12 сент. 2012 г.

Яңылыҡтар


Октябрҙә нисек ял итәбеҙ?

    Октябрҙә Башҡортостанда ике ҙур байрам: 11 октябрь – Республика көнө һәм 25 октябрь – Ҡорбан байрамы билдәләнәсәк. Ошо көндәр ял тип иғлан ителде.
     Быйыл байрамдар кесе йомаға тура килә. Рәсәйҙең Хеҙмәт кодексына ярашлы, шаршамбы, йәғни 10 һәм 24 октябрҙә эш ваҡыты бер сәғәткә ҡыҫҡартыла. Байрам көндәре йыллыҡ төп һәм өҫтәмә түләүле отпуск иҫәбенә индерелмәй.

“Һөт иле-2012”

     Бөгөн Өфөлә “Һөт иле-2012” 4-се Бөтә Рәсәй фестивале һәм һөт тармағы предприятиелары вәкилдәре ҡатнашлығында Бөтә Рәсәй кәңәшмәһе үтә. Унда беҙҙең райондан Баймаҡ ПМК-һының “Толпар” ЯСЙ-һы һәм “Башҡорт деликатестары” ит комбинаты ҡатнаша, үҙҙәренең продукцияларын тәҡдим итә.

“Әйҙәгеҙ, бергә эшләйек!”

     15 сентябрҙә Башҡортостан Республикаһында киң масштабта “Let`s Do it! World Cleanup 2012”, йәғни “2012 – Бөтә донъяны йыйыштырыу: әйҙәгеҙ, бергә эшләйек!” граждандар акцияһы үтәсәк. Ул “Let`s Do it!” берләшкән граждандар хәрәкәтенең төрлө илдәге волонтерҙары инициативаһы менән ойошторолған акция. Был көндө бөтә ойошма, учреждение, предприятие коллективтарын үҙ биләмәләрен сүп-сарҙан таҙартыуға саҡырабыҙ. Халыҡ-ара экологик акциянан бер кем дә ситтә ҡалмаҫ, тип ышанабыҙ.
      БР Тәбиғәтте файҙаланыу һәм экология министрлығының Сибай территориаль комитеты.

Ветерандар йыйыла

     14 сентябрҙә иртәнге сәғәт 11-ҙә ҡаланың 4-се мәктәбендә  Афғанстан һәм Төньяҡ Кавказдағы хәрби хәрәкәттәрҙә ҡатнашыусыларҙың дөйөм йыйылышы үткәрелә.

«ЫШАНЫС ТЕЛЕФОНЫ»




     Үҫмер балалар һәм йәштәр араһында суицид йәки башҡа төр кризис буйынса профилактика эштәре алып барыу маҡсатында тәүлек әйләнәһенә “Ышаныс телефоны” эшләй. Шылтыратыу бушлай. Т. 8 (347) 273-09-00.

Яңы нигеҙ ҡотло булһын!


     Һигеҙ ғаиләгә асҡыс тапшырылды


  Әҙәм балаһына бәхетле булыу өсөн яратҡан эш һәм, әлбиттә, тормоштоң ел-дауылынан ышыҡ тапҡан, йылы ғаилә усағы дөрләп янған үҙ йорто кәрәк.     

 7 сентябрҙә район хакимиәте башлығы И.Х. Ситдыҡовтың ҡулынан яңы фатирҙарҙың асҡысын алған ғаиләләр ҙә шатлыҡлы күҙ йәштәрен йәшерә алманы. Был кешеләр ҡаланың Еңеү урамы, 2-се йортта йәшәйҙәр ине. Билдәле булыуынса, ул йорт ныҡ иҫкергән һәм йәшәү шарттары ла насарайған.