Халыҡ иғтибарына

Һыу ингәндә һаҡ булығыҙ!

1 июндә республикала һыу инеү миҙгеле рәсми асылғайны. Пляждарҙы һәм күмәк ял итеү урындарын һыу инеү миҙгеленә әҙерләү, халыҡтың хәүефһеҙлеген тәьмин итеү өсөн уларҙың хужалары (шәхси эшҡыуарҙар, ойошмалар һәм муниципаль берәмектәр) яуап бирә.

Яңылыҡтар

Эшлекле сәфәр

Беҙҙең районда эш сәфәре менән Башҡортостан Республикаһы ЗАГС идаралығы начальнигы урынбаҫары С.И. Малинская булып китте. Ул оҙаҡламай Никах йортона әйләнәсәк Баймаҡ ҡойоу-механика заводының элекке клубы бинаһын ҡараны, башҡарыласаҡ эштәр менән танышты. Уны муниципаль район хакимиәте башлығы И.Х. Ситдыҡов оҙатып йөрөнө.

Комбинат сафҡа инәсәк

Темәс ауылында һөт комбинаты төҙөлөшө йылдам бара. Төп подрядсы – “Баймаҡ ПМК-һы” ЯСЙ-һы эшселәре тарафынан бинаның стеналарын күтәреү эше тамамланған. Хәҙерге ваҡытта сэндвич-панелдәрҙән түбә һалына, ошо арала ҡыйығын ябыуға тотонмаҡсылар. Дөйөм алғанда, был объектты төҙөү өсөн 186 миллион һум тирәһе аҡса бүленде һәм ул август айында файҙаланыуға тапшырыласаҡ, тип күҙаллана. 

Концертҡа рәхим итегеҙ!

“Ислам экстремизмға ҡаршы” акцияһы сиктәрендә 13 июлдә – Баймаҡта, 14-ендә – Темәстә, 16-һында  – Ишмөхәмәт ауылында  “Иң изге теләктәр менән” тип аталған бушлай концерттар үтәсәк. Унда Хәсән Усманов, Роберт Юлдашев, Фәнис Солтанғолов, Тимур Вәлитов, Илгиз Абдрахманов, Зилиә Бәхтиева, Ләйсән Моталлапова һ.б. сығыш яһаясаҡ.

Тәүге урындар – беҙҙеке

29 май – 30 июндә декоратив биҙәү-ҡулланма сәнғәт буйынса «Йондоҙло проект» тип аталған Бөтә Рәсәй асыҡ интернет конкурсы үтте. Унда беҙҙең балалар ижады үҙәге тәрбиәләнеүселәре, 4-се мәктәп уҡыусылары – Әлиә  Исҡужина, Анастасия Васильцова, Нурсилә Дәүләтшина,  Гөлназ Рәхимова, Алина Исҡужина, Зөбәржәт Акилова, Нурзиә Нурғәлина (педагогтары – Г. Рәхимова һәм З. Шәрипова) – ҡатнашып, беренсе һәм икенсе дәрәжәле дипломдарҙы яуланы.  Шулай уҡ етәксе Гөлфиә Рәхимованың «Тылсымлы йомғаҡ» тип аталған эше етәкселәр араһында ойошторолған «Профи» категорияһы буйынса беренсе дәрәжәле дипломға лайыҡ булды.

“Йәшел ураҡ”

Етерлек аҙыҡ туплау – төп бурыс
Шулай тип иҫәпләй ҡуянтауҙар

Йылдың ҡоро килеүе, көндәрҙең эҫе тороуы аграрийҙарға ҡаты һынау ҡуя. Бөгөн малсылыҡ тармағын ҡышҡа әҙерләү, уға етерлек аҙыҡ запасы туплау – иң актуаль бурыстарҙың береһе. Булған ауырлыҡтарға ҡарамаҫтан, райондың ауыл хужалығы предприятиеларында, КФХ-ларҙа бөтә көс мал аҙығы әҙерләүгә йүнәлтелгән. Кисәге көнгә алынған мәғлүмәттәргә ҡарағанда, район буйынса 2263 тонна бесән (планға ҡарата 16 процент), 3380 тонна сенаж (14 процент) һалынған.

Сәйәсәт

Праймериз үтте

Билдәле булыуынса, ошо көндәрҙә район буйынса муниципаль район Советына депутатлыҡҡа дәғүә итеүсе кандидаттар араһында праймериз үтә. Был процедура “Берҙәм Рәсәй” партияһы тарафынан һайлауҙарға лайыҡлы кандидаттарҙы сығарыу маҡсатын күҙ уңында тотоп башҡарыла.

Закон һәм беҙ

Ҡайҙа һыра һатырға ярамай?

1 июлдән стационар булмаған һатыу нөктәләрендә һыра һатыуҙы тыйған федераль закон үҙ көсөнә инде. Уға ярашлы, барлыҡ йәмәғәт урындарында, урамдарҙа, парктарҙа, күп фатирлы йорттарҙың подъездарында, баҙарҙарҙа һ.б. һыра эсеү тыйыла. Был эсемлекте өйҙә йәки йәмәғәт туҡланыу урындарында ғына ҡулланырға мөмкин. Шулай уҡ һыраны балалар, спорт һәм белем биреү учреждениелары янында һатыу ҙа тыйыла. Сикләү ҡалаларҙа йәшәүсе халыҡтың йәйге миҙгелдә популяр ял итеү урыны булған кафеларға һәм стационар сауҙа предприятиеларының йәйге террасаларына ҡағылмай.

Һорау—яуап

Байрам көндәрендә эшләһәң...

“Ял һәм байрам көндәрендә эшләгән  өсөн нисек түләнергә тейеш?”
Н. Баймаҡ ҡалаһы.

Һорауға район прокурорының өлкән ярҙамсыһы Т.Н. Соболева яуап бирә.
– РФ Хеҙмәт Кодексының 153-сө статьяһына ярашлы, ял һәм байрам көнөндә эшләү икеләтә түләнергә тейеш. Был эш күләменән түләү алған эшселәр, хеҙмәте сәғәтләп түләнеүселәр, хеҙмәт хаҡын айлап алыусыларға ла ҡағыла.

Фекер

Яу, яу, ямғырым!

Һуңғы йылдарҙа йәй айҙары әҙ ямғырлы килә йә бөтөнләй ҡоролоҡ була. Был, әлбиттә, халыҡта ҙур хәүеф уята. Нимә булды? Беҙ генә түгел, ғалимдар ҙа баш вата, төрлө фараз килтерә. Ер шарының тарихында сираттағы осормо, әллә һуңғы 100 йылдағы кеше эшмәкәрлегенә бәйлеме? Сәбәптәре бик күптер.

Конкурстар

Сәсәндәрен йыйҙы атайсал

...Тәбиғәт ҡосағы. Урал батыр рухы менән илһамланған балалар бер-береһен уҙҙырып мәшһүр эпосты яттан һөйләй. Был матур йола йыл да камиллаша бара: йылдан-йыл төрлө телдәрҙә генә һөйләнеп ҡалмай, милли музыка ҡоралдары оҙатыуында ла яратып башҡарыла. Бәйгене ойоштороусылар уның киләсәк өсөн ниндәй әһәмиәтле буласағын белеп, тойоп, шул тиклем оло эш башҡара. Уның 13 йыл үткәрелеү дәүерендә байтаҡ тәрбиәләнеүселәре үҫеп сығып, төрлө өлкәне әүҙем яулай.

Мәҙәниәт

Көйөргәҙелә – ҡурайсылар йыйыны

Ҡурай әүәл-әүәлдән башҡорт халҡының ҡорҙа – моңдашы, яуҙа юлдашы булған. Ҡурай моңо быуындан-быуынға тапшырылып, халҡыбыҙҙың йөҙөн һәм йәшәйешен сағылдырып килә. Республикабыҙҙа милли музыка ҡоралы сәнғәтен артабан үҫтереү, яңы үрҙәргә күтәреү маҡсатында төрлө бәйгеләр, саралар йыш үткәрелә.

Cуд залынан

Балаҡайы ҡулдарынан килгән әжәл

Судтың башланыуын ауыр уйҙар менән шомланып көттөм. Ниңәлер бындай фажиғәнең яныбыҙҙа ғына булыу мөмкинлегенә һаман ышанып етмәй инем. Әсәһен үлтергән ҡыҙҙы төрлөләп күҙ алдыма килтереп ҡараным. Юҡ, булмай. Эйе, яңы тыуған сабыйҙарын ҡар өҫтөндә ҡалдырған йә һыуға һалып тонсоҡторған “әсәләр” тураһында ишеткәнебеҙ бар. Әммә һине бәпләп-яратып аяҡҡа баҫтырған, төн йоҡоларын ҡалдырып һине бәүеткән, шифалы күкрәк һөтөн имеҙеп үҫтергән донъялағы иң ғәзиз кешеңә ҡул күтәреүе мөмкинме икән? Әллә йыш ҡабатларға яратҡан “Ҡурҡыныс ваҡытта йәшәйбеҙ” тигән һүҙҙәребеҙ фәрештәләрҙең “амин” тигән сағына тура килеп тик торамы? Әсәһенә ҡул күтәргән бала, бәлки, психик яҡтан ауырыуҙыр, тип тә уйланым. Шулай ҙа оҙайлы ваҡытҡа һуҙылған судтың башынан аҙағына тиклем был ниндәйҙер хата булыуына, барыһы ла асыҡланып, ҡыҙҙы аҡлаясаҡтарына өмөтләндем...

Яңылыҡтар

Ҡотлайбыҙ!

Яҡташтарыбыҙ: БР Дәүләт Йыйылышы – Ҡоролтай секретариаты етәксеһе З.И. Еникеев һәм БР Төбәк тикшеренеүҙәр институты директоры Й.Т. Һөйөндөков Башҡортостан Республикаһы ғилми берләшмәһе тарафынан БР Фәндәр академияһының ағза-корреспонденттары итеп һайланды.

Беҙҙекеләр – еңеүсе!

Үткән шәмбе Силәбе өлкәһенең Красноармейск районындағы Дубровка ҡасабаһында 3-сө Бөтә Рәсәй ауыл һабантуйы үтте. Был һабан байрамында Президент Р.З. Хәмитов етәкселегендә Башҡортостан Республикаһы делегацияһы ла ҡатнашты. Уның составында район хакимиәте башлығы И.Х. Ситдыҡов та барҙы.

Милли-спорт байрамының төп тамашаһы булған ат ярыштарында баймаҡтар ҙа әүҙем ҡатнашты һәм ҙур еңеү яулап ҡайтты. Бөтә Рәсәй һәм халыҡ-ара ат спорты ярыштары еңеүселәре һынау тотҡан был бәйге бик көсөргәнешле үтте. Унда “Баймаҡ” ғилми-производство берекмәһенең Хорватка (һыбайлыһы С.Таймасова) ҡушаматлы менге аты 2000 метр араға уҙышыуҙа маҡтаулы өсөнсө урынға лайыҡ булды.

Күпме әҙерләнгән?

Районда мал аҙығы әҙерләү дауам итә. Кисәге көнгә бөтәһе 1824 тонна бесән, 3380 тонна сенаж тупланған. Әйтергә кәрәк, уның барышы бик түбән. Тик Ленин исемендәге (шартлы һәр малға ҡарата 8,3 центнер аҙыҡ берәмеге әҙерләнгән), “Рассвет” (5,7 центнер) АХК-ларында ғына хәл тотороҡло. Ә бына “Йылайыр”, “Уңыш”, Салауат исемендәге, “Таналыҡ”, “Аҡморон” хужалыҡтарында һалынған аҙыҡ күләме бик аҙ.

Тирә-яҡ мөхитте тикшереү өсөн

Мәғлүм булыуынса, БДУ-ның Сибай институты 1998 йылдан Санкт-Петербург Дәүләт университеты менән хеҙмәттәшлек итә. БДУСИ тамамлағандар төньяҡ баш ҡалала артабан уҡый, Питер студенттары шулай уҡ районға практикаға килә.

Яңыраҡ география факультеты студенттары тау-сәнәғәт предприятиелары эшмәкәрлегенең тирә-яҡ мөхиткә йоғонтоһон тикшереү маҡсатында Күлтабан, Талҡаҫ күлдәре, Ҡарағайлы йылғаһы, Калинин һәм Моҡас ауылдары янындағы ерҙәрҙә булды. Бындай ялан практикаһы йыл да үтә, студенттар уҡыу осоронда бар илде урап сыға.

Рәсми бүлек

Праймериз алдынан

 

Баймаҡ районында 10, 11 һәм 12 июлдә район Советына депутатлыҡҡа дәғүә иткән кандидаттарға алдан тауыш биреү процедураһы үтәсәк. Ошо сәйәси сара алдынан муниципаль район хакимиәтенең ултырыштар залында ауыл биләмәләре башлыҡтары, эштәр идарасылары, иҫәп комиссиялары рәйестәре һәм секретарҙары һ.б. ҡатнашлығында инструктив кәңәшмә үтте.