30 янв. 2012 г.

Яңылыҡтар

Афарин, Альбина!

Күптән түгел Мәскәү ҡалаһының “Ингосстрах” үҙәк офисында студенттарҙың эштәре буйынса В.И. Щербаков исемендәге конкурсҡа йомғаҡ яһалды. Быйыл унда Мәскәү, Әстерхан, Өфө, Дондағы Ростов, Саранск һәм башҡа ҡалаларҙың 16 алдынғы юғары уҡыу йортонан 42 студент ҡатнашты. Был мәртәбәле конкурста Башҡорт дәүләт аграр университетының өсөнсө курсында белем алыусы яҡташыбыҙ, Аҡморон ауылы ҡыҙы Альбина Ҡунысбаева икенсе урынға, иҫтәлекле бүләккә һәм 30 мең һум күләмендәге аҡсалата премияға лайыҡ булды. Уны был оло еңеүе менән ысын күңелдән ҡотлайбыҙ һәм артабан да уҡыуында уңыштар теләйбеҙ. 
Айгөл Иҙелбаева.

Серле клиент”

Рәсәй почтаһы” дәүләт унитар предприятиеһы ситтәге маркетинг хеҙмәттәре менән килешеү төҙөп, үҙенең ҡул аҫтындағы предприятие хеҙмәткәрҙәренең эшмәкәрлеген баһалай. Маркетинг хеҙмәте вәкилдәре почта бүлексәләренә клиент булараҡ мөрәжәғәт итә һәм шул ваҡытта почта бүлексәһе хеҙмәткәрен өс критерий буйынса тикшерә: компетентлылығына, тышҡы ҡиәфәтенә, кешеләр менән мөғәмәләһенә баһа бирә. Әлеге ваҡытта беҙҙең ҡала почта бүлексәләрендә “серле клиенттар” булып киткән дә инде, улар район буйынса ла йөрөйәсәк.
C. Кейекбирҙина.

Һыуыҡтар буласаҡ әле

Башинформ” агентлығы белдереүенсә, киләһе аҙнала республикала һалҡын буласаҡ. Дүшәмбегә тиклем һыуыҡтар көтөлмәй, аҙна уртаһында иһә һауа температураһының -40 градусҡа тиклем төшөүе күҙаллана.

Буласаҡ һалдаттар өсөн

25 ғинуарҙан 25 февралгә тиклем район мәғариф учреждениеларында хәрби-патриотик тәрбиә айлығы үткәреләсәк. Мәктәптәрҙә, зоналарҙа “Йәгеҙ әле, егеттәр!” ярышы, винтовканан атыу, “Зарница” һымаҡ спорт саралары, ветерандар, хәрби хәрәкәттәрҙә ҡатнашыусылар менән осрашыуҙар, уларға шефлыҡ ярҙамы ҡаралған.
А. Ишназаров.

Түңәрәк өҫтәл” үтте

Ошо көндәрҙә 105-се профессиональ лицейҙың китапханаһында уҡыу йортонда белем алған егеттәр ҡатнашлығында “түңәрәк өҫтәл” уҙғарылды. Унда “Хәҙерге заман йәштәренең проблемалары, перспективалары”, “Үҙемдең буласаҡ ғаиләмде нисек күҙ алдына килтерәм” тигән темалар ҡаралды. Бындай сара лицейҙа артабан да үткәреләсәк.
З. Сапарова, йәштәр бүлеге белгесе.

Һайлау – 2012

Һайлау агитацияһы башлана

Муниципаль район хакимиәтендә Баймаҡ ҡалаһы ҡала биләмәһе Советына депутатлыҡҡа кандидаттар менән осрашыу үтте.
4 февралдән 3 мартҡа тиклем депутатлыҡҡа кандидаттар өсөн үтә лә мөһим осор – әүҙем агитация ваҡыты, – тине район Советы секретары Р.З. Ишбулатов. – “Рәсәй Федерацияһы граждандарының һайлауға хоҡуҡтарының төп гарантиялары һәм референдумда ҡатнашыуға хоҡуҡтары тураһында”ғы Федераль Закон һәм Башҡортостан Республикаһының Һайлауҙар тураһындағы Кодексында депутатлыҡҡа кандидаттарҙың хоҡуҡтары теркәлгән һәм уларҙың теүәл үтәлешен территориаль һайлау комиссияһы менән участка һайлау комиссиялары контролдә тотасаҡ.
Депутатлыҡҡа кандидаттар килешеү нигеҙендә 4 февралдән үҙҙәренең биләгән вазифаларынан ваҡытлыса бушатыла ала. Улар шулай уҡ үҙҙәренә биш ярҙамсы йәлеп итергә хоҡуҡлы. Кандидаттарға үҙ һайлау округы һайлаусылары менән осрашыуҙар үткәрергә мөмкин.
Лилиә ТАКАЕВА.

Хеҙмәт ярышында еңеүселәр

 
А.С. Сафин етәкләгән “Уңыш” АХК-һы – райондың ҡеүәтле ауыл хужалығы предприятиеларының береһе. Кооператив былтыр урып-йыйыу эштәре, мал аҙығы әҙерләү, орлоҡ һәм фураж һалыу йомғаҡтары буйынса район хеҙмәт ярышында еңеү яулағайны. Әле хужалыҡ мал ҡышлатыуҙы уңышлы алып бара, яҙғы баҫыу эштәренә әҙерләнә.
Үткән йыл йомғаҡтарына арналған тантаналы йыйылышта ла кооператив малсылыҡ продукцияһын етештереүҙә яҡшы күрһәткестәргә өлгәшкәне өсөн III дәрәжә Дипломға лайыҡ булды.
Г. Мирзина фотоһы.




Иң-иңдәр тәбрикләнде

Сәнәғәт предприятиелары араһында “Һөнәре буйынса иң яҡшыһы” исеменә, чемпион таҫмаһына һәм аҡсалата премияға түбәндәге хеҙмәткәрҙәр лайыҡ булды:
Фролова Татьяна Николаевна – “Йылылыҡ селтәре” ЯСЙ-һының ҡаҙанлыҡ ҡулайламалары операторы,
Әфләтунов Айнур Шәфҡәт улы – “Йылылыҡ селтәре” ЯСЙ-һының ҡаҙанлыҡ ҡулайламалары операторы,
Хренов Дмитрий Иванович – “Баймаҡ” ҡулланыусылар йәмғиәте водителе,
Бабошкин Сергей Михайлович – “Водоканал” ЯСЙ-һының һыу алыу ҡоролмаһы участкаһы мастеры,
Харламов Фәнил Сазит улы – “Баймаҡ урманы” ДУП-ының урман ҡырҡыусыһы,
Пуликов Геннадий Иванович – “Баймаҡ ҡатнаш аҙыҡ комбинаты” ЯСЙ-һы машинисы,
Сәйетҡолов Илгиз Дамир улы – “Баймаҡ ҡойоу-механика заводы” ААЙ-һының обрубщигы,
Кәримов Илдус Риф улы – “Һаҡмар леспромхозы” ЯСЙ-һы механигы,
Юлдашбаева Рәсимә Һөйөндөк ҡыҙы – “БИП Комфорт-Плюс” ЯСЙ-һы бухгалтеры,
Айытбаев Фидан Ғилман улы – “БИП Комфорт-Плюс” ЯСЙ-һы станоксыһы,
Ғәлина Лилиә Мөҙәрис ҡыҙы – статистика бүлегенең баш белгесе,
Әминева Фәниә Ғәлимйән ҡыҙы – “Һаҡмар” редакция-нәшриәт комплексы ДУП-ының китап төпләүсеһе,
Әҙеһәмов Ришат Фидай улы – “Баймаҡ урмансылығы” ДБУ-һының участка лесничийы,
Иванов Владимир Леонидович – “Баймаҡ ауыл хужалығы ҡулланыусылар кооперативы” водителе.
Сауҙа һәм йәмәғәт туҡланыу урындары, бәләкәй һәм урта эшҡыуарлыҡ тармаҡтары араһында:
Гераськина Галина Геннадьевна – “Баймаҡ ҡойоу-механика заводы” ААЙ-һы ашнаҡсыһы,
Сафронова Надежда Васильевна – “Баймаҡ икмәк заводы” ААЙ-һы икмәк бешереүсеһе,
Иҫәнбаев Нәзир Нәбиулла улы – “Шөгөр М+” ЯСЙ-һы ваҡлаусыһы,
Янбулатов Самат Зиннәт улы – “Р.М. Солтанов” шәхси предприятиеһы рамсыһы,
Ҡыуатова Фәниә Тәүфиҡ ҡыҙы – “Ф.Т. Ҡыуатова” шәхси предприятиеһының сауҙа буйынса менеджеры,
Буранова Гөлдәр Кинйәбай ҡыҙы – “Г.Х. Ибраһимова” шәхси предприятиеһының “Гөлназ” магазины һатыусыһы,
Хөсәйенова Рәшиҙә Фәрғәт ҡыҙы – “З.В. Минаева” шәхси предприятиеһының “Хыял” магазины һатыусы-кассиры,
Сөләймәнова Наталья Васильевна – “Г.Д. Давыдова” шәхси предприятиеһының “Идея” магазины һатыусыһы,
Тулыбаев Ринат Ришат улы – “Р.Ф. Ирназаров” шәхси предприятиеһы водителе,
Төхвәтуллин Айрат Булат улы – “Р.Ф. Ирназаров” шәхси предприятиеһы пилорамсыһы,
Ҡарасурин Ноғман Ғәлимйән улы – “А.А. Филин” шәхси предприятиеһы тракторсыһы,
Епифанов Сергей Викторович – “В.Д. Епифанов” шәхси предприятиеһының етәксе урынбаҫары.

Ауыл хужалығы



Тынысланырға урын юҡ

Районда мал ҡышлатыу миҙгеле дауам итә. Көндәлек тулайым һауым 173 центнер тәшкил итә, был 5 центнерға күберәк. Көндәлек тулайым һауым буйынса Ленин исемендәге АХК алдынғылыҡты бирмәй – 50 центнер етештерә, был уҙған осорға ҡарағанда 4,5 центнерға күберәк. “Уңыш” (24 ц), “Рассвет” (17,1 ц), “Баймаҡ” ҒПБ-һы (17 ц), “Байҡара” (16,5 ц), Салауат исемендәге (11,3 ц) хужалыҡтарҙа ла продукция алыу кимәле юғары. Көндәлек уртаса һауым буйынса ла ошо уҡ хужалыҡтар үҫешкә өлгәшә. Һөттөң тауарлылығы “Урал”, Ленин исемендәге, “Рассвет”, “Аҡморон”, “Байҡара”, ҡуйылығы “Рассвет”, “Байҡара”, Ленин исемендәге хужалыҡтарҙа иң юғарыһы. Йыл башынан 365 быҙау алынған. Был эш “Уңыш”, Ленин исемендәге, Салауат исемендәге, “Байҡара” хужалыҡтарында яҡшы ойошторолған.
Малды яһалма ҡасырыу эше менән “Рассвет”, “Уңыш”, Ленин исемендәге, “Байҡара”, “Октябрь” хужалыҡтарында әүҙем шөғөлләнәләр.
Яҙғы баҫыу эштәренә лә күп ваҡыт ҡалманы. Бөгөн орлоҡ фондын, техника-ауыл хужалығы машиналарын сәсеүгә әҙерләү эштәре дауам итә. Һалынған 13377 тонна орлоҡтоң 5954 тоннаһы таҙартылған, был 44 процент тәшкил итә. “Октябрь”, “Урал”, Салауат исемендәге, “Рассвет”, Ленин исемендәге, “Таналыҡ” хужалыҡтары, “Толпар” ЯСЙ-һы был эште тамамланы. Ләкин шул уҡ “Новатор-Баймаҡ”, “Йылайыр”, “Байҡара”, “Богачевка” хужалыҡтарында был мәсьәләгә битарафлыҡ күрһәтәләр. “Уңыш” АХК-һына, “Баймаҡ” ҒПБ-һына һәм урындағы МТС-ҡа ла был тәңгәлдә эште әүҙемләштерергә кәрәк.
Райондың ауыл хужалығы тармағы конвейеры тотороҡло эшләй, шулай ҙа тынысланырға урын юҡ. Малсылыҡ продукцияһы етештереүҙе арттырыу, быҙау алыу һәм уларҙы тәрбиәләүҙе тейешле контролдә тотоу, яҙғы баҫыу эштәренә әҙерлекте әүҙемләштереү өҫтөндә эшләйһе бар әле.
А. Салауатов.

Рәсми бүлек

Эш ваҡыты нормаһы тураһында

Башҡортостан Республикаһының Хеҙмәт һәм халыҡты социаль яҡлау министрлығы хәбәр итеүенсә, Рәсәй Федерацияһы Хеҙмәт кодексының 112-се статьяһына, “Башҡортостан Республикаһында байрам һәм иҫтәлекле көндәр тураһында”ғы БР Законына, 2011 йылдың 12 сентябрендәге Башҡортостан Республикаһы Хөкүмәте ҡарарына ярашлы, 2012 йылда республика биләмәһендә түбәндәге көндәр ял һәм байрам көндәре тип билдәләнә:
  • 23 февраль – Ватан һаҡсылары көнө;
  • 8 март – Халыҡ-ара ҡатын-ҡыҙҙар көнө;
  • 1 май – Яҙ һәм Хеҙмәт байрамы;
  • 9 май – Еңеү көнө;
  • 12 июнь – Рәсәй көнө;
  • 19 август – Ураҙа байрамы;
  • 11 октябрь – Республика көнө – Башҡорт Совет Социалистик Республикаһының дәүләт суверенитеты тураһындағы Декларация ҡабул ителгән көн;
  • 25 октябрь – Ҡорбан байрамы;
  • 4 ноябрь – Халыҡтар берҙәмлеге көнө.
Билдәләнгән календарь осорға эш ваҡыты нормаһын иҫәпләү тәртибенә ярашлы, эш ваҡыты нормаһы биш көнлөк эш аҙнаһынан, ике көн ялдан (шәмбе, йәкшәмбе) тора, тип билдәләнде. Ул көндәлек эш сменаһының оҙайлығынан сығып иҫәпләнә:
40 сәғәтлек эш аҙнаһында – 8-әр сәғәт тура килә;
эш аҙнаһы эш сәғәтенән кәмерәк булһа, эш сәғәте һаны биш эш көнөнә бүленә.
Рәсәй Федерацияһы Хеҙмәт кодексының 95-се статьяһына ярашлы, эш көнө йәки смена оҙайлығы байрам алды көндәрендә бер сәғәткә ҡыҫҡартыла. Әгәр байрамдан алда ял көнө тура килһә, ул эш көнө оҙайлығына йоғонто яһамай.
2012 йылда ике көнлөк ялы булған 246 эш көнө буласаҡ, шул иҫәптән 8 ҡыҫҡартылған эш көнө (22 февраль, 7 март, 28 апрель, 8 май, 9 июнь, 10 һәм 24 октябрь, 29 декабрь) һәм 120 ял көнө, шул иҫәптән 15 көн байрамда ял итәсәкбеҙ. Бынан тыш өҫтәмә ялға 4 көн бирелә: 6 һәм 9 ғинуар, 20 август, 5 ноябрь. Был 1 һәм 7 ғинуарҙың, 19 августың, 4 ноябрҙең ял көндәренә тура килеүенә бәйле.
Ә. Билалова,
хеҙмәт һәм халыҡты социаль яҡлау
идаралығы бүлегенең әйҙәүсе белгесе.

Сәйәсәт

Владимир Путин: “Тотороҡлолоҡ – ул туҡтап ҡалыу түгел, ә алға хәрәкәт итеү”

РФ Хөкүмәте Премьер-министры, Рәсәй Президенты
вазифаһына кандидат Владимир Путин киң мәғлүмәт саралары һәм Интернет селтәре аша заманыбыҙҙың иң киҫкен мәсьәләләренә ҡарата мөнәсәбәтен белдерҙе. Ул үҙенең тәүге программа мәҡәләһен “Рәсәй туплана – беҙ яуап бирергә тейеш саҡырыуҙар” тип атаны.

Гәзит уҡыусыларыбыҙ иғтибарына уның сығышынан өҙөк килтермәксебеҙ:
4 мартта Рәсәй граждандары һайлау участкаларына килеп, ил башлығын һайлаясаҡ. Әлеге ваҡытта илдә төрлө дискуссиялар бара. Бер нисә һорау буйынса үҙемдең позициямды белдереп үткем килә. Рәсәйгә ниндәй хәүеф һәм бурыстар янай? Глобаль иҡтисадта һәм сәйәсәттә ниндәй урын биләйәсәкбеҙ? Уйын ҡағиҙәләрен барлыҡҡа килтереүҙә ҡатнашасаҡбыҙмы, әллә ваҡиғалар ағышына ҡушылып китербеҙме? Ниндәй ресурстарға таянып үҙебеҙҙең позицияларыбыҙҙы нығытасаҡбыҙ һәм тотороҡло үҫеште тәьмин итәсәкбеҙ?

Һорау – яуап

Эш хаҡы түләмәһәләр...

Гәзит уҡыусыларыбыҙҙың сираттағы һорауҙарына район прокурорының өлкән ярҙамсыһы И.З. Рәхмәтуллин яуап бирә.
Беҙҙең предприятиела бер нисә ай эш хаҡы түләмәйҙәр. Ҡайҙа мөрәжәғәт итергә икән?
Эш хаҡы түләнмәгән осраҡта граждандар прокуратураға йәки судҡа мөрәжәғәт итә ала. Шуны ла билдәләп үтергә кәрәк: әгәр етәкселәр хеҙмәткәрҙәренә эш хаҡын ваҡытында түләмәһә, РФ Административ хоҡуҡ боҙоуҙар кодексы буйынса яуапҡа тарттырыла. Уның буйынса штраф, ойошма-предприятиеның эшмәкәрлеген 90 тәүлеккә тиклем туҡтатыу ҡаралған.
Минән бағыусылыҡ ярҙамы күрһәтеүҙе талап итәләр...
Рәсәй Федерацияһында бағыусылыҡ ярҙамы ирекле рәүештә генә күрһәтелә. Әгәр был мәжбүри талап булһа, һеҙ прокуратураға мөрәжәғәт итә алаһығыҙ. РФ Енәйәт кодексы буйынса бағыусылыҡты талап иткән етәкселәргә ҡарата коррупцияға бәйле енәйәт эштәре ҡуҙғатыласаҡ.
Бурысҡа аҡса биреп торғайным, хәҙер кире ала алмайым. Миңә нимә эшләргә?
Әгәр һеҙҙең аҡса биреп тороуығыҙ нотариус аша йәки ирекле форма менән ҡағыҙға теркәлгән булһа, һеҙ судҡа мөрәжәғәт итә алаһығыҙ. Бәхәс килеп тыуған осраҡта, тейешле документтарҙы әҙерләп, дәғүә ғаризаһы яҙырға кәрәк буласаҡ.
Йәйгеһен юл ситендәге үләнде сабырға мәжбүр итәләр...
РФ Конституцияһының 37-се статьяһына ярашлы, илебеҙҙә мәжбүри хеҙмәт тыйылған. Шуға күрә хеҙмәткәрҙәр һәм уҡыусылар ижтимағи файҙалы хеҙмәткә ирекле рәүештә генә йәлеп ителеүе мөмкин.

Яҡты рухы күңелебеҙҙә...

Икенсе Этҡол ауылының беҙ йәшәгән урам осонан мәктәпкә ҡәҙәр бер саҡрым араның уртаһында урынлашҡан почта бүлексәһенә уҡыуҙан һуң һуғылмай ҡайтҡан бер бала ла булмағандыр. Әсе елле көҙ, ажғыр буранлы ҡыш, ямғырлы яҙ көндәрендә уҡыусы балалар туптырлашып почтаға инеп йылынып, хәл алып сыға инек. Изге йәнле Люциә еңгәйҙең бер ваҡытта ла, иҙәнде тапайһығыҙ, эшләргә ҡамасаулайһығыҙ, тигәнерәк ризаһыҙлыҡ белдергәнен ишетмәнем, киреһенсә, ауыҙ-мороно өшөп йә еүешләнеп килеп ингән балаларҙы, үҙ балалары кеүек күреп йәлләп, мейес эргәһенәрәк саҡырып, тиҙерәк йылындырыуҙы хәстәрләне. 

Бөтәһе менән дә ҡыҙыҡһыныусан балаларға телефон аппаратының нисек эшләгәнен аңлата, хатта трубкаһын ҡолаҡҡа терәп тылсымлы “алло, алло” һүҙҙәрен ҡысҡырып ҡарарға ла рөхсәт итә, сағыу һүрәтле конверт, открыткаларҙы күрһәтә торғайны. Шул арала балаларҙың нисек уҡыуҙары, ниндәй билдәләр алыуҙарын һорашып, ата-әсәләренең хәл-әхүәлдәрен белешеп, уларға сәләм-теләктәр әйтергә өлгөрөп, йылы һүҙҙәре менән дәртләндереп оҙатып ҡала ине. Һәр ваҡыт барыһына ла мөләйем йөҙлө Люциә еңгәйҙең почтаға ингән кешеләр менән аралашҡанын күҙәтеп, һөйләшкәндәрен тыңлап, өлкәндәрҙең үҙ хеҙмәттәрен атҡарыуҙағы тырышлыҡтары, бер-береһенә ихтирамлы, илтифатлы мөғәмәлә, мөнәсәбәттәренән фәһем алдыҡ, тормош тәжрибәһе тупланыҡ, ҡыҫҡа ғына ваҡыт эсендә бәләкәй генә, ләкин тос һабаҡ алдыҡ. Люциә Хәйбулла ҡыҙы ауылдаштарының береһенең дә тормошона битараф булмағандыр, сөнки ул һәр баланың ата-әсәһен, ағай-апайҙарын исемләп белә торғайны. Үҙе күп балалы ғаиләлә үҫкән аҡыллы, тәрбиәле әсә үҙ балаларына ғына түгел, башҡаларға ла һөйкөмлө, йомшаҡ күңелле яҡын кеше булды.
Ауыл кешеләренең барыһы ла радио тыңлап, телевизор ҡарау мөмкинлегенә эйә булғанға тиклем почта бүлексәһе тышҡы тормош менән берҙән-бер бәйләнеш урыны ине. Ул тирәнән өлкәндәр ҙә почтаға һуғылмай, хәл-әхүәлен һөйләп, донъя хәлдәрен белешмәй үтмәгәндер. Уның етәксеһенең халыҡ араһында абруйлы булыуы шунан күренә. Әгәр берәйһе: “Люциә килен әйтте әле...”, – тип берәй яңылыҡ һөйләһә, бөтәһе лә иғтибар менән тыңлап, етди фекер, тоғро мәғлүмәт булыуына һис тә шикләнмәнеләр.

Рейд

Аҡылыңды томалама – ҡыш аямаҫ!

Ҡыш үҙенең ажарлығын күрһәтеп, термометр уҡтары 30 градус һыуыҡҡа яҡынлашҡан кистә беҙ – Баймаҡ эске эштәр бүлегенең участка уполномоченныйы Айҙар Яҡшығолов, балиғ булмағандар эше буйынса бүлек инспекторы Айнур Абдуллин, муниципаль район хакимиәтенең балаларҙың хоҡуғын яҡлау буйынса сектор мөдире Зинера Шаһиева һәм Баймаҡ телевидениеһы хеҙмәткәрҙәре – рейдҡа йүнәлдек. Маҡсатыбыҙ – насар йәшәгән, ата-әсәһе эскелеккә һабышҡан балаларҙың йәшәйешен ҡарау.

Йоҡлама – туңаһың!

Тәү сиратта, бар ҡалаға билдәле Юбилей урамы, 17-се йортта урынлашҡан ятаҡҡа индек. Шунда уҡ ишек төбөндә лаяҡыл иҫерек йәш егет иғтибарыбыҙҙы йәлеп итте. Ул һөйләшә алырлыҡ хәлдә түгел ине. Вахтала ултырған апай: “Бына нимә эшләтергә лә белмәйем, бында ултырһа туңып үлә бит. Әйткәнде аңларлыҡ хәлдә түгел, бигерәк ныҡ иҫерек”, – тине. 
 
Туңып барған егетте уятып маташҡанда, яныбыҙҙағы ишек асылып китеп, хәмер йоғонтоһонда “батырға” әүерелгән йәш ир килеп сыҡты. Ул шунда уҡ беҙгә ҡысҡыра-аҡыра башланы. “Һеҙҙең ни эшегеҙ бар, кем нисек теләй – шулай йәшәй. Теймәгеҙ егеткә! Ул һеҙгә ҡамасаулаймы ни? Башҡа милләт кешеһе ултырһа, моғайын, һеҙ уға тейергә ҡурҡыр инегеҙ!” Иҫерек кешенең һүгенеү, әшәке һүҙҙәренә иғтибар итмәҫкә тырышып, йәш егетте уятырға маташабыҙ. Тик ҡыҙмаса булып алған “герой” беҙҙең өндәшмәүебеҙҙе ҡурҡыу менән бутап, уның һайын шаша башланы. Участка полицейскийының уға хулиганлыҡ өсөн протокол төҙөләсәге тураһында иҫкәртеүен ишеткәс, ҡатыны ирен һөйрәкләп индереп алып китте.
Эйе, хәмер йоғонтоһонда милләт исеменән генә түгел, ә бар кешелек исеменән дә оран һалып булалыр. Тик ошо ятаҡ тупһаһында туңып үлеп барған йәш егетте ниңәлер бер кем дә ҡотҡарырға ашыҡмаған. Был көндө рейд булмаһа, егеттең өшөп үләсәге көн кеүек асыҡ бит.
Ятаҡтың тәүге ҡатында тәмәке көйрәткән ҡатындарға тап булдыҡ. Береһе беҙҙе күреү менән бер яҡ ҡулын ҡосаҡлап, шымып ҡалды. Башланып ҡына торған мәжлескә көмөшкә алып килгән икән. Эсемлекте кемдән алыуын һорағас, “Билдәле инде, “Веселый дом”дан! Барығыҙ ҙа ҡарағыҙ, һәр фатирҙа һаталар”, – тип кенә ҡуйҙы.
А.Яҡшығолов тарафынан бүлмәләге янғын хәүефһеҙлеге, паспорт режимы тикшерелде.

Атай – иҙәндә, әсәй – ҡунаҡта...

Өсөнсө ҡатта ҡарауһыҙ йөрөгән бала иғтибарҙы йәлеп итте. Уның ҡайҙа йәшәүен һораша башлағас, бер бүлмәгә алып килде. Уныһының ишеге асыҡ, иҙәндә иҫерек атаһы йоҡлап ята. Әсә кеше лә ваҡытын “бушҡа” әрәм итмәй, икенсе бүлмәлә ҡунаҡ булып ултырған булып сыҡты. Бүлмәлә бала өсөн бер ниндәй аҙыҡ-түлек, уйынсыҡтар юҡ. Был ғаилә балиғ булмағандар эше буйынса комиссияла теркәүҙә лә тора икән. 
 
Киләһе ҡатта 3-4 йәш тирәһендәге малай һәм ҡыҙыҡай йүгереп йөрөй ине. Боҙҙай һыуыҡ иҙәндә берәүһенең ойоҡсан ғына йөрөүен күреп, аптырап ҡалдыҡ. Ҡайҙа йәшәгәндәрен һораша башлағас, бер бүлмә ишеге асылып китте. Ундағы өлкән йәштәрҙәге ир балаларҙы үгәй ҡыҙы ҡалдырыуын белдерҙе. Уның бүлмәһендә лә балалар өсөн ашарға бер ни ҙә булмауын күреп, “бала ҡараусыға” был хаҡта әйткәс, “Уларҙы мин ҡарамайым – апалары ҡарай”, – тине. Тик ул күрһәткән бүлмә бикле булып сыҡты. Оҙайлы ваҡыт шаҡығандан һуң, унан иҫерек ир килеп сығып, беҙҙе әрләй башланы. Кескәйҙәрҙе алып ҡалған ҡатыны, малай һәм ҡыҙыҡайҙы ул түгел, ә үгәй ҡартатай ҡарарға тейешлеген белдерҙе. Шулай итеп, төнгө ун бер тулып килгәндә, күптән йоҡларға тейешле балалар иҫеректәр тулы ятаҡта яңғыҙы тороп ҡалған булып сыҡты. Айнур Абдуллин тиҙ арала кескәйҙәрҙең әсәһен күреү кәрәклеген белдерҙе.

Риэлтор ҡорбаны

Йәш әсә Чекмарев урамы, 10-сы йортта урынлашҡан ятаҡта йәшәгән булып сыҡты. Ҡағыҙҙарға күмелеп ултырған әсәнең бүлмәһе йыйнаҡ, йылы, балалары өсөн уйынсыҡтары теҙеп ҡуйылған. Әсәнән ни өсөн кескәйҙәрен ҡурҡмайынса шундай ҡот осмалы шарттарҙа ҡалдырыуын һораша башлағас, илап ебәрҙе. “Мин нимә эшләргә тейеш? Отчет яҙырға кәрәк, ә улар менән булмай – ҡамасаулайҙар. Ярҙамлашырға әсәйем дә юҡ. Аталары алимент түләмәй. Әгәр һеҙ мине телевизорҙан күрһәтһәгеҙ, эшһеҙ ҙә ҡаласаҡмын! Унда инде балаларымды тыныс күңел менән етем итә алаһығыҙ!” – тине.
Йәш ҡатындың проблемалары бының менән генә бөтмәгән икән. Ошо кескәй генә бүлмәне ул риэлтор аша әсәлек капиталына алған булып сыҡты. Уға “ярҙам” күрһәткән риэлтор 70 мең һум аҡса бирергә тейеш икән, тик ул юҡҡа сыҡҡан. Һатып алған бүлмәһенең документтары лә теүәл түгел, аҡса ла елгә осҡан. 
 
Гәзит аша күпме генә иҫкәртеүебеҙгә ҡарамаҫтан, ҡатындарҙың риэлторҙар тоҙағына эләгеүе борсоуға һала. Кескәйҙәрен хәүефле ерҙә ҡалдырып, эшенә йәбешеп ятҡан йәш ҡатын әсәлек капиталына бүлмә түгел, ә бәләкәй йорт алыуы ихтимал ине бит. Тик еңел юл эҙләргә түгел, ә үҙенә йүгерергә, тырышырға кәрәк булған. Ул осраҡта балаларҙы ла ҡайҙалыр ҡалдырып йөрөргә кәрәкмәҫ ине. Ә хәҙер ике балалы әсәне бүлмәнән ҡыуып сығарыуҙары ла ихтимал, сөнки риэлтор аҡсаһын ғына түгел, ә тейешле документтарын да бирмәгән. Вайымһыҙ, бер ҡатлы ҡатындар бар саҡта, уларҙы алдаусылар ҙа буласаҡ. Бәлки, район кимәлендә ошо риэлторҙарға ҡаршы ниндәйҙер сара күрелер? Юғиһә, улар әсәлек капиталы булған бар ҡатындарҙы талап бөтмәйенсә, тынысланмаясаҡ. Әйткәндәй, риэлторҙарҙан алданған ҡатындар милиция, прокуратура, судҡа мөрәжәғәт итергә ҡурҡмаһындар ине. РФ Енәйәт кодексы буйынса уларҙы яуапҡа тарттырып була.

Балаһын хәмергә һатып

Артабан эскелек менән мауығып, күрше-тирәһенә генә түгел, үҙ балаһына тыныс тормош бирмәгән ҡатындың ишеген шаҡыныҡ. Ул инвалид ҡыҙы менән йәшәй. Буй еткергән улы Себер яҡтарында эшләп әсәһен, һеңлеһен аҡса менән тәьмин итә. Тик ул вахтаға юлланыу менән фатир эскеселәр ояһына әүерелә. Ҡатын 15-16 йәштәрҙәге ҡыҙы өсөн дә ҡурҡмай, ирҙәр йыя. Айныға башлау менән, ҡыҙын ашарға теләнселәргә сығара. “Баш төҙәтергә” уйлаһа инде, ҡыҙын кешеләрҙән “на хлебушек” тип һорандырып, көмөшкәгә йүгерә. Ҡатындың таңға ҡарай айнығып, баш ауыртыуына сыҙай алмай: “Ярҙам итегеҙ, дауалағыҙ мине!” – тип илағаны ла була. Тик көмөшкә тотоп килгән шешәләштәрен күреү менән, яңы тормош башларға уйлауын онота. Беҙгә, ишек артында кемдер ипләп кенә һөйләшеүгә ҡарамаҫтан, асманылар. Унан ҡыҙҙың: “Өйҙә берәү ҙә юҡ, асмайым”, – тигәне ишетелде. Күрәһең, әсәһе үҙе генә алдашыуы етмәгән, балаһын да хәйлә юлына баҫтырып өлгөргән. Әйткәндәй, һуңынан фатирҙа, беҙ шаҡыған мәлдә, ысынлап та, ҡатындың сираттағы «шайтан туйы» ойоштороуы асыҡланды. Тик көндән-көн йышайған мәжлестәр гонаһһыҙ ҡыҙ баланың яҙмышын яра һуҡмаҫмы? Хәйер, ғәзиз балаһын әсәһе аямағас, рейдтар мәлендә генә уға ярҙам итеп буламы инде?

27 янв. 2012 г.

Яңылыҡтар

“Ҡыҙыу линия” эшләй
Башҡортостан Республикаһы хеҙмәт һәм халыҡты социаль яҡлау министрлығы тарафынан “Оҙайлы хеҙмәт стажы булған хеҙмәт ветераны” тигән исем юллау буйынса “Ҡыҙыу линия” ойошторолдо. Һорауҙар менән эш көндәрендә сәғәт 9-ҙан киске 6-ға тиклем 8 (347) 273-52-12 телефоны буйынса мөрәжәғәт итергә була.
 
Эйәһеҙ эттәр тураһында
Баймаҡ ҡалаһы ҡала биләмәһе хакимиәте 2012 йылдың 19 ғинуарында “Баймаҡ ҡала биләмәһендә эйәһеҙ һәм берәҙәк эттәрҙе тотоу тәртибе положениеһы тураһында” ҡарар ҡабул итте. Хакимиәттең мәғлүмәт стендына (Баймаҡ ҡалаһы, Горький урамы, 26, 2-се ҡат) ҡуйылған был ҡарар менән һәр кем таныша ала.
С. Кейекбирҙина.
 
«Иман нуры» конкурсы үтәсәк
Баймаҡ районы мөхтәсибәте, Баймаҡ районы китапханаһы Ҡөрьәнде яттан уҡыу буйынса 5 йәштән 12 йәшкәсә һәм 13 йәштән 18 йәшкәсә балалар араһында район бәйгеһе үткәрә.
Бәйге 3 турҙа: I тур – урындағы мәсеттәрҙә, II тур – төбәктәрҙә, III  тур – Баймаҡ ҡала мәсетендә үтәсәк. Район бәйгеһендә төбәктәрҙә 1-се урын алған балалар ҡатнашасаҡ. 31 март сәғәт 11-ҙә халыҡ ижады үҙәгендә конкурсҡа йомғаҡ яһала. Унда төрлө йылдарҙа “Иман нуры” бәйгеһендә еңеүселәр саҡырыла.
А. Иҙелбаева.

Хәйриә концерты

Сыңғыҙ ауылы клубында “Туйсиндарҙың туй тамашаһы” тип аталған хәйриә концерты үтте. Ауылдаштарының сауап-фатихаһын алыу маҡсатында Флүрә, Йәмил, Радмир, Айнур, Рәмил Туйсиндар, Фәнис Сирбаев һәм баянсы Дим Шәрәфиев ерҙәштәренә йыр-моң кисәһе бүләк итте. Концерттан төшкән килем тотошлайы менән ауылдың имам-хатибы Хөрмәтулла Туйсинға тапшырылды. Клуб тултырып ихлас килгән ауылдаштары концерттан ҡәнәғәт булып, уларға артабан да уңыштар теләне.
Айбулат Хәлилов, Сыңғыҙ клубы
мөдире.

Хеҙмәт ярышында еңеүселәр


А.Б. Шәрипов етәкләгән “Рассвет” АХК-һы өсөн уҙған йыл уңышлы булды. Кооператив малсылыҡ комплексын ҡышҡа тейешле кимәлдә әҙерләне, урып-йыйыу эштәрен ойошҡанлы атҡарып сығып, етерлек күләмдә орлоҡ, фураж һалды. Һөҙөмтәлә, коллектив район хеҙмәт ярышында еңеп сыҡты.
Хужалыҡтың малсылыҡ тармағы ла үткән йылда һөҙөмтәле эшләне. Күптән түгел Баймаҡта үткән йыл йомғаҡтарына арналған тантаналы йыйылышта “Рассвет” АХК-һы малсылыҡ продукцияһын етештереүҙә юғары күрһәткескә өлгәшкәне өсөн II дәрәжә Дипломға лайыҡ булды.

Айбулат Ишназаров фотоһы.

Иң-иңдәр тәбрикләнде
2011 йыл һөҙөмтәләре буйынса түбәндәгеләр һөнәре буйынса иң яҡшыһы тип табылды:
«Иң яҡшы ауыл биләмәһе башлығы» – Вәхитова Фәниә Ғиләж ҡыҙы, Ниғәмәт ауыл биләмәһе башлығы;
“Һөнәре буйынса иң яҡшыһы”:
 Васючкова Юлиә Хөрмәт ҡыҙы, Бикеш ауыл биләмәһе хакимиәтенең эштәр идарасыһы,
Хәмитова Гөлнара Флүр ҡыҙы, Сибай ауыл биләмәһе хакимиәтенең ер эштәре буйынса белгесе,
Ҡаҙаҡбаева Инзилә Хәйбулла ҡыҙы, Темәс ауыл биләмәһе хакимиәтенең хәрби иҫәп буйынса белгесе;
“Йыл имам-хатибы” – Раев Юламан Лоҡман улы, Шүлкә ауылы имам-хатибы.
Торлаҡ-коммуналь хужалыҡ предприятиелары араһында “Һөнәре буйынса иң яҡшыһы” исеменә, чемпион таҫмаһына һәм аҡсалата премияға түбәндәге хеҙмәткәрҙәр лайыҡ булды:
Дашкин Андрей Сәмиғулла улы – “УК ЖФБ” ЯСЙ-һының иретеп йәбештереүсеһе,
Моталлапов Радмир  Егетбай улы – “БРСУ” МУП-ы водителе.
Транспорт, элемтә һәм төҙөлөш предприятиелары араһында:
Биктимеров Зөфәр Зөлҡәрнәй улы – “Башкиравтодор” ААЙ-һының Баймаҡ юл ремонт-төҙөлөш идаралығы юл эшсеһе,
Ғәбитов Айбулат Зиннур улы – Баймаҡ район элемтә үҙәгенең производство лабораторияһы электромеханигы,
Тимофеев Андрей Константинович – “Баймаҡ ПМК-һы” ЯСЙ-һы автокрансыһы,
Исламғолов Нурғәле Ҡорбанғәле улы – “Баймаҡ ПМК-һы” иретеп йәбештереүсеһе,
Самарбаев Шәһит Мәрүән улы – “Баймаҡ ПМК-һы” ЯСЙ-һының технологик ҡоролмалар буйынса слесары,
Бүләков Ирек Байморат улы – “Геосервис” ЯСЙ-һының әйҙәүсе белгесе,
Артыҡаева Гөлшат Муллахмәт ҡыҙы – “Башҡортостан Республикаһының техник инвентаризациялау бюроһы” ДУП-ының Баймаҡ район-ара филиалы төҙөлөш һәм ҡоролмаларҙы инвентаризациялау буйынса технигы,
Сакин Мәүлитдин Хәмит улы – “Башавтотранс” ДУП-ының Баймаҡ АТП-һы йөк ташыу колоннаһы водителе,
Буранбаев Рәил Әхмәт улы – “Башавтотранс” ДУП-ының Баймаҡ АТП-һы пассажирҙар ташыу колоннаһы водителе.

Һайлау – 2012

Рәсәй Федерацияһы Президенты һайлауында теркәлгән кандидаттарға 1 февралдә “Һаҡмар” гәзите редакцияһында һайлау алды материалдарын баҫыу өсөн түләүле баҫма майҙанды бүлеү буйынса йәрәбә үткәрелә.
Йәрәбә 15.00 сәғәттә түбәндәге адрес буйынса үтәсәк: Баймаҡ ҡалаһы, С.Юлаев проспекты,38.
“Рәсәй Федерацияһы Президентын һайлау тураһында”ғы федераль Закондың 53-сө статьяһының 9-сы пунктына ярашлы, йәрәбәлә унда ҡатнашырға теләк белдереп яҙма заявка биреүсе кандидаттар ҡатнаша ала.
Заявкалар 2012 йылдың 31 ғинуарына 17.30 сәғәткә тиклем факс 8(34751) 3-13-26), e-mail (sakmar07@rambler.ru) аша йәки редакцияла  (адресы: Баймаҡ ҡалаһы, С.Юлаев проспекты, 38)  ҡабул ителә.
Белешмәләр өсөн телефон: 3-13-26, 3-13-24.

“Һаҡмар” гәзите редакцияһы.

Кәңәшмәләр

Берәҙәк мал өсөн – штраф!
Ҡала биләмәһе башлығы И.Ә. Бураншин сираттағы кәңәшмәлә шәхси хужалыҡтағы малдарҙы көтөү тәртибе тураһындағы мәсьәләне күтәрҙе. Белеүебеҙсә, был йылдан-йыл һуҙылып килгән проблемаларҙың береһе. Кәңәшмәлә шәхси ихатаһында күпләп йылҡы малы көтөүселәр ҡатнашты.
– Көтөүгә ҡыуылмаған берәҙәк малдан ҡотолоуға етди саралар күреләсәк, – тине И.Ә. Бураншин. – Хәҙер Закон да беҙҙең яҡта. Баҫыуҙарҙы тәләфләгән, йәшеллекте юҡ иткән мал бикләнәсәк, ә хужаһына ҙур суммала штраф һалынасаҡ.
Ҡала башлығы белдереүенсә, Баймаҡ халҡының 344 баш йылҡыһы, 663 һыйыры, 236 ваҡ малы бар. Республика программаһына ярашлы ҡымыҙ етештереү өсөн субсидия алыусылар күп. Шәхси хужалыҡты үҫтереү, әлбиттә,  хуплауға лайыҡ, ләкин ҡайһы берәүҙәр, көтөү ойошторолоуға ҡарамаҫтан, малын ҡала урамдарына сығарып ебәрә. Тап шул сәбәпле, күп көс һалып үҫтерелгән йәшеллек, баҫыуҙарҙа иген юҡҡа сыға.
Ошо көндәрҙә Баймаҡҡа махсуслаштырылған ике техника алынасаҡ, уға тиҫтәнән ашыу малды тейәргә мөмкин. Уларҙың кемдеке икәнен билдәләү ауыр булмаясаҡ. Сөнки көндәр йылыта башлау менән малдарға шәхси номерҙар һуғыласаҡ. Был эш менән Урал аръяғы буйынса тоҡомсолоҡ предприятиеһы шөғөлләнәсәк. Хеҙмәтләндереү түләүле, бер баш малға тамға һуғыу 300 һум.
Кәңәшмәлә шулай уҡ йылҡы малын көтөүҙе ойоштороу буйынса тәҡдимдәр ҡаралды.

Лилиә ТАКАЕВА.

Конкурс иғлан ителә

Ойошмалар иғтибарына
Башҡортостан Республикаһы Иҡтисадты үҫтереү министрлығы социаль йүнәлештәге коммерциялы булмаған ойошмалар араһында субсидия алыуға конкурс иғлан итә. Конкурста еңеүселәргә Башҡортостан Республикаһы Хөкүмәтенең 2011 йылдың 21 октябрендәге “2011-2012 йылдарға Башҡортостан Республикаһының социаль  йүнәлештәге коммерциялы булмаған ойошмаларына ярҙам итеү программаһы тураһында”ғы 365-се ҡарарына ярашлы, социаль әһәмиәттәге программаларҙы бойомға ашырыу өсөн федераль бюджет  саралары иҫәбенән субсидиялар бүленә.
Конкурсты ойоштороусы – Башҡортостан Республикаһы Иҡтисадты үҫтереү министрлығы. Ҡатнашыусылар – социаль йүнәлештәге коммерциялы булмаған ойошмалар.
Конкурста ҡатнашыуға заявкалар 2012 йылдың 8 февраленә тиклем ҡабул ителә.  Заявкалар Башҡортостан Республикаһы Иҡтисадты үҫтереү министрлығына тапшырыла. Адресы: Өфө ҡалаһы, Туҡай урамы, 46, 252-се бүлмә (маҡсатлы программалар планлаштырыу бүлеге). Эш ваҡыты: дүшәмбенән йомаға тиклем: 9-ҙан киске сәғәт 6-ғаса (тәнәфес: сәғәт 13.30-ҙан – 14.30-ға тиклем).
2012 йылдың 8 февраленән һуң тапшырылған заявкалар конкурста ҡатнашмай.
Конкурс шарттары һәм талаптары буйынса мәғлүмәтте Башҡортостан Республикаһы Иҡтисадты үҫтереү министрлығының рәсми сайтының (http://mineсon.bashkortostan.ru) “Социаль йүнәлештәге коммерциялы булмаған ойошмаларға ярҙам” бүлегендә табырға мөмкин.

Муниципаль район хакимиәтенең иҡтисад бүлеге.

Һөт һауыу


25 ғинуарға ҡарата

Ҡотлайбыҙ!

Уҡыуҙа, ижади эшмәкәрлегендә һәм спортта юғары һөҙөмтәләргә өлгәшкәне өсөн Баймаҡ ҡалаһының 4-се мәктәбенең 11-се класс уҡыусыһы Байымова Линара Альберт ҡыҙы 2011/12 йылға Башҡортостан Президенты стипендияһына лайыҡ булды һәм Республика стипендиаты дипломы менән бүләкләнде.

һайлау – 2012

2012 йылдың 4 мартында урындағы үҙидараның вәкиллекле органдарына депутатлыҡҡа теркәлгән кандидаттар тураһында мәғлүмәт Башҡортостан Республикаһы Баймаҡ районы муниципаль районының өсөнсө саҡырылыш Баймаҡ ҡалаһы ҡала биләмәһе Советына депутаттар һайлау
Иҫке Тирмән округы
Мәзитов Ирмәк Рәхимйән улы, 1972 йылдың 2 сентябрендә тыуған, “Баймаҡ-ПМК-һы” ЯСЙ-һында мастер булып эшләй, Баймаҡ ҡалаһында йәшәй, “Берҙәм Рәсәй” партияһы тарафынан күрһәтелгән.
Фролов Сергей Александрович, 1973 йылдың 25 апрелендә тыуған, “Баймаҡ-ПМК-һы” ЯСЙ-һында иретеп йәбештереүсе булып эшләй, үҙ-үҙен күрһәткән.
Күлйортау округы

Конкурстар

Тәҡдимдәр ҡабул ителә
Ю.Мәҡсүтов исемендәге премия яңы лауреатын көтә
20 ғинуарҙа Юлай Мәҡсүтов исемендәге район журналистика премияһы буйынса комиссия ағзаларының сираттағы ултырышы үткәрелде. Унда премияны Баймаҡ биләмә-ара үҙәк китапханаһы исеменән генә түгел, ә зыялылар клубы (“Атайсал”, ағинәйҙәр клубтары, “Йәнгүҙәй” әҙәби-ижад берекмәһе) исеменән дә биреү кәрәкле тип табылды. Ошоға бәйле, комиссия яңы ағзалар менән тулыландырылды һәм уларҙың һаны һигеҙ кешегә еткерелде.
Конкурстың яңы положениеһына ярашлы, премия ике йыл һайын Юлай Мәҡсүтовтың тыуған көнөнә ҡарата (18 ғинуар) бирелә. Иҫегеҙгә төшөрәбеҙ: конкурста 35 йәшкә тиклемге, башҡортса йәки урыҫса яҙыусы матбуғат активистары, гәзит-журнал редакциялары хеҙмәткәрҙәре ҡатнаша ала. Уларҙың очерктары, һүрәтләмәләре, аналитик мәҡәләләре Баймаҡ, Сибай, республика гәзиттәрендә баҫылған һәм Баймаҡ төбәгенә, уның арҙаҡлы кешеләренә бағышланған, башҡорт йәштәренең рухи үҫеш, әхлаҡи тәрбиә мәсьәләләрен күтәргән, иҡтисад, социаль тормош проблемаларын һәм уларҙы хәл итеү юлдарын асҡан булырға тейеш.
Һуңғы ике йыл өсөн премияны биреүгә тәҡдимдәр беренсел журналистар, башҡа йәмәғәт ойошмалары, редакциялар, хеҙмәт коллективтары, шулай уҡ айырым кешеләр тарафынан 5 февралгә тиклем район китапханаһында ҡабул ителә.
Февраль уртаһында Юлай Мәҡсүтовтың 50 йыллығына ҡарата Хәтер һәм Ҡәҙер кисәһен үткәреү ҡарала. Унда шулай уҡ журналистың Баймаҡ кешеләре тураһында яҙылған очерктар китабының исем туйы, яңы лауреатҡа премия тапшырыу тантанаһы буласаҡ.

Рәшит Үтәев,
Юлай Мәҡсүтов исемендәге район журналистика премияһы буйынса комиссия рәйесе.

Водителдәр иғтибарына

Техосмотр үтеү өсөн түләү тураһында
Быйылдан транспорт сараларын техник тикшереүҙе ЮХХДИ-ла (был функция 2014 йылға тиклем Дәүләт автоинспекцияһында ҡаласаҡ), шулай уҡ шәхси станцияларҙа үтергә мөмкин. Һуңғыларының эшмәкәрлеген Рәсәй автостраховкалаусылар союзы контролдә тота.
“Транспорт сараларының техник торошон тикшереү тураһында һәм Рәсәй Федерацияһының айырым закон акттарына үҙгәрештәр индереү тураһында”ғы федераль Законға ярашлы, республика Хөкүмәте ҡарар ҡабул итеп,  Башҡортостанда транспорт сараларының техник торошон тикшереүгә түләү күләмен билдәләне. Раҫланған хаҡтарға ярашлы, 1 ғинуарҙан Башҡортостанда еңел автомобилдең техник торошон тикшереү өсөн иң күбендә – 450 һум, 3,5 тоннаға тиклемге ауырлыҡтағы йөк машинаһы өсөн – 480 һум, һигеҙҙән артыҡ урыны булған биш тоннаға тиклемге ауырлыҡтағы пассажирҙар автобусы өсөн 810 һум түләргә кәрәк буласаҡ.

Рәсәй тарихы йылы

Гәзит биттәрендә – һуғыш ауазы

Бөйөк Ватан һуғышы... Бөйөк Еңеү... Уның ҡиммәттәрен, ҡәҙерен ошо осорҙо үҙ елкәһендә татып, әсе йәштәр аша кисергәндәр генә аңлайҙыр.  Әлеге мәлдә 4-се мәктәптең 1-се ҡатында Бөйөк Еңеүҙең 65 йыллығына арналған күсмә күргәҙмә ҡолас йәйгән. Хәрби Дан республика музейы тарафынан был күргәҙмә былтыр уҡ ойошторолоп, әлеге көндә 11-се районда халыҡҡа тәҡдим ителә, тиҙҙән ул Сибайҙа урын аласаҡ.

Баймаҡ тарихи-крайҙы өйрәнеү музейы директоры Наилә Ғәлина әйтеүенсә, унда “Комсомольская правда” гәзитендә 1941 – 1945 йылдарҙа донъя күргән һуғыш тураһындағы материалдар тупланған. Күргәҙмәнең мәктәп бинаһында ойошторолоуы күпкә отошло – көн һайын 4-се мәктәптең төрлө класс уҡыусылары уның менән таныша икән.

Cаралар

Әҙәпле булам, тиһәң...

“...Әлиә әхирәте Сәриәгә ҡунаҡҡа килгән. Уның ситлектә ултырған тутыйғошон күреп ҡалған да: “Минең дә тутыйғошом бар ине, үлде. Улар тиҙ генә үлә лә ҡуя ул”, — тип ысҡындырған. Артабан нисек кенә уйнарға маташмаһын, Сәриә һөйләшмәгән. Әлиәгә ҡайтып китеүҙән башҡа сара ҡалмаған. Ул ниндәй яңылышлыҡ эшләгән?”

Балалар китапханаһы менән муниципаль район хакимиәтенең йәштәр секторы “Әҙәплелек әлифбаһы” тип аталған проект төҙөп, уға ярашлы саралар үткәрергә планлаштыра. Яңыраҡ шул  сараларҙың тәүгеһе балалар китапханаһында үтте һәм “Әҙәм күрке – әҙәп” тип аталды. 4-се мәктәптең Гөлсөм Моталова етәкләгән 7-се “в” класы уҡыусылары йәш сағында балалар уҡытып, унан һаҡлыҡ банкыһында 37 йыл эшләп хаҡлы ялға сыҡҡан, әле иман юлына баҫҡан Таңһылыу Иҫәндәүләтова менән осрашты. Таңһылыу Мостафа ҡыҙы балаларға дини тәрбиә тураһында һөйләне, әҙәплелеккә өндәне.
Балалар китапханаһы мөдире Гөләйшә Рафиҡова  үрҙә әйтеп кителгән төрлө тормошсан ситуацияларҙа үҙеңде нисек дөрөҫ тоторға кәрәклеге тураһында аңлатты, уларҙың да фекерҙәре менән ҡыҙыҡһынды.

Cпорт

Саңғыла –  почтальондар!

23 ғинуарҙа “Ирәндек” тау саңғыһы комплексында Баймаҡ, Учалы, Белорет, Күгәрсен райондары һәм Сибай ҡалаһы почтамт хеҙмәткәрҙәренең спартакиадаһы үтте. Сикәләрҙе семетеп алған әсе ел дә өркөтмәне: саңғыға баҫып елдәй етеҙ елде хат ташыусылар.
– Баймаҡ районында сираттағы спорт ярышы үтә, быға  бик шатбыҙ, – тине муниципаль район хакимиәте башлығының социаль мәсьәләләр буйынса урынбаҫары И.Ә. Зәйнуллин. – Ярышта еңеүҙәр ҙә, еңелеүҙәр ҙә була. Ләкин иң мөһиме – ялығыҙ файҙалы һәм күңелле үтһен, бер-берегеҙ менән аралашығыҙ, көс-дәрт туплағыҙ...

Артабан Баймаҡ почтамты хеҙмәткәрҙәре театрлаштырылған тамаша күрһәтте. Әкиәт персонаждары, “Буран” ҡаргиҙәрендә килеп еткән почтальон Печкин да шаян таҡмаҡтары менән күңелдәрҙе күтәрҙе.
Спартакиаданың баш судьяһы, район хакимиәтенең физкультура һәм спорт секторы мөдире И.Н. Хәмитов ярыш шарттары менән таныштырғандан һуң күңелле уйындар башланып китте. Тәүге һынау: ҡатын-ҡыҙҙарға – 500, ир-егеттәргә 1000 метр аралыҡҡа саңғыла ярышыу. Ул 45 һәм 55 йәшкә тиклемгеләр араһында барҙы. Судьяның һыбыҙғыһы “старт” биреү менән  саңғысылар уҡтай алға ынтылды. Бер-береһен уҙып китеүҙәр, ҡолап, яңынан саңғыға баҫып алға ынтылыуҙар... Дәртләндергән шат тауыштар аҫтында финиш һыҙығын беренсе булып Белорет командаһы саңғысыһы үтте.

25 янв. 2012 г.

Хеҙмәт ярышында еңеүселәр


Ғ.Б. Сәлимов етәкләгән Ленин исемендәге АХК уҙған йылды юғары күрһәткестәр менән тамамланы. Кооператив  мал аҙығы әҙерләү, урып-йыйыу миҙгеле һөҙөмтәләре буйынса районда 1-се урынды яулаһа, малсылыҡ комплексы йомғаҡтары буйынса ла иң юғары баһаға лайыҡ булды. Күптән түгел үткән тантаналы йыйылышта  коллектив I дәрәжә Диплом менән бүләкләнде. Ғәлим Булат улына иһә аҡсалата премия тапшырылды.

А. Ишназаров фотоһы.

Яңылыҡтар

Тәҡдимдәрегеҙ булһа...
Хәбәр итеүебеҙсә, Рәсәй Федерацияһы Эске эштәр министрлығының Баймаҡ районы буйынса бүлеге янында Йәмәғәт советы ойошторолдо. Муниципаль район хакимиәте бинаһының беренсе ҡатында (Баймаҡ ҡалаһы, С.Юлаев проспекты, 36) граждандарҙан мөрәжәғәттәр һәм тәҡдимдәр ҡабул итеү өсөн махсус йәшник ҡуйылды. Унда теләгән һәр кем хоҡуҡ һаҡлау өлкәһенә булған ялыуҙарын, һорауҙарын, теләк-тәҡдимдәрен ҡалдыра ала. 

Балаларға – баҡса
Быйыл ҡалабыҙҙың “Малыш” микрорайонында бер нисә ҡатлы ҙур һәм заманса балалар баҡсаһы төҙөләсәк. Төҙөлөш һәм коммуналь-торлаҡ хужалыҡ буйынса муниципаль район хакимиәте башлығы урынбаҫары К.П. Замотаев әйтеүенсә, ошо маҡсатта республика бюджетынан 120 миллион һум аҡса бүленә. 220 урынға тәғәйенләнгән балалар баҡсаһы төҙөлөшө апрель тирәһендә башланасаҡ.

Пособие арта
2012 йылдың 1 ғинуарынан бала тыуғанда бер тапҡыр түләнә торған пособие күләме артты, ул 14266 һумға тиң. Шулай уҡ 1,5 йәшкә тиклем баланы тәрбиәләү буйынса ла пособие артты: беренсе баланы ҡарау буйынса – 2674 һум 90 тин, икенсе һәм унан һуңғыларына 5349 һум 79 тин. Йөклөлөктөң иртә сроктарында иҫәпкә торған ҡатын-ҡыҙҙарға бер тапҡыр түләнә торған пособие күләме – 534 һум 98 тин.

Газ үткәреү дауам итә

Былтыр республикабыҙҙың тәүге баш ҡалаһы – Темәстә 14 километр оҙонлоғонда газ үткәргес төҙөлгәйне. Быйыл бында был тәңгәлдәге эштәрҙе тамамлау планлаштырыла. “Зәңгәр яғыулыҡ” селтәрен газ станцияһына тоташтырыу өсөн тағы ла 2 километр тирәһе газ үткәргес төҙөләсәк.

C. КЕЙЕКБИРҘИНА.

Семинарҙар

Алдынғы хужалыҡ тәжрибәһендә
Үткән шәмбелә Ленин исемендәге АХК-ла уҙған кәңәшмәлә тәжрибә уртаҡлашырлыҡ һәм
фәһем алырлыҡ өлгөләр күп булды. Уның менән район хакимиәте башлығы
И.Х. Ситдыҡов етәкселек итте.
Сара Таулыҡай бригадаһында хужалыҡ рәйесе Ғ.Б. Сәлимов һәм баш зоотехник Ҡ.Р. Уразбаев оҙатыуында һөтсөлөк комплексының эше менән танышыуҙан башланды.

Ҡотлайбыҙ!

Башҡортостан Республикаһы Президенты Указы менән оҙаҡ йылдар намыҫлы эшләгәне өсөн Баймаҡ ҡалаһының РОСТО ДОСААФ рәйесе Сәйетов Рамир Шәкирйән улы Башҡортостан Республикаһының Почет грамотаһы менән бүләкләнде.
 
* * *
 
Башҡорт халҡының мәҙәниәтен үҫтереүгә индергән тос өлөшө өсөн Баймаҡ районы биләмә-ара үҙәк китапхана директоры Дәүләтшина Луиза Ҡаһарман ҡыҙы Башҡортостан Республикаһы Мәҙәниәт министрлығының Рәхмәт хатына лайыҡ булды.

Иң-иңдәр тәбрикләнде

Райондың халыҡ хужалығы тармағындағы үткән йыл йомғаҡтары һәм үҙ һөнәренең алдынғылары билдәләнде
Райондың агросәнәғәт комплексы үҫешенә ҙур  өлөш индергәндәре өсөн түбәндәге ауыл хужалығы предприятиелары белгестәре Почет грамотаһына һәм аҡсалата премияға лайыҡ булдылар:
Алмаев Виктор Николаевич – “Уңыш” АХК-һы Калинин бүлексәһенең мал һимертеү майҙансығы бригадиры,
Ғафарова Фәриға Борхан ҡыҙы – “Уңыш” АХК-һының Йәнйегет бүлексәһе бригадиры,
Ғибатов Зәбир Ишбулды улы – “Рассвет” АХК-һы бригадиры,
Ишмырҙина Эльвира Әмир ҡыҙы – “Байҡара” агрофирмаһы” ЯСЙ-һының зоотехник-селекционеры,
Латыпов Рәмил Ғиниәт улы – “Таналыҡ” АХК-һының ферма мөдире,
Мәхейәнов Биктимер Әхмәт улы – “Мырҙаҡаев” КФХ-һының ферма мөдире,
Огнев Александр Васильевич – “Рассвет” АХК-һы зоотехнигы,
Сыңғыҙов Искәндәр Хәмзә улы - “Баймаҡ” ҒПБ-һы ЯСЙ-һының йылҡысылыҡ бригадиры,
Үҙәнбаев Шамил Фитрат улы– Ленин исемендәге АХК -ның ферма мөдире,
Уразбаев Ҡәйүм Рәжәп улы – Ленин исемендәге АХК-ның баш зоотехнигы.    
“Һөнәре буйынса иң яҡшыһы – 2011” исеме,  чемпион таҫмаһы, аҡсалата премия менән түбәндәге малсылыҡ хеҙмәткәрҙәре бүләкләнде:
Һауынсылар араһында
Иҫәндәүләтова Мәүсирә Фәтих ҡыҙы – “Байҡара” агрофирмаһы” ЯСЙ-һы,
Ишмөхәмәтова Нурсилә Фирғәт ҡыҙы – “Йылайыр” ЯСЙ-һы,
Күлибаева Мәфрүзә Сөнәғәт ҡыҙы – “Баймаҡ” ҒПБ-һы,
Ҡотлоғужина Мөнирә Рәфҡәт ҡыҙы – Ленин исемендәге АХК,
Рәхмәтуллина Люциә Әхмәҙулла ҡыҙы – “Ибраһимов Т.Г.” ШП-һы,
Рашева Миләүшә Йомағол ҡыҙы – “Союз” ЯСЙ-һы,
Сәғәҙиева Гөлсәсәк Әхмәт ҡыҙы – “Баймаҡ” ҒПБ-һы,
Сәғитова Сәриә Әхмәҙиә ҡыҙы – “Таналыҡ” АХК-һы,
Сәфәрғәлина Көнһылыу Зәки ҡыҙы – “Йылайыр” ЯСЙ-һы,
Сирбаева Мөнирә Яҡуп ҡыҙы – Ленин исемендәге АХК,
Таштимерова Әнзиә Әнүәр ҡыҙы – “Рассвет” АХК-һы,
Утарбаева Нурия Асрар ҡыҙы – Салауат исемендәге АХК,
Шәйәхмәтова Миңниса Миңлебай ҡыҙы – “Байҡара” агрофирмаһы,
Йәнтилина Нуриҙә Фазылйән ҡыҙы – “Уңыш” АХК-һы,
Йәнтүрина Сәриә Зәки ҡыҙы – “Таналыҡ” АХК-һы.
Быҙау ҡараусылар араһында
Орлова Рәйсә Энгельс ҡыҙы – “Рассвет” АХК-һы.
Малсылар араһында
Ғазин Ислам Хәсән улы – “Таналыҡ” АХК-һы,
Горшенин Риза Иҙрис улы – “Байҡара” агрофирмаһы,
Дәүләтбаев Юлай Фәрит улы – “Уңыш” АХК-һы,
Данилов Андрей Евгеньевич - “Рассвет” АХК-һы,
Дауытов Фәһим Исмәғил улы – “Уңыш” АХК-һы,
Ишмөхәмәтов Кинйәғәле Айытбай улы - “Йылайыр” ЯСЙ-һы,
Ленкин Виктор Алексеевич – “Баймаҡ” ҒПБ-һы,
Мөхәмәтйәров Мөрит Фәрит улы – “Байҡара” агрофирмаһы,
Райманов Рәйес Фәрит улы – “Аҡморон” АХК-һы,
Салихов Айсыуаҡ Йәноҙаҡ улы – Ленин исемендәге АХК,
Сербененко Владимир Леонидович – “Йылайыр” ЯСЙ-һы,
Сирбаев Ринат Сәйфулла улы – Ленин исемендәге АХК,
Тайыпов Юлай Салауат улы – Салауат исемендәге АХК,
Үҙәнбаев Шәфҡәт Фирғәт улы – “Баймаҡ” ҒПБ-һы,
Урманов Сәлихйән Шәрифйән улы – “Алғаҙы” ЯСЙ-һы,
Ямантаев Зекриә Зәкир улы – “Таналыҡ” АХК-һы,
Әминев Амур Зиннәтулла улы – “Әминева Г.М.” КФХ-һы.
Йылҡы көтөүселәр араһында
Иҫәнғолов Рәхимйән Вәлиәхмәт улы – “Союз” ЯСЙ-һы,
Исмәғилев Зәбир Өмөтбай улы – “Уңыш” АХК-һы,
Үҙәнбаев Ғәфүр Насип улы – “Аҡморон” АХК-һы.

Беҙҙең интервью

Кемдәр субсидияға хоҡуҡлы?
Былтыр торлаҡ йорт һәм коммуналь хеҙмәттәр өсөн түләүгә субсидияны районда 2489 ғаилә алған. Субсидияның дөйөм суммаһы 17 миллион 162 мең һум булып, уртаса күләме 882,06 һум тәшкил иткән. Торлаҡ бүлмә һәм коммуналь хеҙмәттәр өсөн түләүгә субсидияға ҡағылышлы йыш бирелгән һорауҙарға Баймаҡ районы буйынса субсидия секторы мөдире Ләйсән Рамаҙан ҡыҙы Мезина яуап бирә.

– Кемдәр субсидия алыуға хоҡуҡлы?
– Субсидия – ул килеме түбән булған граждандарға дәүләт тарафынан күрһәтелгән һәм кире ҡайтарылмай торған социаль ярҙам. Был адреслы социаль программа эшһеҙ граждандарға, 1-2 балалы тулы булмаған ғаиләләргә, күп балалы ғаиләләргә һ.б. йүнәлтелә. Торлаҡ бүлмә һәм коммуналь хеҙмәттәр өсөн түләүгә субсидияны алыуға торлаҡ хужаһы (торлаҡ йорт, торлаҡ йорттоң бер өлөшө, фатир, фатир өлөшө), дәүләт йәки муниципаль торлаҡ менән файҙаланыусы, шәхси торлаҡ бүлмәгә инеп түләп йәшәүсе  дәғүә итә ала. Торлаҡ бүлмә һәм коммуналь хеҙмәттәр өсөн түләнгән сығым (төбәк стандарттары сиктәрендә) ғаилә килеменән артҡан осраҡта ғына  граждандарға субсидия бирелә.  Шуны ла әйтеп үтергә кәрәк: субсидия юллаусының торлаҡ һәм коммуналь түләүҙәр буйынса бурысы булмауы йәки бурыстарҙы ҡаплау тураһында килешеү төҙөү шарт. Субсидия алты айға тәғәйенләнә, ошо ваҡыт уҙғас, ҡабаттан беҙҙең бүлеккә документтар йыйып тапшырырға кәрәк. 
– Субсидия алыусының ғаилә составы нисек билдәләнә?
– Субсидия алыусының үҙе менән бергә бер йортта йәшәүселәр ғаилә составына инә.
– Торлаҡ бүлмә һәм коммуналь хеҙмәттәргә хаҡтар артыуы субсидия күләменә йоғонто яһаймы?
– Торлаҡ-коммуналь хеҙмәттәр хаҡының төбәк стандарттары үҙгәргән көндән алып, субсидияның да күләме ҡабаттан иҫәпләнә. Мәҫәлән, былтыр субсидияларҙы ҡайтанан иҫәпләү БР Хөкүмәтенең “2011 йылға Башҡортостан Республикаһы муниципаль берәмектәре буйынса торлаҡ-коммуналь хеҙмәттәр хаҡының республика стандарттары тураһында”ғы ҡарарына ярашлы башҡарылды. Ошо уҡ ҡарар нигеҙендә ғаиләнең йыйылма сығымы күләмендә торлаҡ һәм коммуналь хеҙмәттәр өсөн түләүҙә граждандарҙың сығымы өлөшөнә максималь рөхсәт ителгәнсә яңы республика стандарты билдәләнде. Ул граждандарҙың субсидия күләмен дә арттырҙы. Субсидиялар шулай уҡ йәшәү минимумы күләме үҙгәргәндә лә ҡайтанан иҫәпләнә. 2012 йылдың 1 ғинуарынан йәшәү минимумы хеҙмәткә яраҡлы халыҡ өсөн 5861 һум, пенсионерҙарға – 4471, балаларға 5374 һум тәшкил итә. Ошо сәбәпле субсидия күләме 1 ғинуарҙан яңынан иҫәпләнде.
– Субсидия юллау өсөн ниндәй документтар кәрәк?
– Билдәләнгән формалағы ғариза; ғариза биреүсенең һәм ғаилә ағзаларының паспорттары, балаларҙың тыуыу тураһындағы таныҡлыҡтары, торлаҡ йортҡа найм килешеүе, хоҡуҡтарҙы дәүләт теркәүе тураһындағы таныҡлыҡ һ.б. күсермәләре, ғаилә составы тураһында белешмә, ғариза биргән көнгә ҡарата уҙған алты айға килемдәр (эш хаҡы, пособие, пенсия һ.б.) тураһында белешмә, торлаҡ һәм коммуналь хеҙмәт өсөн һуңғы түләүҙәрҙе раҫлаусы документтар (квитанциялар һ.б), ғариза биреүсенең льготаларға хоҡуҡтарын раҫлаусы документтар,  ғариза биреүсенең һаҡлыҡ кенәгәһе күсермәләре.
Субсидия өсөн кәрәкле документтар исемлеге райондың бөтә ауыл биләмәләре хакимиәттәрендә лә бар.
Тулыраҡ мәғлүмәтте райондың субсидия секторынан түбәндәге адрес буйынса алырға була: Баймаҡ ҡалаһы, Пименов урамы, 81 (элекке хәрби комиссариат бинаһында), телефоны: 2-26-11. Эш режимы: эш көндәрендә 8.30-ҙан киске сәғәт 6-ға тиклем.

Иҫтәлекле даталар

Ветерандар ойошмаһына – 25 йыл
Баймаҡ районы ветерандарының тәүге конференцияһы 1987 йылдың 24 ғинуарында булғайны. Был сарала төрлө ойошма-предприятиеларҙан делегаттар ҡатнашты. Конференцияның эше менән партия етәкселек итте. Ошонда Борхан Абдулла улы Сәмиғуллин һуғыш һәм хеҙмәт ветерандарының район һәм ҡала советы рәйесе итеп һайланды. Уның урынбаҫары булып В.Б. Буранбаев, йәмәғәт ойошмалары менән бәйләнеш тотоу буйынса С.С. Самарбаев, секретарь вазифаһына Г.Р. Яҡупова ҡуйылды.

Редакция почтаһынан

Хаттарҙан юлдар
Яңы йыл байрамдары, ниһайәт, артта ҡалды. Уны һәр кем, һәр ауыл халҡы үҙҙәренсә үткәргән һәм ошондай йөкмәткеле, әммә һуңлаған хаттар редакциябыҙға һаман да килә әле. Уларҙы оҙон итеп баҫып булмағанға күрә, өҙөктәрен генә бирергә булдыҡ.
“Өлкән йәштәгеләрҙе Яңы йыл байрамы бик үк ҡыҙыҡһындырмайҙыр, тип уйлайбыҙ, – тип яҙа Семеновск ауылынан Миңзәлә Мырҙабаева. – Улар, моғайын, көндәлек эштәрен теүәлләп, төнгө 12-лә ял итәләрҙер. Ошоно уйлап беҙ, Семеновск ҡатын-ҡыҙҙары советы, ауыл биләмәһе хакимиәте менән берлектә 75 йәш һәм унан өлкәндәрҙе “Зәңгәр ут” кисәһенә йыйҙыҡ. Ҡыҙыҡлы уйындар йыр-бейеү, ҡотлауҙар менән үрелеп барҙы. Тәмле сәйҙәр эсеп, ҡыңғырауҙар тағылған, кашауай саналар егелгән аттарҙа ҡәҙерле ҡунаҡтарыбыҙҙы өйҙәренә ҡәҙәр оҙаттыҡ. Кисә үҙебеҙгә лә бик оҡшаны, инәйҙәрҙең ҡыуаныстары беҙгә ҡанат ҡуйҙы”.
Ата-әсәләр комитеты ағзаһы Гөлгөнә Үҙәнбаеваның хатында: “Билал мәктәбендә Яңы йыл маскарадын үткәреүгә урындағы эшҡыуарҙар, уҡытыусылар, мәсет һәм хәлдәренән килгән ата-әсәләр бағыусылыҡ ярҙамы күрһәтте. Уларға, шулай уҡ ҡалаға барып, үҙ машиналарында бүләктәр һәм күстәнәстәр алып ҡайтырға ярҙам иткән Илдар Күсәрбаев һәм Нәғимйән Биктимеровҡа, байрамды ойоштороуҙа әүҙем ҡатнашҡан ата-әсәләр комитеты ағзалары Люциә Кәримова һәм Миңлегөл Амановаға ҙур рәхмәт. Шундай ярҙамсыл, ихтирамлы ауылдаштарыма эштәрендә уңыштар, ғаилә именлеге, һаулыҡ, оҙон ғүмер теләйем”, – тигән юлдар бар.
Иҫке Сибайҙан Әнисә Абдулғазина Сәфәр айы тураһындағы хатын һуңлатып килтергәнгә күрә, ваҡытында баҫа алманыҡ. Ул унда был айҙың хикмәттәре, был көндәрҙә уҡыласаҡ сүрәләрҙең тәртибе һ.б. тураһында яҙған. “Был көндәрҙе бушҡа үткәрмәйек, иртәнән алып ҡояш байығансы доғала уҙғарһаҡ, үҙебеҙ өсөн бик ҙур файҙа. Пәйғәмбәребеҙгә салауат уҡыйыҡ!” – ти ул.

Баймаҡ лицей-интернатына – 55 йыл

Осрашайыҡ, класташтар!
“Балалар, тороғоҙ, йүгерегеҙ зарядкаға!”. Бүлмәбеҙгә дежур тәрбиәсе инеп утты яндыра, бөтәбеҙ ҙә һикереп тороп, спорт формаһын кейеп, зарядкаға теҙеләбеҙ. Коридорҙың осонан һәлмәк кенә баҫып Айҙар Йыһанша улы Хөсәйенов күренә. Ул йыш ҡына таң менән килеп шулай тикшерә.
Иртәнге аштан һуң дәрестәргә ҡыңғырау зыңғырлай. Алъяпҡыстар, ҡыҙыл галстуктар тағып, беҙ кабинеттарға йүгерәбеҙ. Дәрестәр һиҙелмәйсә үтеп тә китә. Уҡыусылар төшкө ашҡа йыйыла. Был аҙнала беҙҙең 8-се “а” класы ашханала дежур. Икмәк бүлгән бүлмәлә малайҙар эшләй, ә ҡыҙҙар тәрилкә йыуа, уҡыусыларға аш ташый. Бындағы эш тиҙ генә, конвейер шикелле башҡарыла. Сәғәт 2-лә ашхана бушап ҡала. Бына тағы ла ҡыңғырау. Класс бүлмәһенә беҙҙең тәрбиәсебеҙ Фәүзиә Такаева килеп инә. Ул шул тиклем талапсан, ғәҙел кеше. Беҙ теҙмә буйынса дәрестәрҙе әҙерләргә тейешбеҙ.
Иң көтөп алған көнөбөҙ – шәмбе. Кискеһен спортзалда нәфис фильм күрһәтәләр, ә унан һуң өлкән синыфтар ял кисәһе ойоштора. Кемдер ял кисәһенә, берәүҙәр киноға, бәғзеләр ҡайтып китергә әҙерләнә. Беҙгә өлкән класс уҡыусыларының гармунға өҙә баҫып бейеүҙәре, аҡҡош шикелле вальста әйләнеүҙәре оҡшай, бер яҡ ситтә иҫебеҙ китеп уларҙы күҙәтәбеҙ. Киске 11-гә яйлап бүлмәләргә таралышабыҙ. Бөгөн отбой һуңыраҡ. Бүлмәләш ҡыҙҙар йоҡларға әҙерләнә, тәрбиәсе инеп утты һүндерә һәм беҙ төнө буйы ҡыҙыҡ нәмәләр  һөйләшеп сығабыҙ. Күҙ алдымдан интернатымдың оҙон бер аҙнаһы кино таҫмаһы кеүек үтте. Ә ҡасан ғына булды был онотолмаҫ көндәр... Эйе, ғүмер аҡҡан һыу кеүек үтеп тә киткән.
Төптән уйлап ҡараһаң, интернатым мине күп нәмәгә өйрәтте, тормошта бирешмәҫкә, үткен булырға, ғөмүмән, иң изге сифаттарҙы тәрбиәләне. Буласаҡ һөнәремде лә мин еңел һайланым. Районда сит телдәр уҡытыусылары булманы, ә интернатҡа Өфөнән йәш кенә ҡыҙҙар килеп уҡыта торғайны. Инглиз теле буйынса һөнәр һайлауыма улар этәргес көс биргәндер.
Быйыл беҙҙең интернатты тамамлауыбыҙға 40 йыл. Класташтарым Рәсүл, Мирза, Заһита, Айһылыу, Шәмсинур, Мөслимәне мәктәпте бөткәндән алып күргәнем юҡ. Һеҙ ҡайҙа? Әйҙәгеҙ, класташтарым, тағы ла бер тапҡыр туған мәктәбебеҙгә йыйылайыҡ, үткәндәрҙе иҫләйек, бала саҡ эҙҙәренән атлайыҡ, алһыу таңдарҙы ҡаршылайыҡ!

Йылы һүҙ – йән аҙығы

Уңыштар беҙгә юлдаш
Башҡорт теленә һөйөү әсәнән бирелә, тиһәләр ҙә, уны үҫтереүҙә, байытыуҙа башҡорт теле һәм әҙәбиәте уҡытыусыларының да роле ғәйәт ҙур. Ошо йәһәттән бар тырышлығын һалып, ваҡытын да, көсөн дә йәлләмәй эшләп йөрөүселәр бихисап. Шуларҙың береһе – Таһир мәктәбенең башҡорт теле һәм әҙәбиәте уҡытыусыһы Г.Р. Байраҡаева.

Гөлкәй Радик ҡыҙы – беҙҙең ауыл килене. Өфөләге китапхана техникумын тамамлап, ете йыл Баймаҡ үҙәк район китапханаһында эшләй. Ситтән тороп БДУ-ның филология факультетын тамамлай. Хәҙер тиҫтә йылдан ашыу Таһир мәктәбендә уҡыусыларға Әсә теле серҙәрен өйрәтә. Өс йылдан ашыу тәрбиә эштәре буйынса директор урынбаҫары булып та эшләне. 

Суд залынан

Саҡырылмаған ҡунаҡ фажиғәһе
Хөкөм эскәмйәһенә ултырған кешеләрҙе күреп (араларында урамда көн дә тиерлек осраған, йөҙҙәре таныш әҙәмдәр ҙә осрап ҡуя), йыш ҡына ауыр уйҙарға ҡалаһың. Яҙмыштың ни тиклем аяуһыҙ булыуын, бер секундҡа ғына үҙеңде ҡулдан ысҡындырыуың ниндәй ҡазаға килтереүен аңлайһың. Хөкөм ителеүселәрҙең барыһын да кешелек сифаттарын юғалтҡан вәхшиҙәр тип әйтеп булмай. Кемдер үҙен һаҡлауҙың самаһын арттырған, бәғзе берәүҙәрҙең зиһенен ниндәйҙер ҡара көс томалаған, кемеһелер хәйерһеҙ сәғәттә ҡазалы урынға килеп эләккән...
Шулай ҙа Баймаҡ район суды хеҙмәткәрҙәре әйтеүенсә, бик һирәк енәйәт айыҡ аҡыл менән ҡылына, бар фажиғәнең башында – эскелек, иҫерткес эсемлектәрҙе самаһыҙ ҡулланыу ята. Сираттағы әҙәм балаһы ла шешә ҡоллоғонан, яңғыҙлығынан ысҡына,  әҙәми тормошҡа ылыға алмай, өсөнсө мәртәбә хөкөм ителде.

23 янв. 2012 г.

Тантаналы йыйылыштар

Үткән йылға йомғаҡ яһалды
Ошо кесаҙна район халыҡ ижады үҙәгендә 2011 йыл йомғаҡтарына арналған тантаналы йыйылыш булды. Ҡала һәм район активы, хеҙмәт коллективтары алдынғылары саҡырылған был сарала үткән йыл уңыштары барланды, һөнәрҙәре буйынса иң яҡшылар тәбрикләнде, ағымдағы осорға уй-ниәттәр билдәләнде. Тантанала БР Хөкүмәте Аппараты етәксеһе урынбаҫары, көньяҡ-көнсығыш төбәкте иҡтисади үҫтереүҙең комплекслы программаһы кураторы, яҡташыбыҙ М.Б. Фәтхуллин, БР Дәүләт Йыйылышы – Ҡоролтай депутаты Р.Р. Сырлыбаев, Йылайыр районы хакимиәте башлығы И.Л. Фәтҡуллиндарҙың ҡатнашыуы сараға мәртәбә өҫтәне. Бик тә матур үтте был байрам, ул ысын мәғәнәһендә хеҙмәт алдынғыларына дан йырланы, яңы осорға дәрт уятты.

2011 йыл йомғаҡтары тураһында муниципаль район хакимиәте башлығы И.Х. Ситдыҡов төплө доклад менән сығыш яһаны. “Дөйөм алғанда, уҙған йыл күп параметрҙар буйынса емешле булды, – тип билдәләне Илшат Хәмит улы, – беҙ уны лайыҡлы атҡарып сыҡтыҡ, йыл яҡты һәм ваҡиғаларға бай булды. Уҙған осорҙа эш хаҡы 20 процентҡа артты, 16 процентҡа пенсия күләме күтәрелде. Эшһеҙлек кимәле 66-ға кәмене, теркәлгән никахтар һаны 62-гә күберәк булды. Үлем осраҡтары 58-гә кәмене. Ыңғай үҙгәрештәргә беҙ ҡала һәм район активының, халыҡ хужалығының төрлө тармаҡтары хеҙмәтсәндәренең ныҡышмалы хеҙмәте арҡаһында өлгәштек”.
Хакимиәт башлығы халыҡ хужалығы тармағының һәр өлкәһенә айырым туҡталып, өлгәшелгәндәргә баһа бирҙе, хәл ителәһе мәсьәләләрҙе барланы.
Иң-иңдәр тәбрикләнде
Райондың халыҡ хужалығы тармағындағы үткән йыл йомғаҡтары һәм үҙ һөнәренең алдынғылары билдәләнде.

Һөйөнөслө яңылыҡ

Ҡотло булһын фатирҙар!
Бөйөк Ватан һуғышының дәһшәтле ауазы йылдар төпкөлөндә ҡала барһа ла, илгә Еңеү алып килеп, кешелекте ҡоллоҡтан ҡотҡарып ҡалған яугирҙарыбыҙ алдында беҙ мәңге бурыслыбыҙ. Михнәтле йылдарҙы үҙ иңендә татып, фашистар менән йөҙгә-йөҙ килеп алышҡан олатайҙарҙың сафы һирәгәйеүе күңелдәргә һағыш өҫтәй. Шулай ҙа Хөкүмәт тарафынан яугирҙарға һәм уларҙың тол ҡалған ҡатындарына ярҙам күрһәтелеүе ҡыуандыра.

Ошондай иң ҙур шатлыҡтарҙың береһе – ул торлаҡ алыуға сертификат тапшырыу. Кисә был бәхетте Баймаҡтан Миңлеямал Иҫәндәүләтова, Зөләйха Салихова һәм Аҡморондан Фәрхиямал Рыҫҡужина (һүрәттә) кисерҙе. 

Урындағы үҙидара

Башлыҡтар белемдәрен камиллаштыра
Ауыл биләмәләре башлыҡтары өсөн семинар-уҡыуҙар ойошторолдо
Был улар өсөн ысын мәғәнәһендә бер мәктәп, сөнки ауыл халҡы төрлө һорауҙар, тәҡдимдәр менән иң тәүҙә үҙҙәренең башлығына мөрәжәғәт итә. Тимәк, ниндәй генә өлкә булмаһын, башлыҡ вазифаһын алып барыусы һуңғы яңылыҡтар, закондарға индерелгән үҙгәрештәр тураһында хәбәрҙар булырға, йәғни урындарҙа эште дөрөҫ ойошторорға, заман менән бергә атларға тейеш.

Әйтергә кәрәк, был уҡыуҙарҙа муниципаль район хакимиәтенең бөтә бүлектәре, төрлө хеҙмәттәр әүҙем ҡатнаша. Уҙған дүшәмбенән алып башлыҡтарға яңы положениелар, закондар, эшҡыуарҙар менән эшләү, килешеүҙәр төҙөү тураһында Башҡортостан Республикаһы Тәбиғәттән файҙаланыу һәм экология министрлығы Сибай төбәк комитетының Баймаҡ бүлеге эксперт-белгесе Ғ.Р. Сафиуллин,  “Башҡортостан Республикаһы халыҡтары телдәре тураһында”ғы БР законын тормошҡа ашырыу, “Урындағы хакимиәт башлығының персональ менеджменты” һ.б. хаҡында муниципаль район хакимиәтенең мәғлүмәт-аналитика бүлеге начальнигы Р.В. Ишембәтов лекция һөйләгән.

Рейд

Аяғыҙ йәш йөрәктәрҙе,
йәки Үҫмерҙәргә хәмер һатһаң...

Үҫмерҙәрҙе енәйәтселектән, эскелек, наркомания, тәмәке тартыу кеүек алама ғәҙәттәрҙән һаҡлау өсөн күп төрлө профилактик операциялар үткәрелә. Баймаҡ эске эштәр бүлегенең балиғ булмағандар эштәре буйынса бүлек хеҙмәткәрҙәре үткәргән сираттағы рейдтар нәҡ ошо юҫыҡта булды.
Билдәле булыуынса, 21 йәшкә тиклемге йәштәргә—иҫерткес эсемлектәр, 18 йәшкә тиклемге балаларға тәмәке һатырға ярамай. Үкенескә ҡаршы, күп кенә сауҙа нөктәләре был законды урап үтергә тырыша.
Балиғ булмағандар эше буйынса бүлек инспекторы, полицияның өлкән лейтенанты Алина Марат ҡыҙы Рәхмәтуллина әйтеүенсә, 2—20 ғинуарҙа  районда “Балаларға, үҫмерҙәргә тәмәке, иҫерткес эсемлектәр һатыу һәм уларҙы был алама ғәҙәткә йәлеп итеүгә ҡаршы” йүнәлтелгән махсус профилактик операция үтте.

Хәтер

Яугир уҡытыусы
1945 йылдың онотолмаҫ Еңеү көндәре тарихта ҡала бара. Быуаттар үтһә лә халыҡтың тиңһеҙ батырлығы хәтерҙәрҙә мәңге һаҡланыр. Ә һуғыш һәм тыл ҡаһармандарыбыҙҙың сафтары, үкенескә күрә, йылдан-йыл һирәгәйә.
Үткәндәрҙе ҡәҙерләү – мәрхүмдәрҙең рухын иҫкә алыу ул. Ауылдашыбыҙ, яугир-уҡытыусы, йәмәғәт эшмәкәре Дауыт Лотфулла улы Баймөхәмәтов быға һис шикһеҙ лайыҡ. 1932-1933 йылдарҙа Иҫәндән эшкә ебәрелеп, ул Үрге Иҙристә совет мәктәбенең тәүге уҡытыусыһы була.

Редакция почтаһынан

Клуб гөрләй
“Халҡың йолаларын бел, ярат, ихтирам ит, киләсәк быуынға еткер!” – тип өйрәтә ололар йәш быуынды. Иң матур йолалар, байрамдар, тантаналы саралар, иҫтәлекле кисәләр тик мәҙәниәт йорттарында шаулап үтә. Был йәһәттән Басай ауылында клуб, Аллаға шөкөр, гөрләп тора. Халыҡ та әүҙем, ауылда таланттар ҙа күп. Шуға ла клуб мөдире Фирүзә Билгебаева рәхәтләнеп эшләй. 2007  йылдан ең һыҙғанып эшкә тотонған Фирүзә Шәрәфетдин ҡыҙы иң элек тәртипкә иғтибарын йүнәлтте,  таҙалыҡ булдырҙы. Клубҡа илке-һалҡы йөрөгән халыҡ өсөн был йорт хәҙер ял һәм уйын-көлкө урынына әүерелде. Йәштәр ҙә, ололар ҙа Фирүзә Шәрәфетдин ҡыҙының эшенән бик ҡәнәғәт, ул үткәргән һәр кисә күңелдәргә хуш килә. Еңеүҙең 65 йыллығына арналған “Театр яҙы-2010” район конкурсында беҙҙең клуб призлы урынға лайыҡ булды. Бында Фирүзә ханымдың, уның ҡулы аҫтында шөғөлләнгән ауыл халҡының өлөшө хәтһеҙ. Сәмле эш – йәмле эш, тигәндәй, Фирүзә Билгебаева тағы ла дәртләнеп, сәмләнеп эшләй башланы. Уға эшендә уңыштар, ғаилә именлеге теләйбеҙ.
Земфира Яхина.
Басай ауылы.

Халыҡ иғтибарына

Мәғлүмәт туплайбыҙ
Өфө яғыулыҡ-энергетика колледжының Баймаҡ филиалы үткән быуат урталарында ҡалабыҙҙа эшләгән тау-металлургия техникумының 80 йыллыҡ юбилейына әҙерләнә. Ошо маҡсатта эҙләнеү эштәре алып барыла, техникумдың музейын булдырыу өсөн документтар һәм экспонаттар йыйыла.
Тик 1932 йылдан 1949 йылға тиклем уҡыу йортоноң тәүге директорҙары булған Куклев, А.Т. Ғүмәров, Скуя, З.Ш. Уразаев, Смеловский, М.К. Гришин, Е.В. Кистяковский, А. Погосов, Скворцов тураһында мәғлүмәттәр туплауҙа ауырлыҡтар бар. Улар хаҡында информация бик аҙ. 1949 йылдан 1967 йылғаса эшләгән директорҙар Н.Ж. Йәмилев, А.А. Атанғолов, Ф.А. Ғәйнуллин, З.Я. Рыҫкилдин тураһында ғына мәғлүмәттәр һаҡланып ҡалған.
Эҙләнеү төркөмө ул кешеләр тураһында ниндәйҙер мәғлүмәткә эйә булыусыларҙың ярҙамына ышана һәм Баймаҡ ҡалаһы, Р. Ниғмәти урамы, 1 адресы буйынса колледжға мөрәжәғәт итеүҙәрен һорай. Телефондар: 3-21-07, 2-11-47.
Х. Балапанов,
төркөм етәксеһе.

20 янв. 2012 г.

Яңылыҡтар

Күсмә ҡабул итеү
20 ғинуарҙа сәғәт 11-ҙән район хакимиәтенең 301 бүлмәһендә (Баймаҡ ҡалаһы, С.Юлаев проспекты, 36) дәүләт заказдарын урынлаштырыу буйынса Башҡортостан Республикаһының Дәүләт комитеты рәйесе Новиков Сергей Владимирович граждандарҙы күсмә ҡабул итә. Алдан яҙылыу өсөн телефон: 3-10-07.
 
Хәүефһеҙ объект
Баймаҡ эске эштәр бүлеге хеҙмәткәрҙәре 17 ғинуарҙан 24 ғинуарға тиклем “Хәүефһеҙ объект” тип аталған профилактик операция үткәрә. Ул дәүләттең, граждандарҙың милкен енәйәти ҡул һуҙыуҙан һаҡлау, ошо йүнәлештә ҡылынған хоҡуҡ боҙоуҙарҙы асыу өсөн үткәрелә. “Хәүефһеҙ объект” профилактик операцияһына ҡағылышлы һорауҙары йәки тәҡдимдәре булған кешеләр 3-10-50, 2-16-54 телефондары буйынса шылтырата ала.  
 
Техниктар ярышҡан
Баймаҡ йәш техниктар станцияһында фәнни-техник, спорт-техник, коллектив эштәргә конкурс үткәрелгән. Унда район-ҡала мәктәптәренән 67 уҡыусы ҡатнашып, 49 эш ҡаралған. Балалар үҙҙәренең эшен яҡлап сығыш яһаған. Владислав Әмирханов (Ҡуянтау), Айбулат Ҡазаҡбаев (3-сө мәктәп), Илгиз Мырҙабулатов (Темәс), Лилиә Йәнәлина, Рузилә Йәндәүләтова (4-се мәктәп) еңеүсе тип табылған.
 
Хәтер кисәһе
Йомаш ауылында 15 йыл клуб мөдире булып эшләгән Фәрит Тойғоновтың Хәтер кисәһе үткәрелгән. Ул заманында 30-ҙан ашыу һуғыш ветеранынан торған ансамбль төҙөүе менән билдәле. Роза Саникина менән Гөлдәр Абдуллина алып барған фәһемле кисәлә 70-се йылдарҙың йырҙары яңғыраған, йомаштар Фәрит Тойғонов тураһындағы яҡты хәтирәләре менән уртаҡлашҡан.
 
Сәләмәт тәндә – сәләмәт рух
Йәштәр эштәре буйынса сектор хеҙмәткәрҙәре йәштәрҙе спортҡа ылыҡтырыу, уларҙы алама ғәҙәттәрҙән йолоп ҡалыу өсөн “Сәләмәт тәндә – сәләмәт рух” тип аталған күңелле старттар ойошторасаҡ. Ярыш ял паркында үтәсәк. Унда ҡала мәктәбе уҡыусылары үҙ-ара көс һынашасаҡ. Артабан спорт ярыштарына каникулға ҡайтасаҡ студенттар йәлеп ителәсәк.
Г. Иҫәнгилдина. 

Уларға рәхмәтлебеҙ
Ишейҙә төрлө мәҙәни саралар йыш үткәрелә. Ауыл халҡы байрамдарҙы ойоштороуҙа ярҙам күрһәткән Илдус Әбдрахманов, Азамат Исҡужин, Фәрзәнә Ҡотлобаева, Вәзимә Буранбаеваға ҙур рәхмәтен белдерә.
З. Ниғмәтуллина, клуб мөдире.

Мал ҡышлатыу

“Төп маҡсат – малсылыҡты үҫтереү”
Ҡасандыр төп тармаҡтар буйынса элекке позицияларын юғалтҡан, айырыуса малсылығы көрсөккә терәлгән “Рассвет” АХК-һының һуңғы йылдарҙа производствоны үҫтереү йүнәлешендә етди һынылыш яһауы, иң артта һөйрәлеүселәр рәтенән бөгөн тотороҡло эшләүсе хужалыҡтар сафына баҫыуы иғтибарға лайыҡ. Йәш, әммә етерлек эш тәжрибәһе булған белгесте – А.Б. Шәриповты кооперативҡа етәксе итеп тәғәйенләү үҙ һөҙөмтәләрен бирҙе – “Рассвет” АХК-һы әле ауыл хужалығы производствоһын ойоштороуҙа районда лайыҡлы урын биләй һәм күп күрһәткестәр буйынса  башҡаларға өлгө булып тора.

Мал ҡышлатыу миҙгеленә хужалыҡ йылдағыса тейешле кимәлдә әҙерләнде. Тупланған 720 т бесән, 2900 т сенаж, 350 т силос һәм 460 т фураж 585 баш һыйыр малын, шул иҫәптән 250 һауын һыйырын, имен ҡышлатыу һәм уларҙан яҡшы продукция алыу мөмкинлеген бирә. Мал аҙығының сифаты ла юғары, ул 1-се класс талаптарына яуап бирә.

Һайлау – 2012

Яңы саралар ҡулланыласаҡ
“Рәсәй Федерацияһы Президентын һайлау тураһында”ғы федераль Закондың 20-се статьяһына ярашлы, Рәсәй Федерацияһы Үҙәк һайлау комиссияһының 2011 йылдың 28 декабрендәге “Рәсәй Федерацияһы Президенты һайлауында тауыштарҙы һанағанда техник саралар – һайлау бюллетендәрен эшкәртеү комплекстарын ҡулланыу тураһында”ғы бойороғона нигеҙләнеп, Башҡортостан Республикаһы Үҙәк һайлау комиссияһы республиканың 178 һайлау участкаһына һайлау бюллетенен эшкәртеү комплексы (КОИБ) урынлаштырырға ҡарар итте. Беҙҙең районда КОИБ-тар 5 участкала: Темәстә икәү, Билалда, Ниғәмәттә һәм Түбәлә ҡуйыласаҡ.
Шулай уҡ тағы ла бер яңылыҡ: Рәсәй Федерацияһы Үҙәк һайлау комиссияһының 2011 йылдың 27 декабрендәге “2012 йылдың 4 мартында Рәсәй Федерацияһы Президенты һайлауҙарында тауыш биреү биналарында видеокүҙәтеү тәртибе тураһында”ғы 82/635-6-сы ҡарарына ярашлы, барлыҡ һайлау участкаларында ла видеокүҙәтеү саралары ҡулланыласаҡ. Был медицина учреждениеларындағы, хәрби частарҙағы, ғәйепләнеүселәр тотолған урындарҙағы, поляр станцияларҙағы, алыҫ һәм барып етеүе ҡыйын булған урындарҙағы һайлау участкаларына ғына ҡағылмай.
Алынған видеояҙмалар трансляцияһы Интернет селтәре сайтында башҡарыласаҡ. Трансляция ваҡыты – участка һайлау комиссияһы эшләй башлағандан алып урындағы ваҡыт менән киске сәғәт һигеҙгә тиклем һәм Мәскәү ваҡыты менән киске туғыҙҙан алып һайлау эшмәкәрлеген тамамлағанға тиклем.  
Һайлаусылар видеокүҙәтеү хаҡында алдан иҫкәртеләсәк. Тауыш биреү биналарына ингәндә, шулай уҡ эстә лә күренгән урында “Бинала видеокүҙәтеү алып барыла” тигән яҙыулы А4 форматындағы табличкалар эленәсәк.
Сәлимә Кейекбирҙина.

Ултырыштар

Йәмәғәт советы эшен дауам итә
Рәсәй Федерацияһы Эске эштәр министрлығының Баймаҡ районы буйынса бүлеге янында Йәмәғәт советы ойошторолоуы һәм уның беренсе ултырышы хаҡында гәзитебеҙҙә декабрь айында мәғлүмәт булғайны. Ошо шишәмбелә был йәмәғәт ойошмаһы ағзалары сираттағы ултырышҡа йыйылды. Уны советтың рәйесе И. Ҡыуатов алып барҙы.
Кәңәшмәлә эште ниндәй юҫыҡта дауам итеү, хоҡуҡ һаҡлау йүнәлешендә башҡарыласаҡ бурыстар, тәртип боҙоу осраҡтарын иҫкәртеү тураһында төрлө фекерҙәр һәм аныҡ тәҡдимдәр яңғыраны. Мәҫәлән, ошо көндәрҙә район хакимиәте бинаһының беренсе ҡатында граждандарҙан Йәмәғәт советына булған мөрәжәғәттәрен ҡабул итеү өсөн махсус йәшник ҡуйыласаҡ. Унда район һәм ҡала кешеләренә хоҡуҡ һаҡлау өлкәһендә үҙҙәрен борсоған һорауҙарын, тәҡдимдәрен, ялыуҙарын ҡалдырырға мөмкин. Ул мөрәжәғәттәр Йәмәғәт советы ултырыштарында ҡараласаҡ һәм эске эштәр бүлеге етәкселеге менән берлектә контролгә алынасаҡ, хәл итеү юлдары өйрәнеләсәк.
Ғөмүмән, йәмәғәт ойошмаһы граждандарҙың хоҡуҡтарын яҡлауға үҙ өлөшөн индерер һәм был йәһәттән ҡулдан килгәндең барыһын да эшләр тип ышанғы килә.
Үҙ хәбәрсебеҙ.

Халыҡ иғтибарына

Пенсия өҫтәмәләре арта
2012 йылдың 1 ғинуарынан республикабыҙҙың 123 меңдән ашыу эшләмәүсе пенсионеры пенсияларына федераль социаль өҫтәмә ала башланы. Был беҙҙең райондың 3626 пенсионерына ҡағыласаҡ.
Өҫтәмә түләүҙең был төрө эшләмәүсе пенсионерҙарға беренсе тапҡыр 2010 йылдың 1 ғинуарында тәғәйенләнгәйне. Һәр пенсионерға социаль өҫтәмә түләү күләме төрлөсә һәм ул пенсия күләменә, аҡсалата айлыҡ түләүенә, төбәк түләүҙәренә бәйле. Әгәр уларҙың суммаһы билдәләнгән йәшәү минимумынан түбән булһа, социаль өҫтәмә түләү тәғәйенләнә.
Башҡортостан Республикаһында 2012 йылға пенсионерҙар өсөн йәшәү минимумы 5220 һум тип билдәләнде.
2012 йылдың 1 ғинуарынан Башҡортостандың барлыҡ пенсионерҙарына ла (әгәр 2010-2011 йылдарҙа уларға федераль социаль түләү тәғәйенләнгән булһа) өҫтәмә түләүҙең яңы күләме Пенсия фонды органдарында һәм халыҡты социаль яҡлау органдары мәғлүмәттәренә нигеҙләнеп автоматик рәүештә башҡарыласаҡ.
Һорауҙарығыҙ булһа 3-18-70 телефонына шылтыратығыҙ.
Р. Мараканова,
Пенсия фонды идаралығы начальнигы.

Коммуналь хужалыҡтарҙа

Төҙөкләндереү эштәре әүҙемләшә
Баймаҡ ремонт-төҙөлөш идаралығы ҡаланы төҙөкләндереүгә ҙур көс һала. Урамдарҙы яҡтыртыу, ҡарҙан таҙартыу, ҡоймаларҙы яңыртыу... Һанап кителгәндәр тынғыһыҙ коллективҡа йөкмәтелгән бихисап эштәрҙең бер нисәүһе генә.
Баймаҡта ойошторолған урам комитеттары рәйестәре менән берлектә эшләү үҙенең һөҙөмтәһен бирмәй ҡалмай.  Улар менән булған осрашыуҙа күтәрелгән бөтә һорауҙар, үтенестәр, ялыуҙар буйынса етди саралар күрелә. Ошо йәһәттән Салауат Юлаев проспектында, Йәштәр, Ҡарлы, Әлибаев, Рәсәй, Сөләймәнов урамдарында тәүлектең ҡараңғы ваҡытында яҡтыртыу өсөн бағаналарға лампалар ҡуйылды. Киләһе айҙарҙа көс Кәкрауыл биҫтәһенә, шулай уҡ ҡаланың көньяҡ-көнсығыш микрорайондарына йүнәлтеләсәк, бында ла урамдарҙы тулыһынса яҡтыртыу планлаштырыла.

Берәҙәк эттәр – көнүҙәк проблемаларҙың береһе. Бөгөн улар халыҡҡа ҙур хәүеф менән янай. Ошо көндәрҙә эттәрҙе “йоҡлатыу”ға тәғәйенләнгән махсус ике ҡорал һатып алынған. Был уларҙан ҡотолорға ярҙам итер, моғайын.
Ҡала урамдарын ҡарҙан таҙартыу – ҡышҡы миҙгелдә идаралыҡтың көндәлек эше. Был тәңгәлдә етди саралар күрелә. Күптән түгел алынған ике берәмек техниканың көсө тулыһынса файҙаланыла. Ошо көндәрҙә Көньяҡ микрорайонының Бөрйән урамында автобус туҡталышы павильоны урынлаштырыласаҡ. Көндәр йылыныу менән мосолман зыяратының ҡоймалары ла тулыһынса яңыртыласаҡ.
Баймаҡ ремонт-төҙөлөш идаралығы көсө менән Салауат Юлаев исемендәге ял һәм мәҙәниәт паркы артындағы Таналыҡ боҙонда балалар өсөн төҙөлгән һырғалаҡты күптәр яратып өлгөрҙө. Ул март баштарына тиклем эшләйәсәк. Ләкин кемгәлер был матурлыҡ һәм уңайлыҡ оҡшамай, буғай: прокат пунктын емереп асып, ун пар коньки, тюбингтарҙы урлағандар! Был эш буйынса әле эҙләү-тикшереү бара. Тап ошондай ҡырағайҙарса мөнәсәбәт ҡалабыҙҙың үҫешенә ҙур аяҡ сала ла инде. 
Идаралыҡтың ҡаланы төҙөкләндереү буйынса пландары ярайһы ҙур ғына. Улар тормошҡа ашҡан осраҡта халыҡҡа бихисап өҫтәмә эш урындары буласаҡ. БРСУ директоры И.И. Ғәтиәтов уларҙы әлегә сер итеп ҡалдырыуҙы һораны.
Баймаҡ ремонт-төҙөлөш идаралығының әлегәсә ныҡлы ғына биләгән бинаһы юҡ. Шул йәһәттән бөгөн улар элекке Түбә руднигы идаралығының базаһын ремонтлай башлаған. Ә әлегә Инфар Ильяс улы бөтә булған һорауҙар, тәҡдимдәр, ялыуҙар менән 2-14-44 телефондары аша мөрәжәғәт итеүҙәрен һораны.
Л. Разгилева.
Автор фотоһы.