәр бик күп булған.

Ижад кисәһе үтә

Бөгөн Ярат ауылы мәҙәниәт йортонда Башҡортостан Республикаһының атҡаҙанған мәҙәниәт хеҙмәткәре, мәҙәниәт йорто директоры Әхмәтова Разифа Зәкәриә ҡыҙының ижад кисәһе үтә. Үҙе йырҙар ижад иткән, бейергә яратҡан, һыҙҙырып гармунда уйнаған Разифа Әхмәтова ауылдың гармунсылар ансамбле, төрлө түңәрәктәр етәксеһе лә.
Лилиә ТАКАЕВА.

Фермерҙар грант алды

Сертификат алыусылар.
Ошо көндәрҙә БР Ауыл хужалығы министрлығында “Эш башлаусы фермер” һәм “Ғаилә һөтсөлөк малсылыҡ фермалары” программалары буйынса гранттар алыуға сертификаттар тапшырыу тантанаһы булды.
 Беҙҙең райондан яңы эш башлаусы фермерҙар: Түбәнге Таһирҙан Р.Н. Әлибаев, Темәстән С.Х. Ғәзизов, Икенсе Этҡолдан Ш.Х. Хисаметдинов, Таулыҡайҙан И.Д. Күсәрбаев, Беренсе Этҡолдан Ю.А. Азаматов, Ғүмәр ауылынан А.С. Йәрмөхәмәтов  грант алыу бәхетенә иреште. Ә ”Ғаилә һөтсөлөк фермалары” программаһы буйынса Яраттан КФХ етәксеһе А.Ш. Мырҙаҡаев дәүләт ярҙамы алды. Сертификаттарҙы БР ауыл хужалығы министрының беренсе урынбаҫары А.С. Йыһаншин тапшырҙы. 

Азамат Мөхәмәтшин.

Иғтибар: “Тура бәйләнеш!”

Эшҡыуарлыҡ эшмәкәрлеген нисек башларға?
Үҙ эшеңде нисек үҫтерергә?
Бәләкәй һәм урта эшҡыуарлыҡ менән шөғөлләнеүселәргә ниндәй дәүләт ярҙамы ҡаралған?
Бөгөн бәләкәй һәм урта эшҡыуарлыҡҡа ярҙам күрһәтеү буйынса ниндәй дәүләт программалары эшләй?
Үҙ эшеңде үҫтереү өсөн нисек субсидия алырға?

 
Ошо һәм башҡа һорауҙарығыҙҙы 3 ноябрҙә иртәнге сәғәт 10-дан 12-гә тиклем муниципаль район хакимиәтенең мәғлүмәт һәм аналитика бүлеге ойошторған сираттағы “Тура бәйләнеш”тә бирә алаһығыҙ:

Асылова Гөлшат Мөхтәр ҡыҙы, муниципаль район хакимиәтенең сауҙа һәм эшҡыуарлыҡ буйынса сектор мөдире, тел. 3-17-46;
 
Байрамғолов Рафаэль Салауат улы, “Баймаҡ” мәғлүмәт-консультация үҙәге директоры, тел. 2-17-15.

Хеҙмәт ярышында еңеүселәр

Ауыл хужалығы производствоһында ҙур уңыштарға өлгәшкәне, агросәнәғәт комплексын үҫтереүгә тос өлөш индергәне һәм Ауыл хужалығы һәм эшкәртеү сәнәғәте хеҙмәткәрҙәре көнө айҡанлы БР Ауыл хужалығы министрлығының Почет грамотаһы һәм аҡсалата премия менән бүләкләнделәр:
  • Әхмәтшина Вәлимә Далха ҡыҙы – “Йылайыр” ЯСЙ-һының баш иҡтисадсыһы,
  • Баййегетов Марсель Әхмәтдин улы – МТС-тың Баймаҡ филиалы менеджеры,
  • Зайцев Василий Трофимович – “Богачевка” ЯСЙ-һы механизаторы,
  • Осипов Сергей Александрович – “Рассвет” АХК-һы механизаторы,
  • Исхаҡов Ишморат Фәтих улы – Баймаҡ ауыл хужалығы техникумының производство белеме биреү мастеры,
  • Ишкинин Морат Хәбибрахман улы – Ленин исемендәге АХК-ның профком рәйесе,
  • Кайниев Мөнир Ғәйнетдин улы – ауыл хужалығы бүлеге начальнигы,
  • Урманов Сәғитулла Ғиззәт улы – “Алғаҙы” ЯСЙ-һы директоры,
  • Хамматова Гөлниса Әхмәт ҡыҙы – ауыл хужалығы бүлегенең баш бухгалтеры,
  • Хәсәнов Шаһбал Муллағәле улы – “Таналыҡ” АХК-һы механизаторы.
Ауыл хужалығы производствоһы өлкәһендәге намыҫлы хеҙмәте һәм йәмәғәт тормошонда әүҙем ҡатнашҡандары өсөн БР Дәүләт Йыйылышы – Ҡоролтайҙың Рәхмәт хатына һәм аҡсалата премияға лайыҡ булдылар:
  • Нәҙербаев Рафиҡ Рәфҡәт улы – Мерәҫ ауыл Советы депутаты, МТС-тың Баймаҡ филиалы инженеры,
  • Уразбаев Нияз Рәжәп улы – Таулыҡай ауыл Советы депутаты, “Уразбаев” ШП-һы етәксеһе,
  • Юнысбаев Вәкил Шәфҡәт улы – Бикеш ауыл Советы депутаты, “Баймаҡ” ҒПБ-һының техник-осеменаторы.
Агросәнәғәт комплексы системаһында оҙаҡ йылдар намыҫлы эшләгәндәре өсөн һәм Ауыл хужалығы хеҙмәткәрҙәре көнө айҡанлы муниципаль район хакимиәтенең Почет грамотаһы һәм аҡсалата премия менән бүләкләнделәр:
  • Әлибәков Самат Азамат улы – Баймаҡ ауыл хужалығы техникумы уҡытыусыһы,
  • Ғәлимйәнов Наил Раил улы – район-ҡала ветеринария станцияһы начальнигы,
  • Передельская Валентина Петровна – “Рассвет” АХК-һы бухгалтеры,
  • Үҙәнбаев Марсель Фәрит улы – “Байҡара” агрофирмаһы директоры,
  • Демышева Ольга Федоровна – Баймаҡ икмәк заводының производство начальнигы.
Район хакимиәте башлығының Рәхмәт хаты һәм аҡсалата премия түбәндәгеләргә тапшырылды:
  • Әхмәтйәнов Урал Әбүбәкир улы – Ленин исемендәге АХК-ның баш агрономы,
  • Божеховский Петр Максимович – “Толпар” ЯСЙ-һының баш агрономы,
  • Буранбаев Хәбир Әхәт улы – “Баймаҡ” ҒПБ-һының баш инженеры,
  • Дәрминева Әнисә Сафа ҡыҙы – Ленин исемендәге АХК-ның баш бухгалтеры,
  • Иҫәнбаев Фәнил Кәбир улы – “Уңыш” АХК-һының баш агрономы,
  • Лукьянов Юрий Андреевич – МТС-тың эксплуатациялау буйынса инженеры,
  • Мичунов Михаил Иванович – БНИИСХ-ның Баймаҡ подразделениеһы директоры,
  • Мусин Әнүәр Харис улы – “Октябрь” АХК-һы бригадиры,
  • Никитин Петр Николаевич – “Рассвет” АХК-һының келәт мөдире,
  • Байғотлина Лилиә Нух ҡыҙы – ауыл хужалығы бүлегенең баш иҡтисадсыһы,
  • Сәйфуллина Альбина Ришат ҡыҙы – “Баймаҡ” мәғлүмәт-консультация үҙәгенең әйҙәүсе зоотехнигы,
  • Хисмәтуллин Динар Рәфҡәт улы – Рәсәй ауыл хужалығы банкының Баймаҡтағы өҫтәмә офисы идарасыһы урынбаҫары.
Хеҙмәт ярышы шарттары буйынса “Һөнәре буйынса иң яҡшыһы” маҡтаулы таҫмаһына һәм аҡсалата премияға түбәндәге хеҙмәтсәндәр лайыҡ булды:
  • Әхмәтов Вәлит Хәлит улы – “Йылайыр” ЯСЙ-һы,
  • Баймөхәмәтов Марсель Минғәле улы – БНИИСХ-ның Баймаҡ подразделениеһы,
  • Балхин Закир Ғаҡиф улы – Ленин исемендәге,
  • Ғәббәсов Ислам Хәсән улы – МТС-тың Йылайыр бүлексәһе,
  • Дерябин Владимир Николаевич – “Аҡморон” АХК-һы,
  • Иҫәндәүләтов Мирғәле Закир улы – “Мырҙаҡаев” КФХ-һы,
  • Ишмырҙин Сәлим Гәрәй улы – “Байҡара” агрофирмаһы,
  • Ҡасҡынов Азат Хәйҙәр улы – “Алғаҙы” ЯСЙ-һы,
  • Күсеев Айрат Нуретдин улы – Салауат исемендәге АХК,
  • Лотфуллин Мансур Миҙәхәт улы – “Уңыш” АХК-һы,
  • Маликов Азат Абдулла улы – “Новатор-Баймаҡ”,
  • Половой Юрий Васильевич – “Йылайыр” ЯСЙ-һы,
  • Рассадников Михаил Александрович – “Рассвет” АХК-һы,
  • Салихов Рәмил Фазулла улы – “Аҡморон” АХК-һы,
  • Тарасов Юрий Иванович – “Богачевка” ЯСЙ-һы,
  • Уразбаев Морат Нур улы – “Союз” ЯСЙ-һы,
  • Хәлилов Рим Зиннур улы – “Толпар” ЯСЙ-һы,
  • Хренов Александр Леонидович – “Күлтабан” МУП-ы,
  • Хөсәйенов Рәмил Вәкил улы – “Уңыш” АХК-һы,
  • Ямантаев Өлфәт Рәфҡәт улы – “Таналыҡ” АХК-һы,
  • Данилов Алексей Сергеевич – “Баймаҡ” ҒПБ-һы,
  • Ғәйнетдинов Булат Мәхейән улы – “Баймаҡ” ҒПБ-һы.

Тармаҡ – үҫеш юлында

Районда сауҙа һәм халыҡты көнкүреш
хеҙмәтләндереүе торошо тураһында


Сауҙа өлкәһе – районыбыҙ иҡтисадының иң мөһим тармаҡтарының береһе һанала. 2012 йылдың 1 сентябренә ҡарата районда 793 эшҡыуар һәм 55 предприятие теркәлгән. Хәҙерге көндә 429 берәмләп һатыу предприятиеһы, шул иҫәптән 275 магазин, 60 киоск, 91 павильон, 3 күмәртәләп һатыу базаһы, 13 йәмәғәт туҡланыуы предприятиеһы бар. Ағымдағы йылдың алты айында берәмләп һатыуҙа тауар әйләнеше 845 миллион һум тәшкил итһә, йәмәғәт туҡланыуы предприятиеларында был күрһәткес 66 миллион һумға тиң.

Мөрәжәғәт ваҡытында ҡаралһын

“Рәсәй Федерацияһы граждандарының мөрәжәғәтен ҡарау тәртибе тураһында”ғы законға ярашлы, граждандар мөрәжәғәттәрен электрон документ итеп тә ебәрә алыуы тураһында иҫкәртәбеҙ. Шул уҡ ваҡытта улар үҙҙәренең электрон адресынан тыш, почта адресын да күрһәтә ала. Был яуап яҙма рәүештә килергә тейешле осраҡта эшләнә. Шулай уҡ граждандар мөрәжәғәтен Интернет аша, ә документтарының күсермәһен почта аша ебәреү хоҡуғына ла эйә. Бынан тыш кешеләр яуапты электрон вариантта алыуҙы ла талап итә ала.
 
Етәкселәр, яуаплы вазифа биләүселәр граждандарҙың мөрәжәғәтен ваҡытында йәки бөтөнләй ҡарамаған өсөн административ яуаплылыҡҡа тарттырыла (биш мең һумдан ун мең һумға тиклемге штраф).

Хыялдарға хыянат итмәгеҙ

Баймаҡта дельтапланеристар
командаһы талап ителә


Баймаҡ күген дельтапланда гиҙгәндәрен күргәнегеҙ бармы? Әлбиттә, барҙыр. Бәлки, минең һымаҡ көнләшеүселәр ҙә осрар. Ни тиһәң дә күк йөҙөн иңләү, ҡош бейеклегенән донъяны байҡау һәр кемгә лә тәтемәй. Шуның өсөн дә бала саҡтағы хыялына тоғро ҡалып, был шөғөлөн бөгөн дә ташламаған Урал Салихов менән осрашып, бихисап һорауҙарымды бирмәй булдыра алманым.

Редакция почтаһына күҙәтеү

Бергә ҡалайыҡ!

Хөрмәтле дуҫтар! Һуңғы өс ай эсендә генә беҙ һеҙҙән ике йөҙҙән ашыу хат алдыҡ. Улар араһында күңелгә үтеп ингән, уйға һалғандары ла, кәйефтәрҙе күтәреп ебәргәндәре лә, тарихи ваҡиғаларға таянып яҙылғандары ла бар ине. Хаттарҙың барыһы ла тиерлек гәзитебеҙҙә үҙ урынын алды. Ә бына аноним йәки аңлайышһыҙ итеп яҙылғандары архивҡа тапшырылды. Шулай уҡ бер нисә хатта төрлө проблема күтәрелеп, ойошма-предприятие етәкселәренә тикшерергә ебәрелде.
 
“Һаҡмар”ҙың йөкмәткеһен дә, киләсәген дә беҙҙең районда йәшәгән кешеләр билдәләй. Шуға күрә гәзит уҡыусыларыбыҙ һәр саҡ беҙҙең менән бергә ҡалыр, яҡындарын, туғандарын да гәзитебеҙҙең дуҫтарына әүерелдерер, тип ышанабыҙ.
 
Хөрмәтле дуҫтар! “Һаҡмар”ҙа һеҙ ниндәй мәҡәләләр күрергә теләйһегеҙ, гәзиттең йүнәлеше ниндәй булырға тейеш, ә ниҙәр бөтөнләй оҡшамай? Ошо һәм башҡа тәҡдимдәрегеҙҙе хат аша йәки 3-11-43 телефоны аша еткерә алаһығыҙ. Шулай уҡ “Һаҡмар”ға яҙыл һәм бүләк от!” акцияһында әүҙем ҡатнашып, бүләктәр оторһоғоҙ тигән ышаныста ҡалабыҙ. Уңыштар һеҙгә!
 
Гүзәл ИҪӘНГИЛДИНА,
хаттар һәм социаль тормош бүлеге мөдире. 

 

Алтын ғүмер юлы

Әбделкәрим ауылында йәшәүсе Файза Зиннәт ҡыҙы менән Ғилмитдин Нуретдин улы Булатовтар ошо көндәрҙә үҙҙәренең алтын туйҙарын билдәләне. Улар тыуған ауылдарында төйәкләнеп, ғәзиз ерҙәренән дәрт-дарман алып, тыуған яғынан йәм табып, бәрәкәтен арттырыуға көс һалып, ҡот өҫтәп йәшәүсе ғаиләләрҙең береһе.
 
Һәр бер ғаиләнең үҙенә генә хас тарихы була. Мәҫәлән, Файза апайға ата йылыһын, һөйөүен, уның көслө ҡулдарының күккә сөйөүен тойоп үҫергә тура килмәй. Атаһын Бөйөк Ватан һуғышының утлы ғәрәсәте алып китә. 1941 йылдың 1 ноябрендә донъяға килгән ҡыҙын да күкрәгенә ҡыҫып өлгөрә алмай ҡала.
 
Ни тиклем ғилемгә ынтылышы көслө булмаһын, Файза Зиннәт ҡыҙына уҡыуын артабан дауам итеү мөмкинлеге бирелмәй. Өҫтөнә кейергә кейем, туйғансы ашарға аҙыҡ етмәгәнлектән, Юлдыбай мәктәбенең 9-сы класын тамамлау менән тырыш ҡыҙ ауылдағы фермаға һауынсы булып эшкә төшә. Был хеҙмәткә ул 22 йыл тоғро ҡала.
 
Файза Зиннәт ҡыҙы һис шикһеҙ талант эйәһе. Уның һәләттәрен һанап бөтөрлөк түгел. Ул шулай уҡ сәсәниә лә. Ижад иткән фәһемле лә, уҡымлы ла шиғырҙары гәзит биттәрендә йыш баҫылып сыға. Ә мандолина уйнап ебәрһә, берәү ҙә битараф ҡалмайҙыр ул. Ҡул эштәре лә төрлөлөгө менән хайран итә. Ул бәйләгән мамыҡ шәлдәр күпме ҡатын-ҡыҙҙың яурынын биҙәй! Ауыл, район кимәлендәге сараларҙа күп яҡлы оҫта булыуы менән күптәрҙең иғтибарын йәлеп итә.
 
Ғилмитдин Нуретдин улы Булатовҡа ла ауыр бала саҡ йылдарын кисерергә тура килә. 4-се класты тамамлау менән колхозға эшкә төшә. Ямғыр-дауыл тип тормай, эҫе-һыуыҡҡа бирешмәй, ал-ял белмәй 46 йыл ферма малдарын көтә. Уның тырыш хеҙмәте маҡтау ҡағыҙҙары, дипломдар, ҡиммәтле бүләктәр менән билдәләнде.
 
Артыҡ байлыҡ артынан сапмаһалар ҙа, матур, етеш тормошта йәшәйҙәр Булатовтар ғаиләһе. Ауыл мөхите, башҡорт халҡына хас ябайлыҡ, киң күңеллелек –  тап ошондай сифаттар биҙәй ҙә инде был ғаиләне. Күҙ нурындай күреп үҫтергән өс балаһы – ғорурлыҡтары. Ғәҙәттә, кешеләр “замана балалары” тип зарланырға ярата. Әйтерһең Булатовтарға заман елдәре ҡағылмаған! Эшһөйәр, матурлыҡҡа ғашиҡ балалары ата-әсәләре өсөн өҙөлөп тора. Хатта үҙҙәренең балаларын да улар өлгөһөндә тәрбиәләйҙәр. Был үҙе үк бәхет түгелме ни?! Тап ошондай минуттар тормошта осраған ауырлыҡтарҙы оноттора ла инде. Ғирфан, Рәзидә, Зилиә – хәҙер инде үҙҙәре үк атай, әсәй. 

Алтын ғүмер юлы кисергән ауылдаштарыбыҙға ныҡлы һаулыҡ, ейән-ейәнсәрҙәренең, бүлә-бүләсәрҙәренең шатлығын күреп, тағы ла оҙон-оҙаҡ йәшәүҙәрен теләйбеҙ.
 
Зөлфиә Мөхәмәтйәнова,
Әбделкәрим ауылы ҡатын-ҡыҙҙар советы рәйесе.

 

Таулыҡайым – алтын бишегем

Алтынсы-етенсе быуаттарҙа Урта Азияла, Мөргәбә Үҙәне буйында, Бохара оазисында, “Башкурт” тауҙары итәгендә күсмә тормошта төрки ҡәбилә йәшәгән. Уларҙы бөрйәндәр (буржандар) тип йөрөткәндәр. Бөрйән ырыуы Монаш, Ямаш, Янһары, Байһары ҡәбиләләренән торған. Улар алтынсы быуатта Урал тауҙарында төбәкләнергә ҡарар итә. Ағиҙел буйҙары көтөүлектәр өсөн бик үк уңайлы булмағанлыҡтан, бөрйәндәр Һаҡмар йылғаһы буйына килеп сыға.
 
Тәбиғәт ошо төбәктә бигерәк бай, ифрат матур була. Тирә-яҡтағы тауҙар, болондар ҡара урман менән ҡаплана. Ҡарғалы йылғаһына тиклем ҡуйы ағаслыҡ, Һаҡмар буйы тал-тирәк, муйыл, ҡарағат, туғайҙарында томбойоҡло күлдәр ялтырай. Яңы ерҙәрҙе ныҡлап үҙләштереп тә өлгөрмәйҙәр, көҙгө һыуыҡтар килеп етә. Күсмә халыҡ малын ҡыуып, кире Бөрйән яҡтарына юллана. Йәйләүе еңел булһа ла, күсенеүе ауырға тура килә.
 
Йәшәү өсөн бөтә уңайлыҡтар булған ошо төбәккә беренсе булып Ҡазыр тигән кеше урынлаша. Уның биләмәләре Ҡана урмандарынан алып Ҡыҙыл далаларына тиклем йәйелә. Тиҙҙән Ҡазырҙың Ҡаратуҡай исемле улы тыуа. Аҡыллы егет ер-һыуҙы яратып үҫә, үҙ ырыуын, яҡташтарын бергә туплай, төрлө яҡтан килгән илбаҫарҙарҙан үҙ төбәген ҡурсалай.
 
Йылдар үткәс, Ҡаратуҡай олоғая. Ләкин уның ошо биләмәне, мал-тыуарын ҡалдырыу өсөн улы булмай.
 
Ауыл аҡһаҡалдары Әширәф Исхаҡов, Шиһап Ғәлин, Усман һәм Зәйнәғәбдин Баййегетовтарҙың һөйләп ҡалдырыуҙарына ҡарағанда, Ҡаратуҡай яуҙа йөрөгән саҡта тауҙар араһында етем сабыйҙы табып ала һәм өйөнә алып ҡайта. Бер-ике йәшлек был малайға Таулыҡай тип исем ҡуша.
Таулыҡай үҫә, өйләнә. Атаһы уға Һаҡмар йылғаһы буйындағы ҡалҡыулыҡта өй һалып бирә. Балалары тыуып, ғаиләһе ишәйгәс, шул тирәлә утар, аҙаҡ ауыл барлыҡҡа килә. Башта ул Ҡолторсаҡ, Ҡотлоюл тигән исемдәр менән йөрөтөлә, ә һуңынан Таулыҡай тип атала башлай.
 
Әле Таулыҡай ауылында 470-кә яҡын йорт бар, һәм унда 2800-ҙән ашыу кеше йәшәй. Ике ҡатлы бинала урынлашҡан ун бер йыллыҡ мәктәп, мәҙәниәт йорто, “Ҡарлуғас” балалар баҡсаһы, заманса йыһазландырылған фельдшерлыҡ пункты, мәсет һ.б. ауылыбыҙҙың йәме булып тора. “Иң төҙөк ауыл” республика конкурсында яуланған икенсе урын – бының төп дәлиле.
Шулай уҡ ауылыбыҙҙы данлаусы билдәле шәхестәребеҙ ҙә бар. Улар – ҡурайсы Юлай Ғәйнетдинов, йырсы Алһыу Бәхтиева, бейеүсе Нияз Баййегетов һәм башҡалар.
 
Вилә Сәйетова, БДУСИ-ның 4-се курс студенты.

 

Мәңгелеккә ҡалды хәтерҙә...


Башҡортостандың төҫ ташламаҫ гәүһәрҙәре араһында тыуған ер ҡуйынынан урғылған Ағиҙел кеүек алсаҡ һәм моңло, Урал кеүек олпат һәм уйсан, далаларыбыҙ кеүек киң һулышлы һәм бәрәкәтле, тормоштоң үҙе кеүек тәрән тамырлы Мостай Кәрим ижады бар.
Рауил Бикбаев.

Ошо көндәрҙә Баймаҡ ауыл хужалығы техникумында Башҡортостандың халыҡ шағиры, драматург, прозаик, Салауат Юлаев исемендәге дәүләт премияһы лауреаты  Мостай Кәримдең тыуған көнөнә арналған хәтер кисәһе үтте. Сараның исеме “Мәңгелеккә ҡалды хәтерҙә” тип аталды. Кисә барышында шағирыбыҙҙың әҫәрҙәрен сәхнәләштереп, барлыҡ студенттарға, уҡытыусыларға күңелле ял минуттары бүләк иттек. “Йәйәүле Мәхмүт” моңһоу комедияһын сәхнәләштергәндә төп ролдәрҙә Йәмилә Аҡбулатова, Нур Юламанов, Ғәзиз Баймөхәмәтов тамашасы һөйөүен яулаһа, балалар өсөн яҙылған  “Теге яҡҡамы, был яҡҡамы?” хикәйәһен ҡуйғанда, Илмира Сафиуллина  Әлфиә ролен бик оҫта башҡарҙы.
 
Артабан “Мәңгелеккә ҡалды хәтерҙә” кисәһе сәхнәләштереү формаһында алып барылды. Әлфиәнең буй еткергән сағын һүрәтләп, уның иптәш ҡыҙҙары менән “Аулаҡ өй”гә йыйылғандарын күрһәттек. Ошо ваҡытта Мостай Кәрим һүҙҙәренә яҙылған “Сигеү сигә ҡыҙҙар” йырын йырланыҡ. Егеттәрҙең “Аулаҡ өйгә” йырлап килеп инеүҙәре, аҙаҡтан күңелле уйын ҡороуҙары һәр кемдең күңеленә хуш килде. Кисәне Арыҫлан Килдейәров “Йылғалар төнөн һөйләшә” йыры менән тамамланы.
 
Сәхнәгә Мостай Кәримдең фотоһүрәтен ҡуйып, китапханасылар уның  биографияһы буйынса бик матур стенд булдырҙы. Шулай уҡ кисә барышында күренекле яҙыусыбыҙҙың наградалары, китаптары, ижад юлы тураһында мәғлүмәттәр сағылдырылды. Хәтер кисәһен музыкаль яҡтан биҙәүсе Данил Миңләхәт улына һәм Зилә Нуриман ҡыҙына ҙур рәхмәтебеҙҙе белдерәбеҙ.
 
“Мәңгелеккә ҡалды хәтерҙә” хәтер кисәһенән һуң, уҡытыусылар менән анализ яһаныҡ. Ғөмүмән алғанда, был сара һәр кемгә лә оҡшаны. Уҡытыусылар тарафынан төрлө кәңәштәр булды. Мәҫәлән, Баймаҡ ауыл хужалығы техникумында драма түңәрәге асыу. Был   студенттарҙа башҡорт халҡының тарихына, сәнғәтенә хөрмәт, һөйөү тойғоһо тәрбиәләйәсәк.
 
Й. Аҡбулатова, Баймаҡ ауыл хужалығы техникумының башҡорт теле уҡытыусыһы.      

 

Гәзит уҡыусы...

...теләй

Беҙ йыл да гәзит-журналдарға әүҙем яҙылабыҙ. “Һаҡмар”ға быйыл алданыраҡ яҙылып, квитанциябыҙҙы ла ебәрҙек. Гәзит беҙгә бик ныҡ оҡшай. Бар яңылыҡтар менән танышып, башҡа мәҡәләләрҙе лә ҡыҙыҡһынып уҡып барабыҙ. Һеҙгә ысын күңелдән уҡыусыларығыҙҙың күп булып, “Һаҡмар”ҙың тиражы артҡандан-арта барыуын теләйбеҙ.
 
Мырҙагилдиндар ғаиләһе.
Ниғәмәт ауылы.
 

...хәбәр итә

Мин “Һаҡмар” гәзитен бик яратам. Уны бала саҡтан уҡ, “Ҡыҙыл Баймаҡ” сағынан, уҡыйым. Атайым мәрхүм почтальон булды. Шул гәзиттәр аша, мәктәпкә бармаҫ элек үк, уҡырға өйрәндем. “Һаҡмар” – матур йөкмәткеле, аңлайышлы баҫма, тик тәнҡит мәҡәләләре бик һирәк күренә. Элек етешһеҙлектәр тураһында яҙылһа, шунда уҡ тикшерелә һәм һөҙөмтәләре киләһе һанда бирелә ине. Мин биш-алты баҫмаға яҙылам. Шулай ҙа иң тәүҙә “Һаҡмар”ҙы ҡулға алам.
 
Ғәйшә Аллабирҙина, мәғариф ветераны.
 

...рәхмәт әйтә

Бар мосолман донъяһы Ҡорбан ғәйетен билдәләгәндә, Аҡморонда ла байрам юғары кимәлдә үтте. Бының өсөн “Аҡморон” АХК-һы көр тана бүләк итте. Ауылыбыҙ ашханаһында был көндө етмешкә яҡын кеше йыйылды. Шулай уҡ биләмәгә ҡараған Мәмбәт, Аҡтау, Ҡаратал, Сәйғәфәр ауылдарында, халыҡ иҫәбенә ҡарап, ҡорбан ите таратылды. Ошондай изге байрамдар киләсәктә лә һәр ауылда матур һәм юғары кимәлдә үтһен ине.

Гөлназ АЗАМАТОВА,
ауыл биләмәһе башлығы.        
 
* * *
 
...Беҙ, Ишбирҙе ауылынан бер төркөм пенсионерҙар, йәмле Ирәндек тауы буйында ултырған өлкәндәр һәм инвалидтар дауаханаһында дауаланып ҡайттыҡ. Унда йәш һөйкөмлө табип Салауат Йыһангир улы Азаматов эшләй. Ул йәш булһа ла, шул тиклем ауырыуҙарҙы ентекләп ҡарай, кәңәштәрен бирә, дарыуҙарҙың кәрәклеһен генә яҙа. Артабан шәфҡәт туташтары шифалы ҡулдары менән кешеләрҙе дауалай. Был дауаханала дарыу-уколдар менән генә түгел, шифалы һүҙҙәр, матур мөғәмәлә менән дауалайҙар. Табиптар ҙа, шәфҡәт туташтары ла, бар хеҙмәткәрҙәр ҙә иғтибарлы, кешелекле-кеселекле булыуы менән айырылып тора. Шундай миһырбанлы кешеләрҙең барыһына ла ысын күңелдән оло рәхмәтебеҙҙе белдерәбеҙ.
 
Гөлсирә ВӘЛИЕВА. 

...әрней

Урамда көн дә осраған ташландыҡ бесәй балаларын күреп күңел әрней. Кешеләрҙең миһырбанһыҙлығы йөрәкте өтә. Моғайын, бик тырышҡанда, шул мәхлүктәргә хужа табып булыр ине. Юҡ, киреһенсә, күҙе лә асылмаған йән эйәләрен юлға сығарып ырғыталар. Һеҙ шул рәүешле балаларҙы ҡаты бәғерлеккә, шәфҡәтһеҙлеккә өйрәтеүегеҙҙе аңламайһығыҙмы? Кескәй генә балалар бесәйҙәрҙе йәлләһә, һыйпарға ынтылһа, ҙурыраҡтары уларҙы типкесләп китә бит. Хайуандарҙы өлкәндәр урамға сығарып ташлағас, бәләкәйҙәр уларҙы шулай интектерергә ярай, тип уйлап үҫә. Артабан бындай ҡанһыҙ балалар кешегә лә, хатта ата-әсәһенә лә ҡул күтәрәүе ихтимал бит.
 
Зәлиә ӘМИРОВА.

 Яңылыҡтар

Юл яҡшырған

 Аҡморон ауыл биләмәһе башлығы Г.М. Азаматова әйтеүенсә, Баймаҡ ДРСУ-һының көсө менән Ҡаратал –Аҡморон юлы ремонтланған. Ике ауыл халҡы ла ошондай яҡшы эште башҡарған ДРСУ хеҙмәткәрҙәренә бик тә рәхмәтле. “Ремонтланған юлдан йөрөүе лә еңел, күңелдәр ҙә тыныс”, – ти кешеләр.
 

Ишмырҙала...

 Ишмырҙала Ҡорбан ғәйете ауылдың имам-хатибы Әмирхан Абыҙгилдиндың намаҙға саҡырыуынан, артабан вәғәздәр һөйләүенән башланды. Унан халыҡ Ҡорбан ашына йыйылды. Байрамды үткәреүҙә “Байҡара” агрофирмаһы, ауыл биләмәһе, урындағы эшҡыуарҙар—аҡсалата, табын әҙерләүҙә Таңһылыу Һағынбаева, мәҙәниәт хеҙмәткәрҙәре ҙур әүҙемлек күрһәтте. Табынға килә алмаған ҡарттар, ғәрип балаларға аш-һыу йорттарына таратылды.
 

...Хәсәндә – байрам 

 Хәсән ауылында Ҡорбан ғәйетен үткәреүгә БДУСИ директоры З.Ғ. Йәрмөхәмәтов ҙур ярҙам күрһәтте. Ул тыуған ауылында иман йорто төҙөү өсөн дә күп көс һала. Мәсетте төҙөкләндереү, газ үткәреү һ.б. уйҙар менән янған, мосолман байрамдарына ҙур иғтибар биргән З.Ғ. Йәрмөхәмәтовҡа хәсәндәр бик тә рәхмәтле. 
 

Сәләмәт булғың килһә

 Ҡала бассейны һәм “Баһадир” физкультура-һауыҡтырыу комплексында кешеләргә һау-сәләмәт тормош алып барыу өсөн бар уңайлыҡтар булдырылған. Көнитмешен спортһыҙ күҙ алдына килтерә алмағандар өсөн махсус абонемент тәҡдим ителә. Уның буйынса бассейнға, тренажер залдарына йөрөү арзаныраҡҡа төшә. 
 

Күңелле саралар көтөлә

 Ноябрҙә ҡаланың предприятие-ойошмалары араһында КВН уйындары үтәсәк. Ул Баймаҡтың – 75 һәм ҡойоу-механика заводының 100 йыллығы айҡанлы үткәрелә. Күңелле сарала ҡатнашырға теләүселәр 1 ноябргә тиклем район хакимиәтенең йәштәр бүлегенә заявка бирергә тейеш. Белешмә өсөн телефон – 3-16-37. 
 Г. ИҪӘНГИЛДИНА.

Мәсет төҙөлә

 Мерәҫ мәсетенә нигеҙ һалырға һәм төҙөргә ярҙам иткән “Баймаҡ ПМК-һы” ЯСЙ-һы директоры Р.Р. Сырлыбаевҡа, МТС-тың Баймаҡ филиалы директоры А.Р. Хөсәйеновҡа, Баймаҡ урман хужалығы директоры Д.Д. Абдуллинға ауыл халҡы исеменән оло рәхмәтемде белдерәм. Уртаҡ көс, изге теләк-ниәт менән беҙҙең ауылда ла аҙан тауышы яңғырар.
 Хәмзә ХАФИЗОВ.

Ҡотлайбыҙ!

 Һаулыҡ һаҡлау өлкәһендәге оҙайлы фиҙаҡәр хеҙмәте өсөн һәм 60 йәше тулыу айҡанлы Баймаҡ үҙәк ҡала дауаханаһының баш врачы урынбаҫары Әбдрәхимов Шәүкәт Тәүфиҡ улы муниципаль район хакимиәтенең Почет грамотаһы менән бүләкләнде.

Республика Хөкүмәте аппаратында – яңы состав


 


Башҡортостан Республикаһы Президенты Р.З. Хәмитов “Башҡортостан Республикаһында башҡарма власть органдарын камиллаштырыу буйынса саралар тураһында”ғы Указға ҡул ҡуйҙы. Уға ярашлы, Башҡортостан Республикаһы Президенты Башҡортостан Республикаһы Хөкүмәте һәм Башкортостан Республикаһы Хөкүмәте ағзалары эшмәкәрлеге менән дә етәкселек итә.

Иман нурҙарын өләшкән тантана

 Баймөхәмәт хәҙрәт Ғиззәтуллин вәғәз һөйләй.
Мосолмандарҙың изге, төп байрамдарының береһе – Ҡорбан ғәйете район-ҡалала йыл һайын киң билдәләнә. Был матур көндө кешеләр ҡорбан сала, бер-береһен ҡунаҡҡа саҡыра, ярлы-фәҡирҙәргә ярҙам күрһәтә.

ХЕҘМӘТ ЯРЫШЫНДА ЕҢЕҮСЕЛӘР

“Баймаҡ” ҒПБ-һының бер төркөм хеҙмәт алдынғылары
 (уртала – предприятие директоры М.Б. Салихов).
 
 2012 йылдың урып-йыйыу эштәре һәм мал аҙығы әҙерләү буйынса район хеҙмәт ярышына йомғаҡ яһалды һәм унда түбәндәге хужалыҡтар еңеүселәр тип табылды:
  •  Ленин исемендәге АХК (рәйесе Ғ.Б. Сәлимов),
  •  “Баймаҡ” ғилми-производство берекмәһе (директоры М.Б. Салихов),
  •  “Рассвет” АХК-һы (рәйесе А.Б. Шәрипов),
  •  Октябрь ауылынан “Шәрәфетдинов” КФХ-һы (етәксеһе Шәрәфетдинов Айрат Алик улы),
  •  Сосновканан “Дилә” ЯСЙ-һы (етәксеһе Ғөбәйҙуллин Илдар Хәләф улы),
  •  Төркмәндән “Кәримов” КФХ-һы (етәксеһе Кәримов Мөҙәрис Йәноҙаҡ улы).
 Коллективтарға Диплом һәм аҡсалата премиялар тапшырылды.

 Ю.П. Моряков исемендәге приз “Рассвет” АХК-һының баш агрономы Рәсүлев Радик Ғәйнислам улына тапшырылды. Уға күсмә кубок һәм аҡсалата премия бирелде.

 Социалистик Хеҙмәт Геройы Риза Яхин исемендәге призға “Уңыш” АХК-һы механизаторы Нурдәүләтов Кинйәбай Хафиз улы лайыҡ булды.

 Көҙгө ер эшкәртеү айлығы йомғаҡтары буйынса
түбәндәге хужалыҡ етәкселәре Рәхмәт хаты һәм аҡсалата премиялар менән бүләкләнде:
  •  Сәлимов Ғәлим Булат улы – Ленин исемендәге АХК рәйесе,
  •  Салихов Марат Булат улы – “Баймаҡ” ҒПБ-һы директоры,
  •  Шәрипов Азат Булат улы – “Рассвет” АХК-һы рәйесе,
  •  Пономарев Александр Петрович – “Толпар” ЯСЙ-һы директоры,
  •  Трушин Николай Александрович – “Богачевка” ЯСЙ-һы директоры.

АВТОТРАНСПОРТ ХЕҘМӘТКӘРҘӘРЕ КӨНӨНӘ

Йырҙы-моңдо юлдаш иткән ғаилә


 Баймаҡ автотранспорт предприятиеһында Морапталовтар ғаиләһе айырым урын биләй. Уларҙы бер-береһенән айырып ҡына яҙыу мөмкин дә түгел. Һәр ғаилә ағзаһының яҙмышы был предприятие менән тығыҙ бәйле. Хужабикә Венера Ғиниәт ҡыҙы АТП-ла шәфҡәт туташы булып эшләй. Йорт хужаһы Шәфҡәт Ирғәле улы ла ошонда тиҫтә йылдар водитель булып эшләгәндән һуң, предприятиеның һынылыш осоронда ситкә эшкә сығып китергә мәжбүр була. Бөгөн ул «Башмедьстрой» ЯСЙ-һында водитель.
 
 Венера Ғиниәт ҡыҙы бала саҡта һайлаған һөнәренә тоғро ҡалған. Үҙ эшенең оҫтаһы ул. Рейсҡа сыҡҡан һәр водитель һәм кондукторға медицина күҙәтеүе үткәрә. Улар пассажирҙарҙың ғүмере өсөн яуаплы икәнен яҡшы аңлай. 
 Матур, татыу ғаиләлә дүрт бала тәрбиәләнә. Өлкән ҡыҙҙары Гөлназ “Башавтотранспорт” ДУП-ының Өфө автотранспорт предприятиеһында кассир булып эшләй. Гүзәлиә менән Айгөл, улдары Ирназар ҡаланың 1-се мәктәбенең алдынғы уҡыусылары. Төрлө олимпиадаларҙа, конкурстарҙа ҡатнашып еңеү яулап, ата-әсәһен ҡыуандырып ҡына торалар.
 
 Йыр-моңдо юлдаш иткән матур ғаилә – сәхнә йондоҙҙары ла. Шәфҡәт ағайҙың баянда, синтезаторҙа уйнағанын, Венера апайҙың моңло тауышы менән йырлағанын күптәр һоҡланып, яратып тыңлай. Морапталовтарҙың ғаилә сығышын Баймаҡ, күрше район һәм республика сәхнәләрендә йыш күрергә мөмкин. Районда даими уҙып килгән төрлө конкурстарҙа ла улар алдынғылыҡты бирмәй. Төрлө конкурс лауреаттары, дипломанттары. Яулаған уңыштарының кире ҡаҡҡыһыҙ дәлилдәре булған бихисап Почет грамоталары, Дипломдары өй түрен биҙәй. Шуларҙың береһе улар өсөн бигерәк тә ҡәҙерле: 2011 – Милләт-ара татыулыҡты нығытыу йылына арналған район конкурсында ҡатнашып, еңеү яулағандары өсөн муниципаль район хакимиәте тарафынан тапшырылған Почет грамотаһы.
 
 Морапталовтар бөгөн дә сәхнәлә. Улар 24 октябрҙә Учалы ҡалаһында Автотранспорт хеҙмәткәрҙәре көнөнә арналған төбәк-ара конкурста Баймаҡ АТП-һы намыҫын яҡлап сығыш яһаны. Төрлө һынауҙарҙы уңышлы үтеп, ғаилә 1-се урынды яуланы. Кисә Морапталовтар республика буйынса конкурста ҡатнашты.
 
 Венера Ғиниәт ҡыҙы уңған хужабикә лә. Ҡыҙҙары ла әсәһенә оҡшап уңған, егәрле. Ҡул эштәренә оҫта, бәйләргә яраталар. Ихатала ниндәй генә сәскәләр үҫмәй! Йорт-ҡуралары ла һәр саҡ бөхтә, йәмле. Был йортта шатлыҡ-ҡыуаныс мәңгелек ҡунаҡ.
 
 Йырҙы-моңдо юлдаш иткән Морапталовтар ғаиләһенә һүнмәҫ ижади ҡомар, ғаилә именлеге, бәхет теләйбеҙ.

 Л. РАЗГИЛЕВА.
 Автор фотоһы.
 

Хеҙмәттәренән халыҡ ҡәнәғәт


  Районда Урал Хунафиндың исеме яҡшы таныш. Ул пассажирҙарҙы хеҙмәтләндереү өлкәһендә 2008 йылдан алып яҡшы ғына уңыштарға өлгәшкән һәм тәжрибә туплаған эшҡыуар. 

ИҒТИБАР: ФЕДЕРАЛЬ КОНКУРС!

Конкурста ҡатнашығыҙ

 
 Моноҡалаларға ярҙам күрһәтеү сиктәрендә Рәсәй Федерацияһы Төбәкте үҫтереү министрлығы, Рәсәй Федерацияһы Хөкүмәтенең 2011 йылдың 10 авгусында донъя күргән күрһәтмәһе буйынса “Төбәк – тотороҡло үҫеш” федераль проект-инвестиция конкурсын уҙғарыу тураһында иғлан итә. Конкурс “Рәсәй Һаҡлыҡ банкы” ААЙ-һы, Рәсәй сәнәғәтселәре һәм эшҡыуарҙары союзы һәм башҡа ойошмалар тарафынан ойошторола. Конкурста торлаҡ-коммуналь хужалыҡ, һыу-канализация хужалыҡтары, инфраструктура объекттары төҙөлөшө, ауыл хужалығы, сәнәғәт, ҡаты көнкүреш ҡалдыҡтарын эшкәртеү өлкәһендәге проекттарҙы тормошҡа ашырыу буйынса эшләгән компаниялар ҡатнаша ала.

Пай еренә аҙ түләйҙәр...

Быйылғы шарттарҙа был насар түгел

 
 “Һеҙгә Урғаҙа ауылынан пенсионерҙар ғаиләһе – Буранбаевтар мөрәжәғәт итә. Һеҙгә үкенесле лә, үтенесле лә хат яҙырға булдыҡ. Беҙ икебеҙ ҙә 2 йыл инде пай еребеҙҙе фермерҙар Илдус Ҡадыров менән Сынтимер Ибраһимовҡа ышаныс менән биргәйнек. Был егеттәр бигерәк әрһеҙләшеп киттеләр – һәр пай өсөн 3-әр центнер иген бирергә булдылар. Беҙ быға бер ҙә риза түгелбеҙ. Мал, ҡош-ҡорт көтәбеҙ, ә ашлыҡты һатып алырға тейешбеҙ. 
 Һуңғы осорҙа халыҡтың эскелеккә һабышыуы хафаға һала. Күптәр төшөнкөлөккә бирелеп, донъяһын да йүнләп көтмәй, малдарын да татарҙарға һатып бөттө. Был хәлгә кем сик ҡуйыр?

 
 Был хатҡа рәсми яуап алыу өсөн беҙ муниципаль район хакимиәтенең ауыл хужалығы бүлегенә һәм Йылайыр ауыл биләмәһе хакимиәтенә мөрәжәғәт иттек. Улар бына нимә тип яуап бирҙе: 
 – Пайға килгәндә, уның хужаһы ерен кемгә биреү-бирмәүҙе үҙе хәл итә. Әгәр ҙә Буранбаевтар атап үтелгән фермерҙар ҡуйған хаҡ менән риза түгел икән, алдағы йыл улар пайын икенсе кешегә эшкәртеүгә бирә ала. Ә барыһы ла алдан төҙөлгән килешеү нигеҙендә башҡарылырға тейеш. Быйылғы йылдың ҡоролоғон иҫәпкә алғанда, һәр пай өсөн 3 центнер иген бер ҙә насар түгел, киреһенсә, бик һәйбәт.

 “Икенсе мәсьәләгә килгәндә, һәр кем үҙ донъяһын үҙе төҙөй, электән эсеү менән мауыҡҡан бер үк кешеләр һаман да шуның менән булыша, – шулай тип яуап бирҙеләр урындағы ауыл биләмәһендә. – Беҙҙә, мәҫәлән, эшһеҙлек көслө тип әйтмәҫ инек. Урындағы хужалыҡта ла, МТС бүлексәһендә лә, фермерҙарҙа ла эшләргә була. Тырыштар электән аҡсаһын да тапты, донъяһын да көттө. Ғөмүмән, һәр нәмә кешенең үҙенән тора. Шуға ынтылайыҡ, киләсәгебеҙҙе үҙебеҙ төҙөйөк”.