23 сент. 2012 г.

95 йәшең менән, Хәжәр инәй !


Оҙаҡ йылдар ғүмер иткән, тормошон хеҙмәт менән биҙәгән инәй-олатайҙар һәр кемгә үрнәк булырлыҡ. 17 сентябрҙә 95 йәшен билдәләгән Хәжәр Мәһәҙи ҡыҙы Һөйөндөкованы ла ошондай бәхетле кешеләр рәтенә индерергә була. Хәҙерге көндә ул ҡыҙы Нәзифә Һөйөндөкова менән Ниғәмәт ауылында гөрләтеп донъя көтә. Ҡышҡы сатнама һыуыҡтар килеү менән Баймаҡ ҡалаһынан сертификат буйынса алған фатирҙарына күсенәләр. Йәй – ауылда, ҡыш ҡалала матур, татыу йәшәйҙәр, ейән-ейәнсәрҙәр, бүлә-бүләсәрҙәр тәрбиәләйҙәр.
 

Тыуған көнөндә Хәжәр инәйҙе район хакимиәте башлығы урынбаҫары И.М. Йәндәүләтов, район ветерандар советы рәйесе Т.Ш. Бикҡолов, хеҙмәт һәм халыҡты социаль яҡлау идаралығының бүлек начальнигы урынбаҫары Р.И. Рәсүлева, район ҡатын-ҡыҙҙар советы рәйесе Л.Ҡ. Дәүләтшина, Ниғәмәт ауыл биләмәһе башлығы Ф.Ғ. Вәхитова һ.б. тәбрикләне. Хәжәр инәй һәм уның яҡындары өсөн иң тулҡынландырғыс мәл ул – РФ Президенты В.В. Путиндың ҡотлау открыткаһын тапшырыу булғандыр. Унда: “Һеҙҙең тормошоғоҙ, фиҙаҡәр хеҙмәтегеҙ йәш быуынға өлгө, беҙ һеҙҙең ҡаһарман үткән юлығыҙ алдында баш эйәбеҙ”, – тигән юлдар бар ине.
 
Шуныһы әһәмиәтле, Хәжәр Мәһәҙи ҡыҙының Ғәбиҙә исемле бер туған апаһы 113 йәшкә тиклем йәшәгән. Шулай уҡ 99 йәшкә тиклем ғүмер иткән туғандары бар. Хәжәр инәй ауыр йылдарҙа алһыҙ-ялһыҙ колхозға хеҙмәт итә. Балалары әйтеүенсә, уның иркенләп йоҡлаған сағын да күрмәйҙәр – әсәләре һәр саҡ эш менән мәшғүл була. 9 бала тәрбиәләп үҫтергән әсәнең әле лә хәтере бик яҡшы булыуы һоҡландырҙы. Әсәһен ҡәҙер итеп, ысын күңелдән тәрбиәләгән Нәзифә апай ҡәҙерле кешеһенең тыуған көнөн өҫтәл тулы һый-ниғмәт менән ҡаршы алды. Беҙ ҙә Һөйөндөковтарҙың шатлыҡ-ҡыуанысына ҡушылып, хөрмәтле Хәжәр инәйҙең оҙон-оҙаҡ бәхетле йәшәүен теләйбеҙ.
 
Гүзәл ИҪӘНГИЛДИНА. 
Автор фотоһында: Хәжәр инәйгә В.В. Путиндың ҡотлауы тапшырыла.

Комментариев нет:

Отправить комментарий

Примечание. Отправлять комментарии могут только участники этого блога.