Рәсми бүлек

Район Советы ултырышы үтте

Кисә халыҡ ижады үҙәгендә Баймаҡ районы муниципаль район Советының 40-сы ултырышы үтте. Ултырышты район Советы рәйесе Д.Ю. Сәйғәфәрова алып барҙы. Уның эшендә муниципаль район хакимиәте башлығы И.Х. Ситдыҡов ҡатнашты.
Көн тәртибенә алты мәсьәлә сығарылды. Иң тәүҙә 2011 йылдағы район бюджетының үтәлеше, “2012 йылға  Баймаҡ районы муниципаль районы бюджеты тураһында”ғы 357-се ҡарарына үҙгәрештәр индереү кәрәклеге тураһында хакимиәт башлығының финанс мәсьәләләр буйынса урынбаҫары Р.И. Сирғәлин сығыш яһаны. Былтыр район бюджетының 91 процентын һалымдар тәшкил итһә, ҡалған 9 проценты башҡа йыйымдар. План 112 процентҡа үтәлгән. Халыҡтың йән башына иҫәпләгәндә, алынған килем республика буйынса уртаса күрһәткестәргә ҡарағанда күпкә түбән.

Артабан 2012-2013 йылдарҙа муниципаль райондың дөйөм белем биреү учреждениелары селтәрен оптималләштереү программаһын бойомға ашырыу хаҡында мәғариф бүлеге начальнигы Р.Ф. Ильясов һөйләне. Әлеге ваҡытта мәктәптәр ҡаланың, бигерәк тә ауылдарҙың белем биреү учреждениеһы ғына түгел, мәҙәни, социаль, ижтимағи үҙәк тә булып тора. Был өлкәләге үҙгәрештәр, йәғни оптималләштереү процесы ике яҡлы. Финанс яҡтан был үҙен аҡлаһа, икенсе яҡтан эш урындарының ҡыҫҡарыуына килтерә, башҡа мәшәҡәттәр ҙә өҫтәй. Хәҙерге көндә 351 эш урыны ҡыҫҡартылған, шуларҙың 115-е уҡытыусы. Район буйынса мәктәптәрҙә бөтәһе 16 психолог, 9 педагог ҡына эшләй, был да йәш быуынды тәрбиәләүгә кире йоғонто яһамай ҡалмай. Ринат Фазылйән улы шулай уҡ мәктәптәрҙе капиталь ремонтлау буйынса саралар планы тураһында мәғлүмәт бирҙе. Район буйынса мәктәптәр торошо һәм башҡарыласаҡ эштәр менән таныштырҙы. Был тәңгәлдәге эштәрҙе ваҡытында һәм сифатлы итеп атҡарып сығыу өсөн төрлө кимәлдәге бюджет сараларынан байтаҡ ҡына аҡса бүленәсәк. Әйткәндәй, уҙған йылда был маҡсатта 25 миллион һумдан ашыу аҡса бүленгән.
Унан һуң депутаттар алдында Баймаҡ районы буйынса Рәсәй Эске эштәр министрлығы бүлегенең 2011 йылдағы эшмәкәрлеге буйынса эске эштәр бүлеге начальнигы Ғ.Х. Юлдыбаев отчет бирҙе. Ул райондағы криминоген хәлгә ентекле анализ яһап, бүлек алып барған эшмәкәрлек төрҙәренә туҡталды, конкрет һандар һәм факттар менән таныштырҙы. Төрлө юҫыҡтағы енәйәттәрҙең сәбәптәренә, проблемаларға ла туҡталып үтте.
Сығыш яһаусыларҙың докладтарынан һуң фекер алышыуҙар булды. Уларҙа мәҙәниәт бүлеге начальнигы Гөлназ Йыһаншина, мәғариф бүлеге начальнигы урынбаҫары Римма Игебаева, йәштәр эштәре буйынса сектор белгесе Рөстәм Фәйзуллин, мәктәп директорҙары Рәжәп Мырҙабулатов (Сәйғәфәр), Фәнил Мортазин (Байыш), ауыл биләмәләре башлыҡтары Фәниә Вәхитова (Ниғәмәт), Ришат Ишмырҙин (Ҡолсора), Мансур Вәлишин (Ишбирҙе) ҡатнашты.
Бөтә мәсьәләләр буйынса тейешле ҡарарҙар ҡабул ителде.

Сәлимә Кейекбирҙина.