18 янв. 2012 г.

Әсә – бөйөк исем

Мөршиҙә Әнүәр ҡыҙы Йәндәүләтова – ун балаға ғүмер бүләк иткән бәхетле әсә. Маҡтанырға ла хаҡы бар уның: биш улы, биш ҡыҙы матур тәрбиә алып үҫеп килә. Тормош иптәше Миндәүләт менән бына 23 йыл татыу ғүмер итәләр. Был ғаиләлә үҫкән балалар изге күңелле, шат һәм бөхтә булыуы менән айырылып тора. Йыр-моңға ла маһир улар: өҙҙөрөп йырлайҙар һәм бейейҙәр. Йәндәүләтовтар ғаиләһендә һәр саҡ татыулыҡ хөкөм һөрә, балалар бер-береһенә ҡарата ихтирамлы, иғтибарлы, ярҙамсыл, эшсән һәм тырыш. Өй эсе таҙа, күркәм, бөтәһе лә үҙ урынында, әйтерһең дә яңғыҙ бала тәрбиәләнә. Балаларҙа ошо күркәм сифаттарҙы тәрбиәләүҙә атай кеше Миндәүләттең һәм Мөршиҙәнең роле баһалап бөткөһөҙ. Иң оло яуаплылыҡ, әлбиттә, әсә иңенә төшә.
Бала, ғаилә өсөн түккән көсөн, хеҙмәтен баһалап, бөтәбеҙ ҙә әсәгә оло хөрмәт менән ҡарайбыҙ. Мөршиҙә Әнүәр ҡыҙы ла “Әсәлек даны” миҙалы менән бүләкләнде, ғаиләгә “Газель” автомашинаһын да бирҙеләр.
10 бала әсәһе Мөршиҙә Йәндәүләтоваға алдағы тормошонда, эшендә уңыштар, көслө рухлы, һәр ваҡыт шулай изге күңелле, сәләмәт булыуын, балаларының игелеген күреп, ҡәҙер-хөрмәткә төрөнөп, бәхетле йәшәүен теләйбеҙ.


Гөлфирә КИЛДЕҒОШОВА.
Сәйғәфәр ауылы.

Комментариев нет:

Отправить комментарий

Примечание. Отправлять комментарии могут только участники этого блога.