Яңылыҡтар

“Йәшел ураҡ” көндәлеге

Кисәге көнгә районда үлән 9085 гектарҙа сабылған (41%), 2642 тонна бесән (19%), 3410 тонна сенаж (14%) әҙерләнгән. Иң күп мал аҙығы Ленин исемендәге (шартлы һәр баш малға ҡарата 8,8 центнер аҙыҡ берәмеге тура килә), “Рассвет” АХК-ларында (5,9 ц) тупланған.

  

Районда – археологтар

Яңыраҡ Семеновск ауылы янында, Ирәндек итәгендә 25 кешенән торған археологик экспедиция үҙ эшен башланы. Бында БДУ, БДУСИ-ның юридик факультетының “Тарих” бүлеге студенттары, 24-се һөнәрселек лицейы уҡыусылары һәм Өфөнән килгән ғилми хеҙмәткәрҙәр бер нисә боронғо ҡурған тапты. Эҙләнеү эштәре район биләмәһендә “Ирәндек” тарих-археология һәм ландшафт музей-ҡурсаулығы проектын тормошҡа ашырыу сиктәрендә үткәрелә. Әлегә бында бронза быуатҡа (яҡынса беҙҙең эраға тиклемге XVIII - XV быуаттарға) ҡараған бала, үҫмер, оло кеше ерләнгән урындар табылған. 

Мәсет төҙөлә

Бетерә ауылында ағалы-ҡустылы эшҡыуарҙар Тимур һәм Илсур Нәбиуллиндарҙың көсө менән яңы мәсет төҙөлә. Уның имам-хатибы итеп ауыл сходында Динислам Камалетдинов һайланған. Иман йортон 23 августа рәсми асыу күҙ уңында тотола.

  

Страховка иғәнәләрен түләүселәргә

Пенсия фонды идаралығы раҫланған график буйынса 2 июлдән 15 авгусҡа ҡәҙәр 2012 йылдың тәүге ярты йыллығына мәжбүри пенсия һәм медицина страхованиелары өсөн күсерелгән һәм түләнгән страховка иғәнәләре буйынса иҫәптәрҙе һәм 2012 йылдың тәүге яртыһына шәхси белешмәләрҙе ҡабул итә башланы. Отчет тапшырыу сроктарын  боҙған страховка иғәнәләрен түләүселәргә ҡарата закон буйынса штраф санкциялары ҡулланыу ҡаралған. 

Баймаҡ ҡалаһы, Юбилей урамы, 32”а” адресы буйынса, 301, 303, 304-се кабинеттарға мөрәжәғәт итергә, телефондар: 3-18-09, 3-18-67.

Беҙҙекеләр һынатманы

Ғафури районында хәрби хәрәкәттәрҙә ҡатнашыусыларҙың республика слеты үтте. Унда Сәғит Мирзин етәкләгән Баймаҡ  командаһы әүҙем ҡатнашты һәм еңеү яулап ҡайтты. Футбол буйынса беҙҙекеләр – өсөнсө, гер спорты, армрестлинг, атыу  буйынса иң көслөләре булып танылды. Баймаҡтар йыр-моңдары менән дә башҡаларҙы таң ҡалдырҙы.